Read gen 1Samuɛl 31 Bible Online

1Samuɛl 31 - gen bible

1Samuɛl 31

¹E va va e mè be Filistìtɔwo be àhùakɔ̃wo gbà ɖè àhùa kpe na Izràɛlviwo lè Gilbòa be ètoa ji. Izràɛl be àhùakɔ̃a si lè Filistìtɔwo be ŋùkɔ̀, eye woa dòmètɔ sùgbɔ ku.

²Filistìtɔwo xa Saolò ku yebe ŋusùviawo. Wo wù Yonatàn, Abinadab ku Malkisua, Saolò be ŋusùviwo.

³Ekèa yomè a, àhùaa kpataa va ci Saolò ji. Kè be kpɔ be àŋùtu dàtɔwo va kè ɖo yè ŋutia, vɔ̃vɔ̃ gã ɖe ɖo è, eye be pò tìtìtì.

⁴Saolò gblɔ̃ na yebe àdèkplɔ̀vi a be: “Lìɔ èwui wò to, ne wòa sɔ trɔ̃ mù, ne mu nyi nène òa, àtɔ̀tɔ̀nɔ̀, vòdu sumɔtɔ kèawo la va ɖìgbɔ mù!” Vɔ̀a, Saolò be àdèkplɔ̀vi a gbe, ɖoa, e le vɔ̃ ŋutɔ. Eye Saolò sɔ èwuia, eye be sɔ ye ɖokoe trɔ̃ e nu.

⁵Kè Saolò be àdèkplɔ̀vi a kpɔ be Saolò kua, ye cã sɔ ye ɖokoe trɔ̃ yebe èwui nu, eye be ku kudo Saolò.

⁶Gbè ŋua gbèa, Saolò ku yebe ŋusùvi ètɔ̃, kudo yebe àdèkplɔ̀vi a, wo ku ɖodu, sɔ kpe ɖo yebe ŋutimewo keŋu ŋuti.

⁷Kè Izràɛlvi kèwo ye nɔ̀nà bàlìa be àkpa ɖèa ku kèwo ye nɔ̀nà Yɔrdàn be ètɔ̀a be àgo ɖe a jiawo kpɔ be Izràɛl be gbãdãgbãwo si, eye Saolò ku yebe ŋusùviwo kua, woawo cã, wo si gble woabe èdùwo ɖɛ. Filistìtɔwo va, eye wo ci èdùawo mè.

⁸Ekè èŋù kè, eye Filistìtɔwo va, la ɖè ènuzãzãwo lè àmè kèwo kuawo ŋutia, wo kpɔ Saolò ku yebe ŋusùviawo be àmèkpòtiwo lè Gilbòa be ètoa ji.

⁹Wo sò Saolò be èta, eye wo ɖè yebe àhùawɔ̀nuwo lè e ŋuti. Wo sɔ ètaa ku àhùawɔ̀nu kèawo ɖìsà lè Filistìtɔwo be ànyigbã ji, ne woa kãkã ènyà nyuɛ̃ kèa lè woabe vòduxɔwo mè, ne dùkɔ̃a keŋu ne nya.

¹⁰Wo sɔ Saolò be àhùawɔ̀nuawo ɖo Filistìtɔwo be vòdu Àstartè be èxɔ̀ mè, eye wo ka Saolò be àmèkpòtia ɖo Bɛt-Seàn be èdùa be èglìkpa ŋuti.

¹¹Yabɛ̀s be èdùa mètɔwo, lè Gilead-nyigbã ji, sè ènu kè Filistìtɔwo wɔ̀ ku Saolò.

¹²Ŋusù kãlìsuka kèwo ye lè Yabɛ̀s be èdùa mèawo jè èmɔ, eye wo zɔ̃ èzã bliboa, va Bɛt-Sean. Wo ɖè Saolò ku èviawo be àmèkpòtiawo lè Bɛt-Sean be èglì-kpaa ŋuti, eye wo trɔ gbɔ̀ va Yabɛ̀s, àfi kè wo va tɔ wo èzò lèa.

¹³Wo sɔ Saolò ku yebe ŋusùviawo be èpuawo yì ɖì lè Yabɛ̀s ɖo banìti gɔ̃mè, eye wo blanu, ŋùkèkè adrɛ̃.