Read Te B'aib'ara Karikani B'aai 32 Bible Online

Karikani B'aai 32 - Te B'aib'ara bible

Karikani B'aai 32

¹Ao ngke e tabe ni waaki Iakob'a i aon kawaina, ao e kaaitibo ma taian anera tabeman.

²Ao ngke e nooriia, ao e taku, “Bon aio ana maeka te Atua.” Ma ngaia are, e arana te tabo arei b'a Maanaim. [76]

³Ao e kanakoa ana tia uarongorongo Iakob'a ri moana nakon tarina are Etau n te aba are Etom.

⁴Ao e tuangnga ana taeka aika kaangai, “Bon Iakob'a ngai ae am toro are nako ni maeka ngkoa iroun Raab'an, ao e a tib'a oki n te tai aei.

⁵A m'aiti au nanai ni kao, ma au nanai n aati, ma au nanai n tiibu, ma au nanai ni kooti, ao au toro. I kanakoa au bubuti nakoim b'a ko na kab'ara au bure.”

⁶Ao ngke e a oki ana toro Iakob'a, ao e taku, “Ti kawara tarim are Etau, ao bon ae i aon kawaina ni kawariko. Ao bon iai abubua rorobuaka aika raonna.”

⁷Ao e maaku Iakob'a ma n raraoma. E bwenauaia ana aomata ake i rouna nakon uakoraki, ao ai uana naba ma ana nanai n tiibu, ma kooti, ma kaao, ao taian kamero.

⁸Ao e taku n ana iango, “Ngkana e roko Etau ni buakana te moani koraki, ao e na reke aia tai kaain te kauoua ni koraki ni birinako.”

⁹Ao e tataro Iakob'a ao e taku, “Atuan tibuu are Aberaam, ao Atuan tamau are Itaaka, ongora irou. Ko tuangai te UEA b'a N na nako n okira abau nakoia au koraki, ao Ko na kanakoraoi b'aai ni kabane i buku.

¹⁰Akea bonganan au m'akuri aika raoiroi ake I a tia ni karaoi ngai ae am toro. I ri aon ngkoa te Ioretan ti man te oko, ao ngkai I a oki ma au koraki aika uakoraki aikai, n ikotaki ma au nanai ni maan aika kawakawa.

¹¹Kamaiuai, I tataro nakoim i bukin tariu are Etau. I a maaku b'a e nang roko ni buakanai ma n tiringiira ni kabane, n reitaki naba ma aine ao ataei.

¹²Uringnga are Ko berita ngkoa b'a Ko na kanakoraoi b'aai ni kabane i buku ma n anganai au kariki aika m'aiti aika akea ae kona ni warekia, kaanga ai aron m'aitin tanon mataniwiin taari.”

¹³Ao ngke e a ngaina arei ikekei, ao e a rineia tabeman ana man aika kawakawa mai buakoia ana nanai ni maan aika kawakawa b'a ana b'aintangira nakon tarina are Etau:

¹⁴E anai 200 taian kooti aine, ao uangaun kooti mm'aane, 200 taian tiibu aine, ao uangaun kooti mm'aane,

¹⁵30 kamero aine ma natiia, angaun kao aine, ao tengaun kao mm'aane, ao uangaun aati aine, ao tengaun aati mm'aane.

¹⁶E a manga tib'atib'a ana nanai nakon kurubu aika kakaokoro, ao e karekea temanna ana toro i aon teuana te nanai b'a te tia tararuaia, ao e taku nakoia, “Naako rimoau, ao tai ikoti ami nanai, ma karekea te marena i marenan ami nanai nako, te nanaina i mwiin te nanaina.”

¹⁷Ao e wetea ana toro are na moan kanakoa, ao e taku, “Ngkana ko kaaitibo ma tariu are Etau ao ngkana e kaangai nakoim, Antai am toka? Ao ko na nakea? Ao antai ana nanai ni maan aika kawakawa akana a rimoam akanne?

¹⁸Ao ko na riai ni kaangai, Bon ana nanai ni man aika kawakawa am toro are Iakob'a. E karimoai aikai b'a a na b'aintangira nakon ana toka ae Etau. Iakob'a ane rimwi.”

¹⁹Ao e tuanga naba ana toro are te kauoman n aron arei, ao ai uana naba ma te kateniman, ao nakoia naba ni kabane ake a kairiia taian nanai: Ao anne ami taeka nakon Etau ngkana kam kaitibo ma ngaia.

²⁰Kam na kaangai, “Eng, bon ane rimwiira am toro are Iakob'a.” E iangoia Iakob'a b'a e na kamaraua nanon tarina n ana b'ai n tangira akekei, ao e na bae ni b'ara ana bure ngkana e kaaitibo ma ngaia.

²¹E karimoai ana b'ai n tangira akekei, ao e tiku ngaia ni kangainaa n te auti n rianna.

²²Ao e teirake Iakob'a n te tairiki naba anne, e anaia buuna ake uoman ma buuna ni kewe ake uoman, ao natina ake tengaun ma temanna, ao a ri aon te karaanga are Iaboka.

²³Ao ngke e a tia ni kanakoia i aon te karaanga, ao e a manga kanakoi ana b'ai ni kabane ri aon naba te karaanga,

²⁴ao ngaia e tiku n ti ngaia imwiia. Ao e roko te mm'aane temanna ni kaunrab'ata ma ngaia ni karokoa e kan ngaina.

²⁵Ao ngke e nooria te aomata arei b'a e aki tokanikai i aona, ao e orea rarikin Iakob'a, ao e tibanako riin bebeen Iakob'a.

²⁶Ao e taku te mm'aane arei nakon Iakob'a, “Kanakoai b'a e a ngaina.” Ao e taku Iakob'a, “N na bon aki kanakoko ni karokoa ko kakab'aiaai.”

²⁷Ao e taku teuarei, “Antai aram?” Ao e taku Iakob'a, “Bon Iakob'a arau.”

²⁸E taku teuarei, “Ko na aki manga aranaki b'a Iakob'a. Ko a tia ni kaunrab'ata ma te Atua ao taiani mm'aane, ao ko tokanikai; ma ngaia are, ko na aranaki b'a Iteraera.” [77]

²⁹Ao e taku Iakob'a, “Tuangai aram ngkai.” Ma e taku teuarei, “E aera ngkai ko tangiria n ataa arau?” Ao i mwiina, e kakab'aia Iakob'a.

³⁰Ao e taku Iakob'a, “I a bon tia n noora te Atua n itaramata raoi ma Ngaia, ao I boni maiu naba.” Ma ngaia are, e arana te tabo arei b'a Beniera. [78]

³¹Ao e a oti taai ngke e kiitana Beniera Iakob'a, ao e turatura i bukin tibanakon riin bebeena.

³²Ni karokoa naba boong aikai, ao tibun Iteraera a bon aki kaakana te iriko are i aan toman te beebee, i bukina ngke e oreaki beebeen Iakob'a.