Read gen 1Samuɛl 9 Bible Online

1Samuɛl 9 - gen bible

1Samuɛl 9

¹Wàlɛbɛ ŋua, ŋusù hùɛ̃yi ɖe nɔ̀ Bɛnyamìn-nyigbã ji. Wo yɔna ɛ̀ be Kis. Wo yɔna ètɔa be Abiɛl, Serɔ̀r be èvi. Tɔgbea Serɔ̀r nyi Bekoràt be èvi, eye Bekoràt ŋutɔ nyi Afìa, Bɛnyamìn-nyigbã ji ŋusù sɛ̃sɛ̃ ɖe kè si àlɔ̀mè lèa be èvi.

²Kis ɖo ŋusùvi jè ɖèkajɛ ɖe. Wo yɔna ɛ̀ be Saolò. Izràɛl ŋusùvi ɖekpe mu nyɔ sɔ̀ ku ì, àlo, sɔ̀ èta ku ì ò. Lè dùkɔ̃ bliboa mèa, ŋusù dìdìwoa, àbɔta kpò wo teŋu sɛ̃na na ɛ̀.

³Gbè ɖèkaa, Kis kè nyi Saolò be ètɔa, be èsɔ-àkɛtɛ-nɔ ɖewo bu, eye Kis to na èvia Saolò be: “Kplɔ̀ sumɔ̃viawo dòmètɔ ɖèka ɖo àsi, ne mìa yì ji èsɔ-àkɛtɛ-nɔawo.”

⁴Saolò sã lè Efràyim be èto ku Salisa-nyigbã ji, vɔ̀a mu kpɔ wo ò. Saolò ku yebe kpe ɖo ŋutitɔa to Salim-nyigbã ji, vɔ̀a, wo mu gbà kpɔ èlãawo ò. E yomè a, wo va sã to Bɛnyamìn-nyigbã cã ji, gãke wo mu kpɔ èlãawo ò kpò ye.

⁵Kè Saolò ku sumɔ̃via va ɖo Suf-nyigbã jia, Saolò gblɔ̃ na sumɔ̃via be: “Fifìa, mia trɔ yì àxomè. Mù le vɔ̃ be ètɔ nyè la jo ŋlɔ̀be èsɔ-àkɛtɛ-nɔawo, eye be la jo nɔ xànu ɖo mia ta.”

⁶Sumɔvia ɖo e ŋuti na ɛ̀ be: “Vɔ̀a, Mawu be àmè ɖe lè èdù kèa mè. Àmè sùgbɔ gblɔ̃nà yebe ènyà nyuɛ̃, eye ènu ɖe sia ɖe kè be gblɔ̃nàa, jɔ̀nà kpò ye. Mia yì kpɔ ɛ̀. Èta mu nyɔ òa, e la teŋu gblɔ̃ àfi kè mi la ji èlãawo toa na mi.”

⁷Saolò gblɔ̃ na yebe sumɔ̃via be: “E nyɔ! Vɔ̀a, ne mi yì ŋusù kèa gbɔa ɖe, nukɛ ye mi la na ɛ̀ ò? Ènuɖùɖu ɖekpe mu gbà lè miabe àkpɛtɛwo mè ò. Eye mu nyɔ be woa sɔ èmɔ-zɔ̃zɔ̃ be ènuɖùɖu na Mawu be àmè ò. Nukɛ ye gbà kpɔ̀tɔ̀ na mi ò?”

⁸Sumɔvia ɖo e ŋuti be: “Klòsalò-ga be mamã ènègɔ̃a be ɖe lè àsi nyè. Mù la sɔ ɛ̀ na Mawu be àmèa, ne bèa gblɔ̃ àfi kè mi la ji èlãawo toa na mi.”

⁹Sãa, lè Izràɛl be èdùwo mèa, ne àmè ɖe jro be yèa biɔ Tɔhonɔ̀, ènyà ɖe gɔ̃mè sè a, àmèa gblɔ̃nà be: “Mì va ne mia yì ènumè-kpɔtɔa gbɔ!” Ɖoa, Mawu be gblɔ̃ɖɛtɔa, ènumèkpɔtɔ[9] ye wo yɔna ɛ̀ sãa.

¹⁰Saolò gblɔ̃ na yebe sumɔ̃via be: “Àpo ènyà lè e mè. Va, mia yì.” Eye wo jè èmɔ yì èdù kè mè Mawu be àmèa lèa mè.

¹¹Ekè wo le lia èto tùtà èdùa mèa, wo dogò tùgbɛ̀jɛvi kèwo to so èdùa mè, va le yì ètɔ̀ mèa. Wo biɔ tùgbɛ̀jɛawo be: “Àfi kèa ye ènumèkpɔtɔa lèa?”

¹²Tùgbɛ̀jɛviawo ɖo e ŋuti be: “Ɛ̃ɛ, fikèa ye. Fifì jɛ̃ kpò be ɖo èdùa mè, lè ŋùkɔ̀ na mì. Àfɔ̀ ne sɔ̀ na mì. E va èdùa mè egbèa, ɖoa, èdùamètɔwo la savɔ, lè èto ji egbèa.

¹³Ne mì gbe ɖo èdùa mè zè ɖèka kpòa, mì la kpɔ ɛ̀, keŋu gbɔ̀xue be la yì ètoa ji, la yì ɖùnu. Àmè ɖekpe mu ɖo la ɖùnu gbɔ̀xue be la va ò, ɖoa, e ye la tu sì na vɔsaa. Ekèa yomè ye àmè kpekpewo la ɖùnu. Mì yì, mì la kpɔ ɛ̀ fifì.

¹⁴Wo zɔ̃ èmɔa, le yì, eye, wàlɛbɛ kè wo le ɖo èdùa mèa, Samuɛl cã le to so èdùa mè gbãnà, le yì ètoa ji.

¹⁵Vɔ̀a, keŋu gbɔ̀xue èŋù ne kèa, Tɔhonɔ̀ sìa Samuɛl dàɖɛ, gbɔ̀xue be la va èdùa mè, be:

¹⁶“Èsɔ̀, wàlɛbɛ kèa tutua, mù la dɔ̃ ŋusù ɖe, so Bɛnyamìn be ànyigbã ji ɖoɖa wò. Wò la do àmì èta na ɛ̀. Eye be la nyi èfìɔ na àpe dùkɔ̃ kè nyi Izràɛl-a. Àmè kèa la hlùɛ̃ dùkɔ̃ nyèa gã, lè Filistìtɔwo si. Ɖoa, mù kpɔ dùkɔ̃ nyèa be àyàɖùɖu, eye mù sè yebe àlenana.

¹⁷Eye, wàlɛbɛ kè Samuɛl kpɔ Saolòa, Tɔhonɔ̀ gblɔ̃ na ɛ̀ be: “Ŋusù kè be ènyà mù to na wòa ye nyi ekèa. E ye nyi àmè kè la kplɔ̀ dùkɔ̃ nyèa.”

¹⁸Saolò zɔ̃ gogo Samuɛl, eye e gblɔ̃ na Samuɛl lè àgboa nu be: “Tɔ̀ wò jɔ̀, fikɛ ye nyi ènumèkpɔtɔa be àxomè ò?”

¹⁹Samuɛl ɖo e ŋuti na ɛ̀ be: “Ènyè ye nyi ènumèkpɔtɔa. Tàflacɛ, jè ŋùkɔ̀ na mù, ne mia yì ètoa ji, lè Tèpe Kɔ̀kɔ̀ɛa. Egbèa, èwò ku ŋutime wòwo, mì la ɖùnu ku mù. Èsɔ̀ ŋùdekɛ̃nyɛ mèa, ne mù gblɔ̃ ènu kèwo susu wò le jiawo na wò vɔ̀a, wò la trɔ jo fàa.

²⁰Eye, mù gbà vɔ̃ ɖo èsɔ-àkɛtɛ-nɔ kèwo bu, ŋùkèkè ètɔ̃ ye nyi ekèawo nu ò. Ɖoa, wo kpɔ wo vɔ̀. Vɔ̀a ɖe, ènu xɔ̀ àsì kèwo keŋu lè Izràɛl-nyigbã jiawo ɖe, àmè kɛ tɔ̀ ye wo nyi ò? Mu nyi èwò ku ètɔ wò be àxue keŋu tɔ̀ ye wo nyia?”

²¹Saolò ɖo e ŋuti be: “Oò, leke wɔ̀ ò? Bɛnyamìn be hɛ̃nu mèvi kpò mù nyi e! Izràɛl be kɔ̀ta kè hùe wua mèvi kpò mù nyi, eye miabe kɔ̀taa ye nyi kɔ̀ta kè mè àmè mu sùgbɔ lè ò, lè Bɛnyamìn be kɔ̀taa mè. Nukɛ wɔ̀ ye wò le gblɔ̃ nènea ò?”

²²Samuɛl kplɔ̀ Saolò ku Saolò be sumɔ̃via yì ènuɖùxɔa mè. E na, wo nɔ̀ ànyi ɖo bùbu tèpe ku àmè kpekpe ègbã ɖewo.

²³Samuɛl gblɔ̃ na ènuɖàtɔa be: “Sɔ ènu ɖùɖu kè mù sɔ do àsi na wò, eye mù gblɔ̃ na wò be: 'Sɔ ɛ̀ ɖovòa' va.”

²⁴Ènuɖàtɔa yì sɔ èlã be àta, ku ènu kèwo bɔ̀ ɖo e ŋutiawo va. E sɔ wo ɖo Saolò be ŋùkɔ̀. Samuɛl gblɔ̃ be: “Ènu kè mi ɖè ɖovò ɖɛ na wòa ye nyi ekèa. Dɔ̃ ɛ̀ ɖo àkɔ mè, ne wòa ɖù ì, ɖoa, ekè mù kpe dùkɔ̃a, mù ɖè è ɖovò ɖɛ na wò.” Eye Saolò ɖùnu ku Samuɛl, gbè ŋua gbè.

²⁵Ekèa yomè a, wo ɖì so ètoa ji, yì èdùa mè. Samuɛl ku Saolò nɔ̀ èxɔ̀ tamè gbàjà ji, eye wo pò nupo.

²⁶Ekè èŋù le kèa, Saolò ku yebe sumɔ̃via fɔ̃ kaba. Kè èŋù kè vɔ̀a, Samuɛl yɔ Saolò eye be gblɔ̃ na ɛ̀ be: “Fifìa, ma yì ɖo wò.” Eye Samuɛl ku Saolò jè èmɔ.

²⁷Kè wo to lè èdùa mèa, Samuɛl gblɔ̃ na Saolò be: “Gblɔ̃ na sumɔ̃via be ne jè ŋùkɔ̀”, sumɔ̃via jè ŋùkɔ̀. Ekèa yomè a, Samuɛl gblɔ̃ na Saolò be: “Èwò yaa, nɔ̀tè, ne ma ɖo ègbè kè Mawu do àsi na mù a, na wò.”