Read Te B'aib'ara Karikani B'aai 17 Bible Online

Karikani B'aai 17 - Te B'aib'ara bible

Karikani B'aai 17

¹Ao ngke ai ruabwi ma ruaiwa ana ririki ni maiu Aberam, ao E kaoti te UEA nakoina ao E taku, “Boni Ngai te Atua ae Moan te M'aaka. Ongotaeka i Rou, ao kakaraoa te raoiroi n taai nako.

²N na karaoa au boraraoi ma ngkoe, ao N na anganiko kanoam aika m'aiti.”

³Ao e bobaraaki Aberam, ao e kabooa matana ma aontano, ao E taku te Atua,

⁴“I boraraoi ma ngkoe: I berita b'a ko na riki b'a aia bakatibu botannaomata aika m'aiti.

⁵Ao e na aki manga atongaki aram b'a Aberam,[22] ma e na atongaki b'a Aberaam, i bukina ngkai I karikiko b'a aia bakatibu botannaomata aika m'aiti.

⁶N na anganiko kanoam aika m'aiti, ao tabeman mai buakoia a na riki b'a uea. A na bon rangi ni m'aiti kanoam, ao a na riki b'a taiani botannaomata.

⁷“N na kakawakina au Berita ma ngkoe, ao nakoia naba kanoam n rooro aika na roko b'a te boraraoi ae akea tokina. N na riki b'a Atuami, ao Atuaia naba ami bakatibu.

⁸N na anganiko ma am kariki te aba ae te iruwa ngkoe iai ngkai. E na riki te aba ae Kanaan b'a aia b'ai ami bakatibu n akea tokina, ao N na riki b'a Atuaia.

⁹E taku te Atua nakon Aberaam, “Ko riai ni kariaia b'a ko na kawakina au boraraoi ma ngkoe, ngkoe ma kanoam n roro aika na roko.

¹⁰A na riai ni kariaia kanoam b'a a na koroi tabonim'aneia aia mm'aane akana i buakoia.

¹¹Ni moa man te tai aei, ao kam na koroi kunin taboni m'aneia ataei ni mm'aane ni kabane akana a koro wanua aia bong i mwiin bungiakiia, n ikotaki naba ma nati mm'aane akana natiia ami toro akana bungiaki ni mwengami, ao tooro naba aika kam kabooi mairouia ianena. E na kaotaki raoi n aei b'a iai te boraraoi i marenau ma ngkami.

¹²Kam na bane ni korotabonim'aneaki, ao bon aei kanikinaeana i aon rab'atami b'a boni iai te boraraoi i marenami ma Ngai.

¹³A riai ni bane ni korotabonim'aneaki n tatabemaniia nako, ao e na riki aei b'a te kanikina i aon rab'atami b'a kaotan Au boraraoi ma ngkami ae akea tokina.

¹⁴Te mm'aane ane aki korotabonim'aneaki, e na bon aki atongaki b'a au Aomata, i bukina ngke aki kawakina au boraraoi ma ngaia.”

¹⁵E taku te Atua nakon Aberaam, “man te tai aei ko na aki manga atonga aran buum b'a Nei Tarai, ma e na aranaki b'a Nei Taara.

¹⁶N na kakab'aiaa, ao N na karekea natim te mm'aane mai rouna. N na kakab'aiaa, ao e na riki b'a tinaia botannaomata nako, ao a na riki uea irouia kanoana.”

¹⁷Ao e bobaraaki Aberaam ni kabo matana ma aontano, ma e ngare n ana iango ae kaangai, “E koaua b'a e kona ni kariki te aomata ngkana ai tebubua ana ririki ni maiu? E kona ni kariki Nei Taara ngkai ai ruabwi ana ririki?”

¹⁸Ao e taku nakon te Atua, “E aera ngkai e aki karikaki Itimaera [23] b'a te tia onea mwiiu?”

¹⁹Ma E taku te Atua, “Tiaki ngaia anne, ma e na kariki Nei Taara are buum, ao e na karika natim te mm'aane, ao ko na aranna b'a Itaaka.[24] N na kawakina au Berita ma ngaia, ao kanoana ana kaawakinna n aki toki. Bon te berita ae akea tokina.

²⁰I a tia n ongo am bubuti i bukin Itimaera, ma ngaia are, I a tia ni kakab'aiaa, ma n anganna natina aika m'aiti, ma kanoana aika m'aiti naba. E na riki b'a tamaia nati n uea ake tengaun ma uoman. N na karika te botannaomata ae buubura mairouia kanoana.

²¹Ma N na kaawakina au berita ma natim te mm'aane are Itaaka, are e na bungiia Nei Taara n te tai ae ai aron naba aei n te ririki ae na roko.”

²²Ao E a kitana Aberaam te Atua ngke E a tia n taetae ma ngaia.

²³Ao ni bon te bong naba arei, ao e ongotaeka Aberaam iroun te Atua, e anaa natina te mm'aane are Itimaera ao e korotabonim'aneia, ao mm'aanen ana auti ni kabane, n ikotaki naba ma nati mm'aane ake ana toro, ake a bungiaki n ana auti, ma ake e kabooia.

²⁴Ai ruabwi ma ruaiwa ana ririki ni maiu Aberaam ngke e koreaki tabonim'anena,

²⁵ao ana ririki natina te mm'aane are Itimaera ai tebwi ma tenua.

²⁶A kaai ni korotabonim'aneaki n te bong ae ti te bongina,

²⁷n ikotaki naba ma ana toro Aberaam ni kabane.