Read gen 1Samuɛl 8 Bible Online

1Samuɛl 8 - gen bible

1Samuɛl 8

¹Ekè Samuɛl ku àmègãa, e ɖo èviawo kòjoɖotɔwo ɖo Izràɛl be dùkɔ̃a nu.

²Ŋusùvi àmègãxoa tɔ̀ Yoɛ̀l. Èvègɔ̃a tɔ̀ Abìa. Wo va ɖo nɔ̀pe ɖo Bɛrsebà, eye wo nyi kòjoɖotɔwo lè funua.

³Gãkea, Samuɛl be èviwo mu zɔ̃ ɖo woa tɔ be kpɔwɔɛ nu ò. Ègà lɔ̃lɔ̃ na be wo ɖùnà èzãnu[8], eye wo sònà kòjo gɔ̃glɔ̃.

⁴Ekèa ŋutia, Izràɛl dùkɔ̃a be àmè sĩsĩwo va bɔ̀, yì kpɔ Samuɛl lè Ramà.

⁵Àmè sĩsĩawo gblɔ̃ na Samuɛl be: “Fifìa, Samuɛl, wò sĩ vɔ̀; gãkea, èvi wòwo mu le zɔ̃ to àpo àfɔ̀tope ò. Mi jro be wòa ɖo èfìɔ na mi, ne bèa nɔ̀ mia nu, sìgbè lekè be nyi lè dùkɔ̃wo keŋu nua nène.”

⁶Mu jɔ̀jì na Samuɛl be àmè sĩsĩawo biɔ be yèa ɖo èfìɔ na Izràɛl dùkɔ̃a ò. Samuɛl yɔ Tɔhonɔ̀.

⁷Tɔhonɔ̀ ɖo e ŋuti na Samuɛl be: “Ɖo èto ènu kè Izràɛl dùkɔ̃a le biɔ wòa, ne wòa wɔ̀ ɖo e ji. Mu nyi èwò ye wo le gbe ò, vɔ̀a, ènyè ye dùkɔ̃a le gbe. Wo mu gbà ji be ma nyi yèwo be èfìɔ ò.

⁸So kaka gbè kè gbè mù kplɔ̀ wo to so Ejiptè be ànyigbã ji, kaka va na fifìa, àlekè wo wɔ̀nà, eye wo gblena mù ɖɛ, yì sɛ̃nà vòduwoa, nènea ke ye wo le wɔ̀ ku wò cã.

⁹Ekèa ŋutia, wɔ̀ ɖo ènu kè wo le biɔa ji na wo. Vɔ̀a, wò la sìa wo veve ɖe, eye wò la fiɔ wo èse kè ji èfìɔ kè la nɔ̀ woa nua la zɔ̃ ɖoa.”

¹⁰Samuɛl ɖo Tɔhonɔ̀ be ègbè na dùkɔ̃ kè le biɔ ɛ̀ èfìɔa be:

¹¹“Àlekè èfìɔ kè la nɔ̀ mìa nua la kplɔ̀ èdùa ye nyi ekèa: E la cã gbãdãgbã lè mìabe ŋusùviwo dòmè, ne woa nɔ kù yebe àhùakèkewo, ne woa nɔ do yebe èsɔwo, ne woa nɔ pu dù lè èfìɔa ŋutɔ be àhùakèkea be ŋùkɔ̀.

¹²E la ɖè woa dòmètɔ ɖewo sɔ wɔ̀ àhùaŋùkɔ̀nɔ̀tɔwo lè àmè àkpe àkpewo ku àmè èkà ci èwowo be àhùakɔ̃wo nu. E la ɖè woa dòmètɔ buwo, ne woa nɔ dè àgblè na ɛ̀, ne woa nɔ yà yebe àgblè mè-nukuwo, ne woa nɔ wɔ̀ àhùawɔ̀nuwo ŋuti dɔwo.

¹³E la gbà sɔ mìabe nyɔ̃nùviwo wɔ̀ yebe àmì hɔ̃hɔ̃ɛ-dɔwɔ̀tɔwo, yebe ènuɖàtɔwo ku kpɔ̃nɔmètɔwo.

¹⁴E la xɔ̀ mìabe àgblèwo, mìabe vɛ̃-gblewo, àlo, mìabe àmìtigblè kèwo nyɔ wuawo lè mìa si, sɔ na yebe àhùa ŋùkɔ̀nɔ̀tɔwo.

¹⁵E la nɔ xɔ̀ mìabe àgblè mè-nukuwo ku mìabe vɛ̃-gble mè-nukuwo be mamã èwogɔ̃a, eye be la nɔ sɔ wo na yebe àgbònùglawo ku yebe sumɔ̃viwo.

¹⁶E la xɔ̀ mìabe sumɔ̃vi ŋusùwo ku sumɔ̃vi nyɔ̃nùwo lè mìa si, e la xɔ̀ mìabe ɖèkajɛ ku tùgbɛ̀jɛ kèwo nyakpɔkpɔ wua, eye be la gbà xɔ̀ mìabe èsɔ-àkɛtɛ kèwo ye nyɔ wua, na ye ŋutɔ be zãzã.

¹⁷E la xɔ̀ mìabe èlãhawo be mamã èwogɔ̃a, eye mìawo ŋutɔa, mì la trɔ zũ yebe kluviwo.

¹⁸Wàlɛbɛ ŋua, mì la na àle, la fã yɔ Tɔhonɔ̀, ɖo èfìɔ kè mì la cã na mìa ɖokoea ŋuti, vɔ̀a, wàlɛbɛ ŋua, Tɔhonɔ̀ mu la ɖo èto mì ò.”

¹⁹Gãkea, Izràɛlviwo gbe be yèwo mu la ɖo èto ènyà kè Samuɛl le gblɔ̃ na yèwo ò. Wo ɖo e ŋuti be: “Gbèɖe! Èfìɔ kpò ye mi le ji.

²⁰Nène a ye miawo cã mi la nɔ̀ sìgbè dùkɔ̃ kpɔ̀tɛawo keŋu nène. Miabe èfìɔa la nɔ ɖo kòjo na mi, e la nɔ nɔ̀ ŋùkɔ̀ na miabe àhùakɔ̃a, eye be la nɔ wɔ̀ àhùa na mi.”

²¹Samuɛl ɖo èto ènyà kèwo keŋu Izràɛlviwo gblɔ̃a, eye be yì ɖo ègbèa na Tɔhonɔ̀.

²²Tɔhonɔ̀ ɖo e ŋuti na Samuɛl be: “Sè woabe ènyàa, ne wòa ɖo èfìɔ na wo.” Ekèa yomè a, Samuɛl gblɔ̃ na Izràɛlviwo be: “Fifìa, mì jo yì àxomè.”