Read Te B'aib'ara Karikani B'aai 12 Bible Online

Karikani B'aai 12 - Te B'aib'ara bible

Karikani B'aai 12

¹Ao E taku te Atua nakon Aberam, “Kitana abam, ma am koraki, ao ana auti tamam, ao naako nakon te aba ae N nang kaotia nakoim.

²N na anganiko am kariki aika rangi ni m'aiti, ao a na riki b'a te botannaomata ae korakora. N na kakab'aiako, ao N na kakannatoa aram, b'a ko aonga n riki b'a te kakab'aia nakoia aomata.

³N na kakab'aiaia akana kakab'aiako, ao N na kamaraiaia akana kamaraiako. A na kakab'aiaki botannaomata nako iroum.”

⁴Ao E a manga moana m'anangana Aberam mai Aran ngke ai itibwi ma nimaua ana ririki ni maiu, n aron tuangana are e tuangnga te UEA b'a e na karaoia, ao e iri naba Roota.

⁵Ao e kaira Nei Tarai are buuna Aberam, ma ai natina are Roota, ao kaub'aina ma ana toro ni kabane ake a reke i Aran, ao a manga moana m'anangaia nakon te aba are Kanaan.

⁶Ao e m'ananga Aberam ni karokoa a roko n te Oke ae tabu are ana Oke More, are e mena n te tabo ae tabu are i Tekem. (A maekana te aba aei aomatan Kanaan n taai aikai.)

⁷Ao E kaoti te UEA nakon Aberam, ao E taku, “Bon aio te aba are N nang anganiia am kariki.” Ao e karaoa te baonikarea Aberam i bukin te UEA are E kaoti ngkoa nakoina.

⁸Ao i mwiin anne, ao e a manga m'ananga nako aiaki nakon te aba are tabukibuki are i mainikun te kaawa ae buubura are Betaera, ao e katea ana maeka i marenan Betaera are i maeao ma Ai are i mainiku. E katea naba ikanne ana baonikarea, ao E taromauriia te UEA.

⁹Ao e m'ananga man te tabo teuana nakon te tabo teuana ni waerake nako m'akoron Kanaan are i maiaki.

¹⁰Ma e bon taonaki Kanaan n te rongo n te tai anne, ao e bon rangi ni korakora ma ngaia are, e a manga m'ananga Aberam nakoaiaki riki nako Aikubita, ni maeka tabeua te tai ikekei.

¹¹Ao ngke e nang rin nako n tian Aikubita, ao e taku nakon buuna are Nei Tarai, “Ko bon rangi ni botonaine.

¹²Ane a na boni b'aka i roum kaain Aikubita, ao ane a na tiringai i bukina ngke buu ngkoe, ao a na ti kamaiuko.

¹³Ko na tuangiia b'a aongkoa m'aneu ngkoe, ao ane a na kamaiuai ma n akoai.”

¹⁴Ao ngke a rin i nanon tian Aikubita, ao a noora buuna kaain Aikubita b'a bon te aine ae botonaine.

¹⁵A nooria tabeman kaain ana bareti te uea,[15] ao a tuanga te uea, ma ngaia are, e a uotaki nakon te bareti neierei.

¹⁶Ao e a rangi n akoa Aberam te uea i bukin neierei, ao e anganna nanai n tiibu, nanai ni kooti, nanai ni kao, nanai n aati, nanai ni kamero, ao ana toro aika m'aiti.

¹⁷Ma E karokoa te aoraki ae korakora te UEA i aon te uea ao kaain ana bareti, i bukina ngke e anaa Nei Tarai.

¹⁸Ma ngaia are, e kananako wetean Aberam te uea, ao e taku nako ina, “Tera ae ko kataia ni karaoia nako iu? E aera ngke ko aki tuangai b'a ngaia boni buum neiei?

¹⁹E aera ngke ko taku b'a m'anem, ao ko kariaia b'a N na anaia b'a buu? Ao aei buum, anaia, ao otinako mai ikai!”

²⁰Ao e anga ana taeka te uea nakoia ana taani m'akuri, ma ngaia are, a anaa Aberam ao a uotia ni kaotinakoa man te kaawa, ngaia ma buuna ma ana b'ai ni kabane.