Read Te B'aib'ara Karikani B'aai 22 Bible Online

Karikani B'aai 22 - Te B'aib'ara bible

Karikani B'aai 22

¹Ao i mwiin te tai ae aki maan, ao E a kataa Aberaam te Atua; ao E weteia ni kaangai, “Aberaam!” Ao e kaeka Aberaam, “Aio ngai!”

²Ao E taku te Atua, “Ko na anaa natim te mm'aane ae te rikitemanna ae ko rangi n tangiria are Itaaka, ao naako nakon te aba are Moria. Ao ko na anga b'a am karea nako iu i aon te maunga ae N na kaotia nakoim.”

³Ao n te karangaina are i mwiina, ao e korokoroi ana aia Aberaam i bukin te karea, e katokai i aon te aati, ao e kaira Itaaka ma uoman ana toro. Ao a m'ananga nakon te tabo are E a tia n tuangnga te Atua.

⁴Ao n aia katenibong ni m'ananga, ao e a ria te tabo arei.

⁵Ao e a taku Aberaam nakoia ana toro, “Kam na tiku ikai ma te aati, ao Ngai ma natiu aei ti na nako ikekei b'a ti na taromauri, ao i mwiina ti a manga okiringkami.”

⁶Ao e angan Itaaka taian aia i bukin te karea b'a e na uoti, ao ngaia e uota te biti ma te m'aakaro n ai i bukin kauraan te ai. Ao ngke a kaai n nakonako,

⁷Ao e taku Itaaka, “Tamau!” Ao e taku Aberaam, “Tera natiu?” Ao e titiraki Itaaka ao e taku, “E aera ngkai ti uouoti taian aia ma te ai, ao e nga te tiibu te teei i bukin te karea?”

⁸Ao e taku Aberaam, “E na boni katauraoa temanna te Atua i bukira.” Ao a uaia n airi n nakonako.

⁹Ao ngke a roko n te tabo are E tuangnga te Atua, ao e a karaoa te baonikarea Aberaam iai, ao e baairei taian aia i aona. E kabaea natina are Itaaka, ao e katokaa i aon te baonikarea i aon taian aia.

¹⁰Ao e anaa te biti b'a e nang tiringa natina iai.

¹¹Ma E weewete aneran te UEA mai karawa ao e taku, “Aberaam, Aberaam!” Ao e kaeka Aberaam, “Aio ngai.”

¹²Ao E taku te anera, “Ko na tai kaikoaka te ataei, ke ni karaoa te b'ai teuana nakoina. I ataia ngkai b'a ko bon ongotaeka iroun te Atua, b'a ko aki taua natim te mm'aane ae te rikitemanna mai Rouna.”

¹³Ao e taratara nako Aberaam, ao e noora te tiibu te teei ae bae korona n taiani m'aanga ni kai. E nako n anaia, ao e anga b'a ana karea ni kabuokaki n onea mwiin natina te mm'aane.

¹⁴Ao e arana te tabo arei Aberaam b'a “E karekea te UEA.” Ao a kaangai aomata ni boong aikai, “E na karekeaki i aon ana Maunga te UEA.”

¹⁵Ao E a manga wetea Aberaam te anera mai karawa te kauoua n tai ni kaangai,

¹⁶“N na karaoa te berita i bon irou, bon Ana taeka te UEA, N na boni kabatia kakab'aiakim. I bukina ngkai ko a tia n aki taua natim te mm'aane ae am rikitemanna nako iu,

¹⁷I berita b'a N na anganiko am kariki ae ai aron m'aitin itoin karawa, ke tanon aon te bike i mataniwiin taari. A na totokanikai kanoam i aoia aia kairiribai.

¹⁸Ane a na bubutiai botannaomata b'a N na kakab'aiaia n aron kakab'aiakiia am kariki-a na riki baikai i bukina ngke ko ongotaeka irou.”

¹⁹Ao e oki rikaaki Aberaam nakoia ana toro, ao a uaia n nako Beerateb'a, te tabo are e katei ana auti n rianna iai ngkoa Aberaam.

²⁰Ao i mwiin te tai ae aki maan, ao e ongo Aberaam b'a a tia tarina are Naora ma buuna are Nei Mireka ni karekeia natiia aika waniman

²¹Ana karimoa te mm'aane bon Uti, ao tarina Buti, Kemuera are taman Aram,

²²Keteta, Ato, Biretati, Iiteraba, ao Betuera,

²³are taman Nei Rebeka. Aikai nati mm'aane aika waniman ake natin Nei Mireka ma Naora, are tarin Aberaam.

²⁴E karikiia natina mm'aane Nei Reum'a are buun Naora ni kewe [38] aika; Teba, Kaam, Taati, ao Maaka.