Read Te B'aib'ara Karikani B'aai 15 Bible Online

Karikani B'aai 15 - Te B'aib'ara bible

Karikani B'aai 15

¹Ao i mwiin aei, ao e roko te kaotioti iroun Aberam, ao e ongo Ana taeka te UEA ngke E kaangai, “Ko na aki maaku, Aberam. N na kamanoko man taiani kaangaanga ao N na anganiko kaniwangam ae moan te buubura.”

²Ma e kaeka Aberam, “Te UEA ae Moan te M'aaka, tera bonganan kaniwangau ae Ko na anganai ngkai, ao e tuai man reke natiu? Ao e nang b'aib'ai i mwiiu ngkana I mate teuare Erietera are kaain Tamateko.

³Bon akea natiu ae Ko a tia n anganai, ao e nang onea mwiiu au toro temanna.”

⁴Ao E a manga ongo b'anaan te UEA ae kaangai, “E na bon aki b'aini am b'ai am toro ane Erietera i mwiin matem; e na bon b'aib'ai natim te mm'aane i mwiim.”

⁵Ao E kairiia te UEA nako tinaniku, ao E taku, “Taraa karawa, ao kataia ni wareki taiani itoi; a na riki kanoam kanga ai aron m'aitin taian itoi.”

⁶Ao E kukurei te UEA iroun Aberam ngke e onimakinna.

⁷Ao E a manga taku te UEA nakon Aberam, “Boni Ngai te UEA are I kaotinakoko mai Ura i Kareria, ao I anganiko te aba aei b'a abam.”

⁸Ma e kaeka Aberam, “Te UEA ae Moan te M'aaka, N na kanga n ataia b'a ai bon abau?”

⁹Ao E taku, “Uota mai te kao aine, te kooti aine, ao te tiibu teteei te mm'aane, aika kaka tenua aia ririki ni maiu. Uota mai naba te rube ma te bitin.”

¹⁰Ao e uoti maan aika kawakawa akekei Aberam nakon te Atua. E korouai ni kakauaiterai mai nukaia, ao e kawenei ni kakaitarai iteraia n tatabemaniia nako ni karinaniia raoi, ma e aki korouai taiani mannikiba.

¹¹A tikubara i aon baikekei taiani mannikiba aika kaakang irikon maan aika kawakawa aika mate, ma e kakionakoia Aberam.

¹²Ao ngke e a bungitaai, ao e a matunako Aberam, ao e roko te maaku ae korakora i rouna.

¹³Ao E taku te UEA nako ina, “A na riki kanoam b'a ianena n te aba teuana; a na riki b'a tooro ikekei, ao a na kairaki n te aro ae aki raoiroi i nanon abubua te ririki.

¹⁴Ma N na bon karekei kaia botannaomata ake a tautoroniia, ao ngkana a kiitana te aba are a ianena iai, ao a na uoti kaub'ai aika bati ma ngaiia.

¹⁵Ao ngkoe ko na maiu ni karokoa rokom raoi n am bong ni kara, ao ko na mate ma n taunaki ma te rau.

¹⁶A na reke aua te roro i m'aain okiia ami kariki, b'a N na bon aki kanakoia kaain Amora ni karokoa te tai are a rangi ni buakaka aia m'akuri iai, ao a bon riai ni katuaeaki.” [17]

¹⁷Ao ngke e a bung taai, ao e a roo, ao a karina ni kaoti te b'aata ae bubu, ao te ai,[18] ao a buti i marenan taian m'akoro ni man akekei.

¹⁸Ao E a karaoa ana berita te UEA n te tabo aei ma Aberam, ao E taku, “I berita b'a N na anganiia kanoam te aba aei ni kabane ni moa man tian Aikubita nakon te karaanga are Iuberetiti,

¹⁹ni ikotaki naba ma abaia kaain Kena, Kenita, Karimon,

²⁰kaain Eta, Berita, Rebaim,

²¹Amora, Kanaan, Kirekata, ao kaain Iebuti.”