Read Te B'aib'ara Karikani B'aai 14 Bible Online

Karikani B'aai 14 - Te B'aib'ara bible

Karikani B'aai 14

¹Ao a m'ananga ni buaka uea ake aman ake Amrabera are uean B'aburon, Arioka are uean Erata, Ketoreraomera are uean Eram, ao Titara are uean Koiim.

²A nako ni buakaniia uea ake niman ake Bera are uean Tootom, Biretia are uean Komora, Tinaba are uean Atema, Temebera are uean Teboiim, ao uean Bera (ke Tooa).

³A kabooi nanoia uea ake niiman, ao a booti aia taanga n te m'arua are Tirim, are aranaki b'a Taari ae Mate n taai aikai.

⁴A tia ni mena ngkoa i aan ana tautaeka Ketoreraomera i nanon tebwi ma uoua te ririki, ma a rawa ni mena i aana n te katebwi ma tenua n ririki.

⁵Ao n te katebwi ma aua n ririki, ao e roko Ketoreraomera ma raona ake buokana ma aia taanga ni buaka, ao a kataenikaia Rebaim are i Atiterota-Karenaim, Tutim i Aam, ma kaain Emim ake i aban Kiriataim are aoraoi,

⁶ma kaain Oraite ake ni maungan Etom, ao a kakioia ni karokoa Erabaran are i mataniwin te rereua.

⁷Ao a manga rairaki n oki, ao a okira Kateti.[16] A taua abaia kaain Amareka ni kabane, ao a kataenikaia kaain Amora ake a maeka i Ataton Tam'aa.

⁸Ao a kawaerakeia aia taanga ni buakana uean Tootom, Komora, Atema, Teboiim, ao Bera nakon te m'arua are Tirim, ni buakaniia

⁹uean Aram, Koiim, B'aburon, ao Erata. Ai aron ae niiman te uea ni kaaitaraia aman.

¹⁰Ao e onrake te m'arua arei n taian nib'anib'a n taa, ma ngaia are, ngke a kataia ni birinako uean Tootom ma Komora man te bo ni buaka, ao a b'aka i nanon taian nib'anib'a akekei; ao uea ake teniman, a reke birinakoia nakoni maunga.

¹¹Ao a anai b'aai ni kabane uea ake aman mai Tootom ma Komora, n ikotaki ma taian am'arake, ao i mwina a nako.

¹²Ao e maeka ai natin Aberam are Roota i Tootom, ma ngaia are, a anaia naba ma ana b'ai ni kabane.

¹³Ma e birinako temanna, ao e taekin rongorongo aikai ni kabane nakon Aberam are I-Ebera are maeka i rarikin te Oke are atoatongaki, are ana Oke Mamre are kaain Amora. Ana itoman Aberam boni Mamre ma tarina ake, Etikora, ao Anera.

¹⁴Ao ngke e ongo Aberam b'a e uotakinako b'a te taenikai ai natina are Rota, ao e bootia ana mm'aane ake taani buaka aika 318 bootaia, ao a taorimwiia uea ake aman nako Taan.

¹⁵Ao e tib'atib'aia ana taanga ni buaka nakon aia kurubu nako, ao a buakaniia aia kairiribai ngke e a bong, ao a kataenikaia. Ao a kakioia ni karokoa Ob'a are i meangin Tamateko,

¹⁶ao Aberam, e anai taiani b'ai mairouia naake a konaaki, ake a uotinako ngkoa b'aai. Ao e kaoka naba ai natina are Roota ma ana b'ai ni kabane, n ikotaki naba ma aine, ao taenikai naba ake tabeman.

¹⁷Ngke e oki Aberam i mwiin tokanikaina n te buaka i aon Ketoreraomera ma uea ake tabeman, ao e otinako uean Tootom ni butim'aia n te M'arua are Tiawe (e ataaki b'a Ana M'arua te Uea).

¹⁸Ao e uota te kariki ma te wain Merekitereka are uean Tarem nakon Aberam. Bon Ana ibonga naba te Atua ae Moan te Rietaata Merekitereka.

¹⁹E kakab'aiaa Aberam Merekitereka ao e taku, “Ke e kakab'aiaa Aberam te Atua ae Moan te Rietaata are karaoa karawa ma aonnaba!

²⁰E na neboaki te Atua ae Moan te Rietaata are E anganiko te tokanikai i aoia am kairiribai.” Ao Aberam e angan Merekitereka teuana te katebwina man b'aai ake e uoti rikaaki man te buaka.

²¹Ao e taku uean Tootom nakon Aberam, “Kawakin b'aai akanne, ma ko na ti kaokiia au aomata nako iu.”

²²Ao e taku Aberam. “I a tia n tuea nakon te UEA, ae Moan te Rietaata, ae karaoa karawa ma aonnaba,

²³b'a N na bon aki taua te b'ai teuana man am b'ai nako, e ngae naba ngkana tao ti teaina te karai ke ti teuana kabaean te kauniwae. B'a ko kaawa ni manga kaangai, ‘A reke kaub'ain Aberam mairou.’

²⁴Akea te b'ai ae N na anaia b'a I a tau naba n ake a tia ni kanna au aomata. Ma ko a ti karekei tib'angaia raou ni buaka aika Anera, Etikora, ao Mamre.”