Read Te B'aib'ara Karikani B'aai 3 Bible Online

Karikani B'aai 3 - Te B'aib'ara bible

Karikani B'aai 3

¹Ao e rangi ni wanawana riki te naeta mai buakoia maan aika kawakawa aika E kariki te Atua. Ao E titiraki te naeta nakon te aine ni kaangai, “E tuangngkami te Atua b'a kam na aki kang uaani kaai man te nne n aroka?”

²Ao e kaeka te aine ni kaangai, “Ti kona ni kang uaani kaai nako n te nne n aroka,

³ma ti uaan te kai are i nuuka ae ti na aki kanna. E tuangiira te Atua b'a ti na aki kana uaana, ke n taua; ti na boni mate ngkana ti kanna.”

⁴Ao e kaeka te naeta ni kaangai, “Bon te kaairua anne; kam na bon aki mate

⁵b'a E ataia te Atua b'a ngkana kam kanna, ao kam na riki n ai arona, ao kam na ataa iai te raoiroi ma te buakaka; ao bon anne bukina are E katabua iai kanakina i roumi.”

⁶Ao e noora te kai arei te aine b'a e tamaroa taraana, ao e rangi n raoiroi uaana n te kanaki, ao e a anaaki riki nanona ngke e na wanawana iai. Ma ngaia are, e anai uaana ao e kang. Ao i mwiina, e a manga angan teuare buuna, ao e kanna naba teuarei.

⁷Ni bon te tai naba are a kanna iai, ao e a reke i rouia te wanawana, ao a tib'a ataia ae a bebeekan. Ma ngaia are, a itutui baan kaai aika biiku, ao a karabaniia iai.

⁸Ao ngke e moan tairiki i m'aain te roo, ao a ongongo m'akaikain waen te Atua ngke E nakonako i nanon te nne n aroka, ao a karabaia mai Rouna i buakon taian aroka.

⁹Ma E weewete te Atua ni wetea te mm'aane, ao E taku, “Ko mena ia?”

¹⁰Ao e taku teuarei, “I ongo m'akaikaim i nanon te nnenaroka, ao I maaku, ao I karabaai mai Roum i bukina ngke I bebeekan.”

¹¹Ao E titirakinna te Atua ni kaangai, “Antai ae e tuangko b'a ko bebeekan? Ko a tia ni kana uaan te kai are I tuangko b'a ko na aki kanna?”

¹²Ao e kaeka te mm'aane ni kaangai, “E anganai te uaanikai neiere Ko anganai b'a raou, ao I kanna.”

¹³Ao E a manga titirakina neierei te UEA ae te Atua ni kaangai, “E aera ngkai ko karaoa aei?” Ao e kaeka neierei ni kaangai, “E kam'aneai te naeta b'a N na kanna.”

¹⁴Ao E a manga taku te UEA ae te Atua nakon te naeta, “Ngkai ko a tia ni karaoa aei, ao n te tai aei, ao bon ti ngkoe ae ko na tekebuaka mai buakoia maan ni kabane. Ko na kawakawa i aon birotom, ao ko na kaakana bubun aontano i nanon am bong ni kabane.

¹⁵N na karika te i kairiribai i marenam ma neiei n aki toki, ao i marenaia naba kanoam ma kanoana. E na kamanatua atuum, ao ngkoe ko na tenai bukin waena.”

¹⁶Ao E a manga taku nakon neierei, “N na kabatiai am kaangaanga n am tai ni bikoukou, ao te maraki n am tai ni bungiia natim. Ao ane e na aki tootoki nanom iroun teuane buum, ao e na taua taekam.”

¹⁷Ao E a manga taku nakon teuarei, “Ao ngkoe ngkai ko ongo b'anaan buum ni kana naba te uaanikai are I a tia n tuangko b'a ko na aki kanna, ao ngkai, N na katekebuaka te tano. Ane ko na m'akuri korakora ni kabane bongin maium n riribanaa te tano i bukin karekean kanam.

¹⁸A na kaona am nne n aroka taian uteute ma kaai aika a kateketeke, ao ane ko na am'am'arake man arokan te tawaana, ae aroka aika te naa n rikinibeti.[7]

¹⁹A na reke kanam mani maonon ram'am ni karokoa manga okiran te tano are ko boni karaoaki mai iai. Ko karaoaki man te tano, ao ane ko na manga bon okira te tano.”

²⁰Ao e arana buuna Atam [8] b'a Ewa [9] i bukina ngke boni ngaia tinaia aomata ni kabane.

²¹Ao te UEA ae te Atua, E karaoa te kunnikai man kunin te man i bukin Atam ma buuna, ao E kunnikaiia iai.

²²Ao E taku te UEA ae te Atua, “A riki aomata aikai b'a katotongara, ao e a reke i rouia te wanawana n ataa te raoiroi ma te buakaka; a riai n aki manga kariaiakaki ni kana uaan te kai are e anga te maiu, b'a a na aki maiu n taai nako.”

²³Ma ngaia are, E kanakoia te UEA ae te Atua man te nne n aroka are Eten, ao E karaoia b'a taan ribanaa te tano are a boni karaoaki mai iai.

²⁴Ao i mwiina, i mainikun te nne n aroka E katikui baike a maiu aika iai baiia ni kiba ma te kabaang ae e uram'aaka i rouia, ao a uaatimaniia te tabo arei ni kabutaa n totokoia aomata ake a na kaaniia te kai are e anga te maiu.