Read Te B'aib'ara Karikani B'aai 24 Bible Online

Karikani B'aai 24 - Te B'aib'ara bible

Karikani B'aai 24

¹Ao e a rangi ni kara ngkai Aberaam, ao E a tia te Atua ni kakab'aiaa ni b'aai ni kabane ake e a tia ni karaoi.

²Ao e taku nakon ana toro are te kabanea n ikawai are Erietera, are boni ngaia are e tararuai ana b'ai Aberaam ni kabane, “Ko na anganai baim

³b'a I tangiria ni berita ma ngkoe n aran te UEA, ae Atuan karawa ma aonnaba, b'a ko na aki karekea buun natiu te mm'aane mai buakoia kaain Kanaan.

⁴Ma ko na okirikaaki nakon te aba are I bungiaki iai, ao ko na karekea iai buun natiu te mm'aane are Itaaka mai buakoia au utu.”

⁵Ma e manga taku te toro arei, “Ao tera ae N na karaoia ngkana e rawa n irai n nakomai te aine are I rineia b'a buun natim? Tao N na kaoka natim te mm'aane b'a e na okira te tabo are ko nako mai iai?”

⁶Ao e taku Aberaam, “Ko na bon aki kaoka natiu te mm'aane nako ikekei.”

⁷E anaai te UEA ae Atuan karawa mai abaia tamau ma au koraki, ao E berita nako iu b'a E na anga te aba aei nakoia kanoau. Ane E na bon kanakoa te anera i m'aaim b'a ko aonga ni kona ni karekea buun natiu te mm'aane.

⁸Ngkana tao arona b'a e aki kan iriko te ataeinaine, ao ko a b'ara man te berita aei. Ma ko na bon aki kaira natiu te mm'aane n okira ikekei.”

⁹Ao e anga baina te toro arei nakon ana toka are Aberaam, ao e berita b'a e na karaoi baike e tuangnga Aberaam ni kabane.

¹⁰Ao e anaa tengaun ana kamero Aberaam te toro are e tararuai ana b'ai Aberaam, ao e nakon te kaawa ae buubura are maeka iai ngkoa Naora are i Metobotamia meang.

¹¹Ao ngke e a roko, ao e kamotirawaia ana kamero i rarikin te m'anib'a are i tinanikun te kaawa are buubura arei. E a bon b'aka taai n te tai arei, ao bon te tai are a itiiti ran iai aine.

¹²Ao e tataro nakon te Atua ao e taku, “Te UEA, ae Atuan au toka are Aberaam, Ko na kakoroa bukin au waaki n te bong aei, ao kawakina am Berita nakon au toka.

¹³I a mena ngkai i rarikin te m'anib'a are a na roko iai aine n itiran.

¹⁴N na taetae nakon temanna mai buakoia ni kaangai, ‘Taiaoka, anganai am tiaeki n ran b'a N na mooi iai teutana.’ Ao ngkana e kaangai, ‘Moi, ao N na kamooia naba am kamero,’ ao tera ngke ngaia anne te aine ae Ko a tia n rineia i bukin am toro are Itaaka. Ngkana e riki aio, ao I ataia ngkanne b'a Ko bon kakoroa bukin am Berita ma au toka.”

¹⁵Ao i m'aain banen ana tataro, ao e roko Nei Rebeka ma ana konteina n ran i aon angana. Bon natin Betuera te aine ngaia, ao Betuera bon natin tarin Aberaam are Naora ma Nei Mireka.

¹⁶Bon te aine ngaia ae rangi n tamaroa, ao bon te ataeinaine naba ngaia. E nakon te m'anib'a ni kanoaa ana konteina n ran, ao e a manga oki.

¹⁷Ao e biri te toro arei nako ina ao e taku, “Taiaoka ma anganai te ran man am konteina b'a N na mooi iai teutana.”

¹⁸Ao e taku neierei, “Aei te ran, moi,” Ao e karuoa te konteina mai aon angana, ao e taua te konteina n ran ni kamooa iai Erietera.

¹⁹Ao ngke e a ngae teuarei, ao e taku neierei nakoina, “N na itiia naba nimaia am kamero ma ni kangaaeia raoi.”

²⁰Ao e kabaikoa ni kab'aroa nikiran kanoan ana kaonteina nakon nnen nimaia maan ni kamooia maan akekei, ao e a manga biri nakon te m'anib'a n itiia riki te ran, ni karokoa a bane ni ngae raoi taiani kamero akekei.

²¹Ao e taratara neirei Erietera ma te aki kakarongoa, b'a e karaua ni kakoaua raoi b'a bon ngaia arei te aine ae rineia te UEA ke tiaki.

²²Ao ngke a bane raoi ana m'akuri neierei, ao e anaa te m'am'a te koora ae bobuaka Erietera, ao e katinea i b'airina, [39] ao taian burenibai aika koora aika buubura i aon anganibaina.

²³Ao e taku, “Taiaoka, antai ngkoa aran tamam? E m'aawa ana auti ngkana I matu iai ma raou aikai nakon te tairiki?”

²⁴Ao e kaeka neierei, “Bon Betuera tamau are natin Naora ma Nei Mireka.

²⁵E m'aawa ara auti, ao a m'aiti naba kanaia maan i bukiia am man.”

²⁶Ao e katorobubua te mm'aane arei n taromauria te UEA.

²⁷Ao e taku, “E na neboaki te UEA, ae Atuan au toka are Aberaam, ae bon kakaonimaki ni kakoroa bukin ana Berita ma au toka. E a tia ni kairai raoi te UEA nakoia ana koraki au toka.”

²⁸Ao e birinako neierei nakon ana auti tinana, ao e karakin b'ai ni kabane.

²⁹Ao iai m'anen Nei Rebeka ae arana Raab'an, ao e biri n otinako nakon te m'anib'a, nakon te tabo are e mena iai ana toro Aberaam.

³⁰E noora te taabia ni b'airi i b'airin m'anena, ao te burenibai i aon anganibaina, ao e ongo naba ana taeka teuarei nakon m'anena. Ao e nakon ana toro Aberaam are e teitei i rarikiia ana kamero i rarikin te m'anib'a,

³¹ao e taku, “Nako mai, irai nakon te auti. Bon ngkoe te aomata ae kakab'aiaki iroun te UEA. E aera ngkai ko a teitei i tinaniku ikai? E rangi m'aawa au auti, ao iai naba nneia am kamero.”

³²Ma ngaia are, e a nako Erietera nakon te auti, ao e karuoi b'aai Raab'an mai aon taiani kamero, ao e kam'arakeia n taian uteute. Ao i mwiina, e a uota te ran nakon ana toro Aberaam ma raona b'a tebokan waeia.

³³Ao ngke a roko taian am'arake, ao e taku Erietera, “Bon iai moa te b'ai ae I kan taekinna i m'aain am'arakera.” Ao e taku Raab'an, “Ao waakina am rongorongo mai ikanne.”

³⁴Ao e taku, “Bon ana toro Aberaam ngai.

³⁵E a tia ni kakab'aiaa au toka are te UEA, ao E karikia b'a te aomata ae kaub'ai. E anganna ana nanai n tiibu, ana nanai ni kao, ana tirewa, ana koora, ana toro aika aine ma mm'aane, ana kamero, ao ana aati.

³⁶Ao e riki natin au toka te mm'aane iroun Nei Taara ngke e a bon kara Nei Taara are buuna, ao e a tia n anga ana b'ai ni kabane au toka nakon natina te mm'aane.

³⁷Ao e tuangai au toka b'a N na berita b'a N na bon ongotaeka nakon ana kaetieti. Ao e taku, ‘Ko na aki rinea buun natiu te mm'aane mai buakoia ataeinainen te aba ae Kanaan.

³⁸Ma ko na nako nakoia ana utu tamau, nakoia au koraki, ao kakaea buuna i buakoia.’

³⁹Ao I titirakina au toka ni kaangai, ‘Ao ngkana tao arona b'a e aki kan irai te aine are N na rineia?’

⁴⁰Ao ngaia e taku, ‘E na kanakoa Ana anera te Atua ae I ongotaeka i rouna b'a E na raoniko, ao e na kororaoi bukin ane ko m'ananga iai. Ko na karekea buun natiu te mm'aane mai buakoia au koraki, ao ana utu tamau.

⁴¹Bon ti teuana te kawai are ko na kona n inaomata iai mai aan te taeka ni berita aei, b'a ti ngkana ko kawariia au koraki ma a bon rawa iai, ao ngkanne ko a inaomata.’

⁴²“Ao ngke I a roko n te m'anib'a n te bong aei, ao I tataro ni kaangai, ‘Te UEA ae Atuan au toka are Aberaam, I butiko b'a Ko na kakoroa bukin te b'ai ae I waakinna.

⁴³Aio ngai ae I mena i rarikin te m'anib'a aei. Ngkana e roko te ataeinaine n itiran, ao N na bubutiia b'a e na anganai ana ran teutana man ana konteina n ran.

⁴⁴Ngkana arona b'a e kariaia, ao e anganiia naba au kamero te ran, ao boni ngaia anne te ataeinaine ae Ko rineia b'a buun natin au toka.’

⁴⁵Ao i m'aain banen au tataro, ao e roko Nei Rebeka ma ana konteina n ran i aon angana, ao e nakon te m'anib'a n itiia te ran. Ao I taku nako ina, ‘Taiaoka ma ko na anganai te mooi teutana.’

⁴⁶Ao e kawaekoa ni karuoa ana tiaeki n ran mai aon angana, ao e taku, ‘Mooi, ao N na anganiia naba am man te ran.’ Ma ngaia are, ‘I a mooi, ao e kamooia naba taian kamero n te ran.’

⁴⁷Ao I titirakinna ni kaangai, ‘Antai tamam?’ Ao ngaia e taku, ‘Boni Betuera tamau are natin Naora ma Nei Mireka.’ Ma ngaia are, ‘I a katinea te taabia ni b'airi i b'airina, ao taian burenibai i aoni baina.

⁴⁸Ao I katorobubua n taromauria te UEA, are Atuan au toka are Aberaam, are E a tia ni kairai raoi nakon ana koraki au toka, are I a kunea iai te nati te aine i bukin natina.

⁴⁹Ao ai anne ngkanne au rongorongo, ma e a nako imi b'a kam butim'aea nanon au toka ke kam aki. Taiaoka ma tuangai b'a I aonga n ataa ae N na karaoia i mwiina.’ ”

⁵⁰Ao a kaeka Raab'an ma Betuera ao a taku, “Ngkai e bon roko te baei mairoun te UEA, ao bon akea ara b'ai ni baireia.

⁵¹Bon aei Nei Rebeka, kam na airi ma ngaia. Kam na airi nako ma ngaia b'a buun natin ami toka, n aron are E a tia n taekinna te UEA.”

⁵²Ao ngke e ongo aei ana toro Aberaam, ao e bobaraaki n tataro nakon te UEA.

⁵³Ao e kaotinakoi ma n anga taian kunnikai ma tirewa, ao taiani koora aika tamaroa nakon Nei Rebeka. Ao e anga naba taiani b'aintangira aika bobuaka nakon m'anen Nei Rebeka ma tinana.

⁵⁴Ao i mwiin aei, ao a tib'a am'arake ma ni mooi ana toro Aberaam akekei, ao e tiku ikekei ni kangainaa. Ao ngke a uti ngke e a ingabong, ao e taku Erietera, “N nang nako n okira au toka.”

⁵⁵Ma a taku m'anen Nei Rebeka ma tinana, “Taiaoka ma e na tiku riki teutana neiei i rarikira i nanon teuana te wiiki, ke tebwina te bong, ao i mwiina, kam a airi nako naba ma ngaia.”

⁵⁶Ma e taku Erietera, “Kam na aki tauai. E a tia ni kakoroa bukin m'anangau te UEA; kam na kaokai nakon au toka.”

⁵⁷Ao a taku, “Ti na bon weteia n ongora i rouna b'a tera ana iango.”

⁵⁸Ao a wetea Nei Rebeka, ao a titirakinna ni kaangai, “Ko kan ira te mm'aane aei?” Ao e taku Nei Rebeka, “Eng.”

⁵⁹Ma ngaia are, a kanakoa Nei Rebeka ma aia toro are e a kara [40] b'a raona n iriia nako ana toro Aberaam ma mm'aane ake raona.

⁶⁰Ao a angan Nei Rebeka taeka ni kakab'aia aikai: “Ke ko riki ngkoe ae m'anera b'a tinaia mirion. Ke a taui aia kaawa aia kairiribai kanoam.”

⁶¹Ao i mwiin arei, ao a katauraoia Nei Rebeka ma ana ataeinaine, ao a toka i aon taian kamero b'a a nang nako ma ana toro Aberaam, ao a m'ananga nako.

⁶²E a tia n roko Itaaka n te rereua are [41] “Ana m'anib'a Temanna ae Maiu ae noorai,” ao e tiku ni maeka ni m'akoron Kanaan maiaki.

⁶³Ao e otinako n te b'akantaai teuana n nakonako i tinanikun te kaawa, ao e noori taiani kamero aika tabe n roko.

⁶⁴Ao Nei Rebeka, ngke e noora Itaaka, ao e ruorikaaki man ana kamero,

⁶⁵ao e titirakina ana toro Aberaam ni kaangai, “Antai teuare e tabe n nakomai arei?” Ao e kaeka te toro ni kaangai, “Bon au toka.” Ma ngaia are, e anaa te rabunanimata, [42] ao e rabuna matana iai.

⁶⁶Ao te toro arei, e tuanga Itaaka b'aai ni kabane ake a tia ni karaoi.

⁶⁷Ao e a kaira Nei Rebeka nakon te auti n rianna are e maeka iai ngkoa tinana are Nei Taara, ao e a riki b'a buuna. E rangi n tangira Nei Rebeka Itaaka, ao e a riki ni m'aninga iai nanokaawakina ni buan tinana.