Read Te B'aib'ara Karikani B'aai 30 Bible Online

Karikani B'aai 30 - Te B'aib'ara bible

Karikani B'aai 30

¹Ma bon akea natin Nei Rakera ma Iakob'a ae riki, ao Rakera e nanobwiia tarina, ao e taku nakon Iakob'a, “N na waekoa ni mate ngkana ko aki kakarekea natiu.”

²Ao e un Iakob'a iroun Nei Rakera ao e taku, “I aki kona ni karaoa ana m'akuri te Atua b'a boni Ngaia ae aki anganiko te aki kakariki.”

³Ao e taku neierei, “Ao aio au toro te aine ae Birea, ko na wene ma ngaia b'a e aonga ni kariki i buku. Ao e na reke ngkanne natiu mai rouna.”

⁴Ao e anga ana toro te aine nakon buuna, ao e wene teuarei ma te toro te aine arei.

⁵Ao e a bikoukou Nei Birea, ao e bungiia te nati te mm'aane.

⁶Ao e taku Nei Rakera, “E a tia ni baairea raoi taekau te Atua. E a tia n ongo au tataro, ao E anganai natiu te mm'aane.” Ma ngaia are, e aranna b'a Taan. [57]

⁷Ao e a manga bikoukou riki Nei Birea iroun Iakob'a, ao e a manga bungiia naba te mm'aane.

⁸Ao e taku Nei Rakera, “I a tia n un ma tariu n te un ae korakora, ao I tokanikai.” Ma ngaia are, e aranna b'a Nabetari.[58]

⁹Ao ngke e a ataia Nei Reea b'a e a toki kanoana, ao e a manga anga ana toro te aine are Nei Tireba nakon Iakob'a b'a buuna.

¹⁰Ao e a bungia riki te mm'aane Nei Tireba.

¹¹Ao e taku Nei Reea, “I a tia n tekeraoi.” Ma ngaia are, e aranna b'a Kaata. [59]

¹²Ao e a bungia riki natin Iakob'a te mm'aane Nei Tireba,

¹³ao e taku Nei Reea, “Ai kukurei ra ngai! Ae a nang aranai ngkai aine b'a Kukurei.” Ma ngaia are, e aranna b'a Atera. [60]

¹⁴Ao e nakon te tawaana Reuben n tain taian te uita, ao e kunei taian manrureke. Ao e taku Nei Rakera nakon Nei Reea, “Taiaoka, anganai tabeua ana manrureke [61] natim.”

¹⁵Ao e taku Nei Reea, “E tuai man toki nanom? Ko a tia ni uota nako buu, ao ngkai ko nangi manga anaa ana manrureke natiu?” Ao e taku Nei Rakera, “Ngkana ko anganai ana manrureke natim, ao ko na matu ma Iakob'a nakon te tairiki.”

¹⁶Ao ngke a oki Iakob'a man te tawaana ngke e a b'akataai, ao e a nako Nei Reea ni kawaria, ao e taku nakoina, “Ko na matu ma ngai nakon te tairiki, b'a I a tia ni kabooko n ana manrureke natiu.” Ma ngaia are, e a wene ma neierei ngke e a tairiki.

¹⁷E kaeka ana tataro Nei Reea te Atua, ao e a bikoukou, ao e a bungiia te nati te mm'aane ae te kaniman.

¹⁸Ao e taku Nei Reea, “E a tia n anganai kaniwangau te Atua, i bukina ngke I a tia n anga buu nakon au toro.” Ma ngaia are, e arana natina te mm'aane arei b'a Itaakara. [62]

¹⁹Ao e a manga bikoukou naba Nei Reea, ao e bungiia ana kaonoman n nati mm'aane ma Iakob'a.

²⁰Ao e taku, “E a tia n anganai te Atua te b'ai n tangira ae tamaroa. Ao ngkai e na m'annanoai buu b'a I a tia ni karekeia natina mm'aane aika onoman.” Ma ngaia are, e arana natina arei b'a Teburun. [63]

²¹Ao rimwi riki, ao e bungiia te nati te aine, ao e aranna b'a Nei Rina.

²²Ao E uringa Nei Rakera te Atua, ao E kaeka ana tataro, ao E a manga karaoia b'a e na kakariki.

²³Ao e bikoukou, ao e bungiia te nati te mm'aane. Ao e taku, “E a tia ni uotaanako kamamaaeau te Atua, b'a E anganai natiu te mm'aane.

²⁴E bia manga anganai riki natiu te mm'aane te UEA;” ao e arana natina arei b'a Ioteb'a. [64]

²⁵Ao i mwiin bungiakin Ioteb'a, ao e taku Iakob'a nakon Raab'an, “Ko nang kainaomataai, b'a I aonga n okira mwengau.[65]

²⁶Ko na anganai buu ma natiu aika I a tia ni karekei ni m'akuriu iroum b'a N nang nako. Ko bon ataa aron au m'akuri korakora iroum.”

²⁷Ao e taku Raab'an, “N na tuangko te b'ai teuana: I a tia n ataia ngkai b'a I kakab'aiaki iroun te UEA i bukim.

²⁸Tuangai m'aitin boom ae ko tangiria b'a N na anganiko.”

²⁹Ao e taku Iakob'a, “Ko bon ataa aron m'akuriu iroum, ma aron rikiraken am nanai ni man n au tararua.

³⁰Bon ti tabeua ngkoa i m'aain rokou, ao E a tia te UEA ni kakab'aiai b'aai ni kabane ake I a tia ni karaoi. Ao ngkai e a roko te tai are I a bon riai ni karikirakea arou iai i bon irou.”

³¹Ao e taku Raab'an, “Tera boom ae ko tangiria?” Ao e taku Iakob'a, “I aki tangiria ni kabooaki ma N na reitanako au m'akuri ni kaawakin am nanai ni man ngkana ko kariaia au iango aei:

³²Ti kaniwangau ae I tangiria mairoum, bon ti taian tiibu te teei ni kabane ake a roro buraeia, ao taian kooti te teei naba ni kabane ake a wantanta ni kirimatamata kuniia. [66]

³³Ao n te tai teuana, ko na manga tuoia, ao ngkana ko kunea te kooti ae e aki kirimatamata ni wantanta, ke te tiibu ae e aki roro buraena i buakoia au maan aika kawakawa, ao ko na ataia ngkanne b'a I iraeia am maan aika kawakawa.”

³⁴Ao e taku Raab'an, “I kariaia, ti na karaoa ane ko iangoia anne.”

³⁵Ao e kaokoroi taiani kooti Raab'an ake a wantanta ni kiriroroo, ma taian aine ni kabane ake kirimatamata ma ni kiriroroo, ke ake iai taian mainaina i aoia; ao e kanakoi naba taian tiibu roro ni kabane. Ao e katuka natina te mm'aane b'a e na tararuaia,

³⁶ao e nako ni kitana Iakob'a ma te nanai ni man ni kararoa n te raroa ae tenibong te nakonako iai. Ao e tiku Iakob'a ni kawakinia ana nanai ni man naba Raab'an ni kabane.

³⁷Ao e anai m'aangan taian aroka ake te babera ma te aramon, ao te bureen aika menaai, ao e kaakaari kuniia teutana ni kaota are e mainaina i aana, n te aro are a kakawaaki taraaia.

³⁸Ao e katikui taiani m'aanga aikai n aia aubunga ni mooi maan, b'a a aonga n noonoria maan ngkana a tabe ni mooi ao a bikoukou. [67]

³⁹Ma ngaia are, ngkana a bung taiani man i matan taiani m'anga aikai, ao a bungi natiia aika a kakawaaki, ni kirimatamata ma ni kiriroroo buraeia.

⁴⁰Ao e kakaokoroia tiibu aine Iakob'a mai buakoia tiibu ma kooti ake n ana nanai Raab'an. Ao ngkana a nang bung tiibu aine aikai, ao e kabungiia ni kaaitarai ana man Raab'an ake a kakawaaki ma n kiriroroo, ma ngaia are, a bungiia natiia aika wantanta ma ni kiriroroo naba. Ao e a rikirake m'aitin ana nanai n te aro anne. Ao e kaokoroi ma ana man Raab'an.

⁴¹Ao ngkana a iein maan aika maiuraoi rab'ataia, ao e katikui m'aangan kaai akekei Iakob'a i matan aia aubunga ni mooi, b'a aonga ni bung i buakon m'aangan kaai akekei.

⁴²Ma ngkana a iein maan aika nimamate rab'ataia, ao e aki katikui m'aangan kaai akekei i mataia. Ma ngaia are, a bane n reke i roun Raab'an maan aika kawakawa aika nimamate rab'ataia, ao a bane n reke iroun Iakob'a maan aika kawakawa aika marurung rab'ataia.

⁴³Ao e a rangi ni kaub'ai Iakob'a n te aro anne. A rangi ni m'aiti ana nanai ni man ma ana toro, ana kamero, ao ana aati.