Read gen 1Samuɛl 4 Bible Online

1Samuɛl 4 - gen bible

1Samuɛl 4

¹Samuɛl ɖènà Tɔhonɔ̀ be ènyà keŋu gblɔ̃ na Izràɛl be dùkɔ̃a kpata. Gbè ɖèkaa, Izràɛlviwo kpe àhùa ku Filistìtɔwo. Wo do àsàɖa ɖo Ebɛn-Ezɛr be èdùa gbɔ, eye Filistìtɔwo cã do àsàɖa ɖo Àfɛk.

²Filistìtɔwo kpã ŋùkɔ̀ Izràɛlviwo. Àhùaa kèkè èta, eye Filistìtɔwo ɖù Izràɛlviwo ji. Wo wù Izràɛlvi sìgbè àgbètɔ hotu èvè (4000) nène, lè àhùa-gbea ji.

³Dùkɔ̃a trɔ yì yebe àsàɖa mè, eye Izràɛlviwo be àmè sĩsĩwo biɔ woa ɖokoewo be: “Nukɛ ŋuti Tɔhonɔ̀ na Filistìtɔwo ɖù mia ji egbèa ɖo ò? Mì na mia yì sɔ Tɔhonɔ̀ be zòɖùɖu ɖakà a lè Silò va ɖo mia dòmè, ne bèa ɖè mi lè miabe èkɛ̃tɔwo si!”

⁴Dùkɔ̃a dɔ̃ àmè ɖoɖa Silò. Wo kɔ Tɔhonɔ̀ be zòɖùɖu ɖakà a va, eye Ŋusɛ̃ Kpatatɔa lè ɖùfìɔ lè Kèrubimwo ji. Hɔfnì ku Pineas, Èlìa be èvi èvèawo lè zòɖùɖu ɖakà a ŋuti.

⁵Wàlɛbɛ kè Tɔhonɔ̀ be zòɖùɖu ɖakà a va ɖo àsàɖaa mèa, Izràɛlviwo kpata kpà àbòbo, wo sò àyo, eye ànyigbã a hũhũ.

⁶Ekè Filistìtɔwo sè àbòbo a be ɖìɖia, wo biɔ woa ɖokoewo sè be: “Àbòbo kè le ɖì lè Hebrùviwo be àsàɖaa mèa gɔ̃mè ɖe?” Wo sè e mè be Tɔhonɔ̀ be zòɖùɖu ɖakà a ye va ɖo àsàɖaa mè.

⁷Filistìtɔwo vɔ̃, ɖoa, wo gblɔ̃ be: “Mawu va woabe àsàɖaa mè. Sãa, mu lè Izràɛlviwo dòmè ò. Fifìa, mi crɔ̃ vɔ̀! Ɖoa, ekèa mu jɔ̀ kpɔ ò!

⁸Ɛ̃ɛ, mi crɔ̃ vɔ̀! Àmè kɛ ye la xɔ̀ mi, lè Mawu ŋusɛ̃tɔ[3] kèa si ò? Mawu kèa ye hɛ̃ jɔ̀gbèvuɛ̃ fuuwo va na Ejiptètɔwo lè zògbèa ji!

⁹Filistìtɔwo, mì dojì, ŋusùwo mì nyi! Ne mu nyi nène òa, mì la trɔ zũ kluviwo na Hebrùviwo, sìgbè lekè woawo cã wo nyi miabe kluviwo sãa nène. Ekèa ŋutia, mia wɔ̀ àhùa ku wo ŋusù tɔ̀!”

¹⁰Filistìtɔwo wɔ̀ àhùaa, eye wo ɖù Izràɛlviwo ji veve ɖe, àleke be, Izràɛl ŋusùwo si yì ɖo woabe gòxɔwo mè. Filistìtɔwo wù Izràɛlviwo be gbãdãgbã hotu woeàtɔ̃ (30000).

¹¹Filistìtɔwo xɔ̀ Mawu be zòɖùɖu ɖakà a, eye Èlìa be ŋusùvi èvèawo, Hɔfnì ku Pineas ci àhùa.

¹²Gbè ŋua gbè kea, ŋusù ɖe so Bɛnyamìn be hɛ̃nu mè, pu dù so àhùa gbea ji va Silò. Ne bèa sɔ ɖè yebe kɔ̀bɛ fiɔa, e zɛ̃ yebe àwùwo, eye be lè èkɔ ɖo èta.

¹³Wàlɛbɛ kè be ɖo èdùa mèa, Èlìa nɔ̀ ànyi ɖo yebe àzìkpe ji, lè àgbonu, le nɔ̀tè kpɔ àhùagbe ji yìtɔwo ku mà-vo, ɖo Mawu be zòɖùɖu ɖakà a ŋuti. Ekè ŋusùa ɖè ènyàa nua, èwli ɖì, eye èdù bliboa na àle ku àbòbo.

¹⁴Ekè Èlìa sè àbòbo a, e biɔ sè be “Nukɛ ye le jɔ̀ ò? Nukɛ ŋuti ye dùkɔ̃a le kpà àbòbo ɖo ò?” Ŋusùa ɖèbla va to ènyàa na ɛ̀.

¹⁵Èlìa le ɖo èpè èkà èvè ci woènyi (98), yebe ŋùkuviwo ci keŋu-keŋu, eye mu gbà teŋu le kpɔ ènu ò.

¹⁶Ŋusùa gblɔ̃ na Èlìa be: “Àhùagbea ji ye mù so. Egbèa kpò mù si gbɔ̀.” Èlìa biɔ ɛ̀ sè be: “Nukɛ ye jɔ̀ ò, èvi nyè?”

¹⁷Àmèdɔ̃dɔ̃a ɖo e ŋuti be: “Izràɛlviwo si lè Filistìtɔwo be ŋùkɔ̀. Wo ɖù miabe àhùakɔ̃a ji veve ɖe ŋutɔ. Èvi wò èvèawo, Hɔfnì kudo Pineas ŋutɔ cã ku eye Filistìtɔwo sɔ Mawu be zòɖùɖu ɖakà a kɔ̀kɔ̀ɛa jo.

¹⁸Ekè àmèdɔ̃dɔ̃a gblɔ̃ Mawu be zòɖùɖu ɖaka be ènyàa, Èlìa jè ànyi lè yebe àzìkpea ji, jè ŋɛ̃sì, gbã hũɖòmè, sòga ɖo kɔ̀kɔ̀ɛpea be àgboa nu, eye be ku, ɖoa, e nyi àmè kè ku tɔgbea, eye be kpɛ̃. E nɔ̀ ŋùkɔ̀ na Izràɛlviwo, sìgbè kòjoɖotɔ nène, èpè èkà sɔ̃ŋu.

¹⁹Èlìa be ètoyɔvi kè nyi Pineas be èsrɔ̃a, be èfu sĩ, eye èvijìji gogo na ɛ̀. Wàlɛbɛ kè nyɔ̃nùa sè be Filistìtɔwo xɔ̀ Mawu be zòɖùɖu ɖaka kɔ̀kɔ̀ɛa, eye ètoa ku èsrɔ̃a kua, e do gòzo, ɖoa, èfua tɔ ɛ̀ ɖùɖu, eye be jì èvi.

²⁰Vɔ̀a, kè nyɔ̃nùa jo le pò èkubaɖaa, nyɔ̃nù kèwo ye le kpe ɖo e ŋutiawo, gblɔ̃ na ɛ̀ be: “Mù gbà vɔ̃ ò! Ŋusùvi ye wò jì!” Gãkea, mu ɖo ènyà ɖe ŋuti ò, ɖoa mu gbà le sɔ èɖe lè e mè ò.

²¹Kè e wɔ̀ zãaɖea, e gblɔ̃ be: “Kè e nyi be Tɔhonɔ̀ be gogo jo lè Izràɛl be èdùa jia, mù la na nyikɔ ɖèvia be Ikavɔd.” Nyikɔ kèa gɔ̃mè ye nyi: “Mawu be gogo mu gbà lè ò[4]. Ne woa sɔ nɔ ɖoŋù Tɔhonɔ̀ be Zòɖùɖu-Ɖakà kè Filistìtɔwo sɔ joa, ku nyɔ̃nùa be èto kudo èsrɔ̃a be èku ji.

²²Nène a ye nyɔ̃nùa gblɔ̃ be Tɔhonɔ̀ be gogo jo lè Izràɛl be dùkɔ̃a mè, wàlɛbɛ kè Izràɛl be èkɛ̃tɔwo sɔ Tɔhonɔ̀ be Zòɖùɖu-Ɖakà kɔ̀kɔ̀ɛa joa.