Read Te B'aib'ara Karikani B'aai 27 Bible Online

Karikani B'aai 27 - Te B'aib'ara bible

Karikani B'aai 27

¹Ao e a rangi ni kara Itaaka, ao e a matakii, ao e kawaekoa natina are te karimoa are Etau, ao e taku nakoina, “Natiu!” Ao e kaeka natina, “Aio Ngai!”

²Ao e taku Itaaka, “Ko bon noorai ngkai b'a I a rangi ni kara, ao e a kaan mateu.

³I butiko b'a ko na anaa ngkai am kainikatebe ma am kanoa, ao naako karekea kanau te man.

⁴Kuukana teutana kanau are mamaten nanou, ao uotia mai nako iu. Ao ngkana I tia n am'arake iai, ao N na anganiko au kabanea ni kakab'aia i m'aain mateu.”

⁵Ao ngke e tabe n taetae Itaaka nakon Etau, ao e kakauongo neiere Nei Rebeka. Ma ngaia are, ngke e nako ni kaeman Etau,

⁶ao e taku nakon Iakob'a, “I a tib'a tia n ongora n ana taeka tamam nakon Etau, E taku,

⁷‘Uota mai te man, ao kuukanna b'a kanau, ao ngkana I tia n am'arake iai, ao N na kakab'aiako i matan te UEA i m'aain mateu.’

⁸Ma ngaia are ngkai, ko na karaoa ae N na tuangko natiu.

⁹Naako nakon te nanai ni man, ao uoti mai uoman taian kooti aika ataei aika marikarika, b'a I aonga ni kuukani ma ni karaoa mai iai te am'arake are rangi ni b'ab'arua tamam.

¹⁰Ao ko na uotia nakoina b'a e na am'arake iai, ao ane na anganiko ana taeka ni kakab'aia i m'aain matena.”

¹¹Ma e taku Iakob'a nakon tinana, “Ma kai e buraerae rab'atan Etau, ao ngai I katimaran.

¹²E na mena ngkoa b'a e riingai tamau, ao e a ataia ae i kekeweia, ao e a manga oneaki mwiin te kakab'aia nakon te maraia nako iu.”

¹³Ao e taku neiere tinana, “Ke a b'akarai taian kamaraia ake a na nako im; natiu ko na karaoa ae N na tuangko, ao naako anaa te kooti nako iu.”

¹⁴Ma ngaia are, e nako n anai ma ni uoti nako ina, ao e a kuukana te aekaki n am'arake are e b'ab'aruia tamana are Itaaka.

¹⁵Ao e anaa kunnikain Etau ake a rangi n tamaroa are e kakawakinna n te auti, ao e karinna i aon Iakob'a.

¹⁶Ao e kanim'a kunin te kooti i aon angana, ao i aon naba roroana n taabo ake a katimaran.

¹⁷Ao e a angan Iakob'a te am'arake are kangkang arei, n ikotaki naba ma te kariki are a tia ni kam'aia.

¹⁸Ao e a nako Iakob'a nakon tamana, ao e taku, “Tamau!” Ao e kaeka tamana, “Aio! Ao natiu ra aio?”

¹⁹Ao e taku Iakob'a, “Bon natim ngai are te karimoa, are Etau; I a tia ni karaoa te b'ai are ko taku. I a butiiko ma ko na karauko n tekateka b'a ko nang kana te iriko maiu aika I uoti aikai, b'a ko aonga ni kona n anganai am kakab'aia.”

²⁰Ao e taku Itaaka, “Natiu!” e aera ngkai ko a manga rangi ni baiti ni karekea?” Ao e taku Iakob'a, “B'a E buokai te UEA ae Atuam ni kakaea.”

²¹Ao e taku Itaaka nakon Iakob'a, “Taiaoka ma nako mai nako rarikiu n te aro ae I kona n riingko iai. Bon Etau ngkoe n te kakoaua?”

²²Ao e nako Iakob'a ni kaaniia tamana, ao e riingnga, ao e taku, “Ti te bo b'anaam ma b'anaan Iakob'a, ma baim bon aekakin bain Etau.”

²³E bon aki roko n te kinaa Iakob'a, i bukina ngke a buraerae baina kaanga Etau. Ao e nang tauraoi n anganna ana kakab'aia,

²⁴ao e a manga titirakinna riki, “Bon Etau raoi ngkoe?” Ao e taku, “Eng!”

²⁵Ao e taku Itaaka, “Uoti mai tabeua te iriko maiu. Ngkana I tia ni kanna, ao I a anganiko au kakab'aia.” Ao e a uoti taian am'arake Iakob'a nako ina, n ikotaki naba ma nimana te wain.

²⁶Ao i mwiina, e a taku tamana nako ina, “Nako mai nako rarikiu natiu, ao kaboria ma ngai.”

²⁷Ao ngke e roko ni kerake b'a e na kaboria ma ngaia, ao Itaaka, e aroka boin ana kunnikai, ma ngaia are, e a anganna ana kakab'aia. Ao e taku, “Ti te bo boin natiu te mm'aane ma boiararan te aba ae E a tia ni kakab'aiaa te UEA.

²⁸Ke E anganiko te Atua aoin karawa, ma ni uamaria abam. Ke E anganiko taian uanikai aika uangingi, ao wain aika moan te bati.

²⁹Ke a riki botannaomata nako b'a am toro, ao ke a bobaraaki aomata i matam. Ko na tautaeka i aoia am koraki ni kabane, ao ke a bobaraaki i matam kanoan tinam ni kabane. Ao ke a kamaraiaaki koraki ake a kamaraiako, ao koraki ake a kakab'aiako, a na kakab'aiaki.”

³⁰Ao e a bane ana kakab'aia Itaaka. Ao ngke e a bon tib'a nako Iakob'a, ao e a oki Etau ni kaeman.

³¹E a manga kuukana naba kanan tamana ae kangkang, ao e uotia nakon tamana, ao e taku, “Taiaoka tamau, ma tekateka raoi b'a ko nang am'arake n te iriko maiu aei, b'a ko aonga ni kona ni kakab'aiaai.”

³²Ao e taku Itaaka, “Antai ngkoe?” Ao e taku Etau, “Natim are te karimoa are Etau.”

³³Ao e ruru ma n nako nanon Itaaka, ao e taku, “Ao ai antai ae tiringa te man, ao e uotia nako iu ae I am'arake iai i m'aain rokom? Ao I a tia naba ni kabanea au taetae ni kakab'aia nakoina, ao e aki kona ni manga anaaki mai rouna.”

³⁴Ao ngke e ongo aei Etau, ao e tang n takaarua ma te rawaawata, ao e taku, “Ko na anganai naba te kakab'aia tamau.”

³⁵Ao e taku Itaaka, “E roko tarim, ao e keweai. E a tia n anaa kakab'aiaam.”

³⁶Ao e taku Etau, “Aio ana kauoua n tai n rawetokaai, maroaka, ae bon aranaki iai b'a Iakob'a. [49] E anaa tib'angau ni karimoa, ao ngkai e a manga anaa kakab'aiakiu. Bon akea riki nikiran am kakab'aia ae ko katikua i buku?”

³⁷Ao e taku Itaaka, “I a tia ni karikia b'a te toka i aom, ao I karikiia naba ana koraki ni kabane b'a ana toro. I anganna taian uaanikai aika uangingi, ao taian wain. Natiu, bon akea ae I kona ni karaoia i bukim.”

³⁸Ao e a manga bubutiia naba tamana Etau, ao e taku, “E koaua b'a bon ti teuana am kakab'aia tamau, kakab'aiaai naba tamau.” Ao e a tang.

³⁹Ao e a taku Itaaka nako ina, “Akea te aoi mai karawa i bukim, Akea te tawaana ae mari nakoim

⁴⁰Ko na maiu man am kabaang, Ao ko na riki b'a ana toro tarim. Ma ngkana ko kan inaomata mai rouna ao ko kona ni b'aranako mai aan ana kairiiri.”

⁴¹Ao e rangi n riba Iakob'a i bukina ngke e a tia n anganaki te kakab'aia iroun tamana. Ao e taku i nanona, “E a bon kan roko te tai are tanginiwenea iai tamau, ao ngkana e a mate, ao I a tiringa naba Iakob'a.”

⁴²Ma ngke e ongo ana babaaire Etau Nei Rebeka, ao e wetea Iakob'a, ao e taku, “Nooria, e a tia ni baaireia tarim are Etau b'a e na katokaa marakin nanona n tiringko.

⁴³Ma ngaia are, natiu, ko na karaoa ae N na tuangko. Ko na nakon m'aneu ae Raab'an i Aran

⁴⁴ao tiiku ikekei tabeua te tai, ni karokoa ae toki unin tarim

⁴⁵ao e a m'aninga am m'akuri ake ko a tia ni karaoi nako ina. Ao N na kanakoa temanna b'a e na kaokiko, b'a e aki koaua ngkana a nang bua natiu ni kauoman n te bong ae ti te bongina.”

⁴⁶Ao e taku Nei Rebeka, “Ti a rangi n aoraki irouia buun Etau aika i abatera. Ao ngkana e a manga iein Iakob'a ma temanna ainen Eta, ao I a boni mate naba.”