Read Te B'aib'ara Karikani B'aai 13 Bible Online

Karikani B'aai 13 - Te B'aib'ara bible

Karikani B'aai 13

¹Ao e otinako mai Aikubita Aberam ma buuna, ma ana b'ai ni kabane, ao Roota, ao a nako nakon m'akoron Kanaan are i maiaki.

²Ao bon te aomata ae rangi ni kaub'ai Aberam n te tiibu, ma te kooti, ma te kao, ao ai uana naba ma te tirewa ma te koora.

³Ao e kiitana ikekei, ao e m'ananga man te tabo teuana nakon te tabo teuana nakon te tabo ae Betaera. Ao e a manga roko n te tabo are i marenan Betaera ma Ai, are e bon katea naba ngkoa ana auti n rianna iai mai m'aaina,

⁴ao e katea naba iai te baonikarea. Ao e taromauria te UEA iai.

⁵Ao bon iai naba ana nanai n tiibu ma ana nanai ni kooti ma ana nanai ni kao Roota, ao ai uana naba ma ana utu, ao ana toro.

⁶Ma ngaia are, e a aki tau te tawaana n uteute i bukiia ni kauoman ngkai a bootaki ni maeka, b'a a rangi ni m'aiti aia nanai ni man.

⁷Ma ngaia are, e riki te kauntaeka i marenaia ana taan kawakin maan aika kawakawa Aberam ma ana taan kawakini maan aika kawakawa Roota. (A boni maekana naba te aba aei kaain Kanaan ma kaain Beriti n te tai aei.)

⁸Ao e taku Aberam nakon Roota, “A aki riai ni kauntaeka am aomata ma au aomata ngkai boni koraki ni kaan ngaira.

⁹Ma ngaia are, ti riai ni maaenako. Ko na rinea m'akoron te aba ane ko tangiria. Ko nakon teuana, ao Ngai I nakon are teuana.”

¹⁰Ao e taratara nako Roota, ao e noora te aba are ni m'aruan Ioretan nako Tooa b'a e m'aiti te ran iai kaanga ai aron nnen arokan te UEA.

¹¹Ma ngaia are, e rinea m'aruan Ioretan Roota, ao e a m'ananga ni waerake. Ao ai aei ngkanne aron maenakoia mm'aane aikai.

¹²E tiku Aberam n te aba are Kanaan, ao e maeka Roota i rarikin kaawa aika buubura ake n te m'arua, ao e katea ana maeka i rarikin Tootom,

¹³are te kaawa are a buakaka kaaina, are a bubure nakon te UEA.

¹⁴Ao ngke e a tia n nako Roota, ao E taku te UEA nakon Aberam, “Ko na taratarai raoi taabo nako man te tabo ane ko mena iai.

¹⁵N nang anganiko ma kanoam aaba ni kabane ane ko nooria, ao a na riki b'a am b'ai n aki toki.

¹⁶N na anganiko kanoam aika rangi ni m'aiti ae akea temanna ae kona ni wareki m'aitiia; e kona riki ni warekaki bubun aon te aba nakon warekaia.

¹⁷Ma ngaia are, ko na nako ngkai, ao ko na taraa aon te aba ni kabutaa i bukina b'a N nang anganiko ni kabane.”

¹⁸Ma ngaia are, e kam'aea ana auti n rianna Aberam, ao e manga maeka i rarikin Oke ake atoatongaki, ake ana Oke Mamre i Eberon, ao e katea te baonikarea ikekei i bukin te UEA.