Read Te B'aib'ara Karikani B'aai 31 Bible Online

Karikani B'aai 31 - Te B'aib'ara bible

Karikani B'aai 31

¹E ongo Iakob'a aia taeka natin Raab'an mm'aane ae e kaangai; “Iakob'a e anai ana b'ai ni kabane tamara. E karekei kaub'aina man ana b'ai tamara.”

²E nooria Iakob'a b'a e aki raoiroi aron Raab'an n aron are mai m'aaina.

³Ao E taku te UEA nako ina, “Naako okira aban tamam ma am koraki. N na bon memena i roum.”

⁴Ma ngaia are, e kanakoa ana taeka Iakob'a nakoia Nei Rakera ma Nei Reea b'a a na kawaria n te tawaana are a mena iai ana nanai ni man.

⁵Ao e taku nako ia, “I a tia n ataia b'a e a aki raoiroi tamami nako iu n aron are e boni kakaraoia ngkoa, ma E boni memena irou Atuan tamau.

⁶Kam boni kaai n ataia b'a I a tia ni m'akuri iroun tamami ni kabanea korakorau.

⁷Ao ngaia e a tia n aonikaiai ni manga bita boou tebwina te tai. Ma E kawakinai te Atua b'a N na aki ikoaki i rouna.

⁸Ngkana tao e kaangai, ‘Anai kooti aika wantanta b'a boom,’ ao a bane maan ni bungi buniia aika wantanta. Ao ngkana e kaangai, ‘Anai kooti aika kakawaaki b'a boom,’ ao a bane maan ni bungi natiia aika kakawaaki.

⁹E a tia te Atua n anai taian nanai mairoun tamami man anganai.

¹⁰“I a tia ni mii n aia tai maan ni bung, ao I nooriia iai kooti ake a iein b'a a kakawaaki, a kiriroroo, ao a matamata.

¹¹E taetae nako iu te UEA n te mii ao E taku, ‘Iakob'a!’ Ao I kaeka, ‘O,’

¹²ao E taku, ‘Nooria, a bane ni kakawaaki ma ni kiriroroo, ao ni matamata taiani kooti aine ake a iein. I karaoa aei i bukina b'a I noora te b'ai ae e karaoia Raab'an nako im.

¹³Bon Ngai te Atua are I kaoti nako im i Betaera, are te tabo are ko katea iai te atiibu b'a te kanuringa, ao ko katabua ni kab'aroa te b'a i aona, are ko karaoa iai am berita nako iu. Teirake ngkai, ao naako nakon te aba are ko bungiaki iai.”

¹⁴Ao a taku Nei Rakera ma Nei Reea nakon Iakob'a, “A boni bane n reke i roura tib'angara mairoun tamara, ao bon akea riki.

¹⁵E karaoira b'a kaanga ianena. E kabooira nako, ao ngkai e a tia ni kabanea te m'ane are boora. [68]

¹⁶B'aai ni kabane aika E a tia n anai te Atua mairoun tamara, a riki b'a ara b'ai, ao aia b'ai natira.”

¹⁷Ao e katauraoia Iakob'a n okira tamana n te aba are Kanaan. E katokaia natina ma buuna i aon taiani kamero,

¹⁸ao e karimoaia ana nanai ni man ri moana, n reitaki naba ma b'aai ni kabane ake a reke i rouna i Metobotamia.

¹⁹Ao e roko Nei Rakera i mwiin Raab'an ngke e nako ni koroburaei ana tiibu, ao e iraei bouan antin te utu are ana b'ai tamana. [69]

²⁰Ao e m'am'anaa Raab'an Iakob'a ngke e aki kaongoa nakona.

²¹E anai b'aai ni kabane ake bon ana b'ai, ao e kawaekoa n nako. E ri aon te karaanga are te Iuberetiti, ao e m'ananga ni kaineta te aba ae tabukibuki are Kireata.

²²Tenibong i mwiina, ao e a tuangaki Raab'an b'a e a tia ni birinako Iakob'a.

²³E kairiia raona tabeman, ao e kakioa Iakob'a i nanon itiua te bong ni karokoa a reke i rouna n te aba are tabukibuki i Kireata.

²⁴Ao E roko te UEA iroun Raab'an, ao E taku nakoina, “Ko na tarataraiko b'a ko na aki karaoa te m'akuri teuana ni karawawataa Iakob'a.”

²⁵Ao e a tia ni katea ana maeka Iakob'a i aon te maunga, ao e katea ana maeka Raab'an ma ana koraki i aban Kireata are tabukibuki.

²⁶Ao e taku Raab'an nakon Iakob'a, “E aera ngkai ko m'am'anaai, ao ko uotiinako natiu aine kaanga taian taenikai n te buaka?

²⁷E aera ngkai ko m'am'anaai, ko birinako ao ko aki tuangai? Ngke tao arona b'a ko tuangai anne, ao N na bon kanakoko ma te kukurei, ao te anene ma te katangitang n taian timbere, ao taian aabi.

²⁸Ko aki anganai naba au tai ni kiiti ni kabo ma tibuu, ao ni kiiti naba ni kabo ma natiu aine. Bon te m'akuri n nanobaba ae ko a tia ni karaoia.

²⁹I kona ni karaoa te m'akuri ae kamaamate nakoim, ma E kaoti Atuan tamam nako iu ngke tairiki, ao E kauringai b'a N na aki karaoa te m'akuri teuana ni karawawatako.

³⁰I ataia b'a ko a nako b'a ko a rangi ni kan nakon am auti, ma e aera ngkai ko iraei bouan antin te utu?”

³¹Ao e taku Iakob'a, “I maaku b'a I taku b'a ko na anaia natim aine mai rou.

³²Ma ngkana ko kunea bouan antin am utu iroun temanna mai buakora, ao ko na tiringnga. A na kakoaua n anne am koraki, ma ngaia ae, ko na kakaea am b'ai, ao anaia.” E aki ataia Iakob'a b'a bon Nei Rakera ae iraei bouan antin ana utu Raab'an.

³³Ao e nako Raab'an n tuoa ana auti n rianna Iakob'a, ao i mwiina, e a manga tuoa ana auti n rianna Nei Reea, ao manga aia auti n rianna tooro aine ake uoman,[70] ma e bon aki roko n te kunei bouan antin ana utu. Ao i mwiina, e a nako n tuoa ana auti n rianna Nei Rakera.

³⁴Ma e a kaman anai bouan antin ana utu Raab'an Nei Rakera ni kamenaki i aan kaintekatekan ana kamero, ao e a manga tekateka i aoia. Ao e kakaea Raab'an n ana auti n rianna Nei Rakera ni kabutaa, ma e bon aki roko n te kunei.

³⁵Ao e taku Nei Rakera nakon tamana, “Ko na tai marakinnanoai ngkana I aki roko i matam b'a I aki kona n teirake b'a I aoraki n aine.” E kua ni kakae Raab'an ma e bon aki roko n te reke bouan antin ana utu.

³⁶Ao e maraki nanon Iakob'a ao e taku, “Tera te kaairua ae I a tia ni karaoia? Tera te tua ae I a tia n urua are ko riki ni kakioai iai?

³⁷Ngkai ko a tia n tuoi au b'ai ni kabane, iai b'ain am auti ae ko kunea ae am b'ai? Ko na katikua i matara ikai, i mataia am aomata ma au aomata b'a a na nooria b'a antai ae bure iroura.

³⁸I a tia ni mena iroum i nanon uabwi te ririki; ao a bane ni bungi raoi natiia tiibu aine ma kooti aine, ao bon akea te tiibu mm'aane ae I a tia ni kanna mai buakoia am nanai.

³⁹E ngae ngkana e tiringaki am maan aika kawakawa irouia maan aika kawakawa aika moaanti,[71] ao I boni kabooa naba mwiina. I aki uotia nakoim i bukina ngke bon tiaki au bure. Ko bon tangira naba boona ae b'anin e ngae ngkana tao a iraeaki ni bon te ngaina ke te bong. [72]

⁴⁰I bakuraewa i aan kabuebuen taai n te ngaina, ao i aan te aoi n te bong. I aki mamatu raoi.

⁴¹Ao anne arou ngke I mena i nanoni baim i nanon uabwi te ririki. I a tia ni m'akuri i bukin karekeaia natim aine i nanon tebwi ma aua te ririki-ao onoua te ririki i bukin am nanai ni man. Ao tiaki ti ngaia ma ko bita naba boou tebwiina te tai.

⁴²Ngke tao arona b'a E aki mena i rou Atuan tamau ake Aberaam ao Itaaka, ao ko na boni kanakoai ma te akea. Ma E bon noori au kangaanga te Atua ma au m'akuri ake I a tia ni karaoi, ao ngke e tairiki, ao E tuangko arom aika a kaairua.”

⁴³Ao e taku Raab'an nakon Iakob'a, “Bon natiu aine aikai; ao bon tibuu natiia, ao nanai ni man aikai bon au nanai. Ni koauana, ao bon au b'ai ni kabane aika ko noori aikai. Ma ai bon akea ngkai te b'ai ae I kona ni karaoia nako ia natiu aine aikai ma tibuu aikai.

⁴⁴I a tauraoi ngkai ni karaoa te boraraoi i marenau ma ngkoe. Ti na ikoikoti atiibu ni karietatai b'a kauringaara nakon ara boraraoi.”

⁴⁵Ma ngaia are, ngke e reke ana atiibu Iakob'a, ao e a kateia b'a te kanuringa.

⁴⁶E tuangiia ana aomata b'a a na bobooti taiani m'akoro ni b'a ni kauataoirake. Ao i mwina, a am'arake ngke a tairiki i rarikin taian m'akoro ni b'a akekei.

⁴⁷Ao e arana te kanuringa arei Raab'an b'a Ieka-taaruta,[73] ao Iakob'a e aranna b'a Kareeta. [74]

⁴⁸Ao e taku Raab'an nakon Iakob'a, “A na riki atiibu aikai b'a taian b'ai ni kauring nakoira ni kauoman.” Ao bon anne bukina ngke e aranaki te tabo arei b'a Kareeta.

⁴⁹Ao e taku naba Raab'an, “Ke E tarataraira te UEA ngkana ti a raure nako.” Ma ngaia are, e aranaki naba te tabo arei b'a Mitib'a. [75]

⁵⁰Ao e reita nako ana taetae Raab'an ao e taku, “Ngkana ko karaoa ae aki riai nakoia natiu aine, ke ngkana ko a manga iein ma tabeman, e ngae ngke I aki ataia, ma ko na uringnga b'a E tarataraira te Atua.

⁵¹Ao aikai taian atibu aika I a tia ni kauataoi rake i marenau ma ngkoe, ao aio naba te atiibu ae te kanuringa.

⁵²A na riki b'ariko ni b'a aikai ma te atiibu aei b'a kakauringaara. N na bon aki ri aon te atiibu aei ni buakaniko, ao ko na aki ri aona naba, ke n ri aon te atiibu ni kanuringa aei ni buakanai.

⁵³E na motikitaeka i marenara Atuan Aberaam, ao Atuan Naora.” Ao i mwiina, e a kamatoa ana boraraoi Iakob'a ni berita n aran te Atua are e tataromauria tamana are Itaaka.

⁵⁴E tiringa te man, ao e anga b'a te karea i aon te maunga, ao e kaoiia ana aomata nakon ana baka n am'arake, ao a tiku ni kangainaa i aon te maunga.

⁵⁵Ngke e a moaningabong, ao e a kiiti ma tibuna Raab'an, ao e kiiti naba ni kabo ma natina aine, ao e a nako n okira ana auti.