Read Te B'aib'ara Karikani B'aai 40 Bible Online

Karikani B'aai 40 - Te B'aib'ara bible

Karikani B'aai 40

¹Ao a reke aia bure iroun te uea,[95] te tia touatina niman te uea te wain, ao te tia karao kariki naba iroun te uea.

²Ao e un te uea irouia ana aobitia aika uoman aikai

³ao e a kariniia n te karabuuti n ana auti mataniwiia taani kaawakiniia buure, ni bon te tabo naba are e kaawakinaki iai Ioteb'a.

⁴A tiku ni maan n te karabuuti, ao e rinea Ioteb'a te tia tararua te karabuuti b'a kaanga aia toro.

⁵Ao n te tairiki teuana n te karabuuti, ao e a mii teuare te tia uouota niman te uea te wain, ao e mii naba teuare te tia kariki

⁶Ao ngke e roko Ioteb'a irouia n te ingabong are imwina, ao e nooriia b'a a mata n rawaawata.

⁷Ao e titirakiniia, “E aera ngkai kam mata n rawaawata n te bong aei?”

⁸Ao a taku, “Ti kaai ni mii ni kauoman, ao bon akea temanna mai ikai ae kona ni kab'arai nanon miira.” Ao e taku Ioteb'a, “Bon te Atua ae angaanga te kona ni kab'ara mii. Karakina miimi nako iu.”

⁹Ao e taku teuare te tia uota niman te uea te wain, “I miia te kai ae te kureebe ae tei i matau

¹⁰ao iai m'angana aika tennai. Ao ngke a tib'a tiinako baana, ao a tiinako naba ueena, ao taian uaa aika a tai.

¹¹Ao I tabe n taua ana m'angko te uea, ma ngaia are, I koona te kureebe nakon ana m'angko ao I anganna.”

¹²Ao e taku Ioteb'a, “Aio nanon miim: m'angana akana tennai bon boong aika tenibong.

¹³Ai ti tenibong, ao e na kab'arako te uea, e na kainaomatako man te karabuuti ma ni manga kateirakeko nakon am m'akuri. Ko na manga anganganna ana m'angko n aroarom ngkoa ni kawai nakoina ngke ana tia uouota ana m'angko ngkoe.

¹⁴Ma I butiiko b'a ko a uringai ngkana a bane n nako raoi b'aai ni kabane i bukim. Ko a taiaoka n tataekinai nakon te uea ma ni buokai ni kaotinakoai man te karabuuti aei.

¹⁵B'a bon te aomata ngai ae I iraeaki mai abaia Ebera, ao tiaki ti ngaia ma bon akea naba te b'ai ae bure ae I a tia ni karaoia are I riai ni kabureaki iai.”

¹⁶Ao ngke e nooria te tia kariki b'a e kakukurei nanon miin te tia uouota niman te uea, ao e taku nakon Ioteb'a, “Ao miiu ngai: I tabe ni uouoti tenua taian b'aene i aon atuu.

¹⁷Kanoan te b'aene are te kabanea mai eta, a bane iai aekakin kariki aika raoiroi i nanona i bukin te uea, ao a kanaki ni kabane irouia taian mannikiba.”

¹⁸Ao e taku Ioteb'a, “Ao aio nanon miim: B'aene akana tenua bon boong aika tenibong.

¹⁹Ai ti tenibong mangkai, ao e na kab'arako te uea--ao ane e na korea roroam te uea, ao i mwiina e na katinetinea rab'atam i aon te boua, ao ane a na kana rab'atam taian mannikiba.”

²⁰Ao ngke e a roko ana koro n ririki te uea are B'arao, ao e a karaoa ana baka n am'arake te uea ma ana aobitia ni kabane, ao e kainaomataia ana tia uouota nimana te wain ma ana tia kariki, ao e uotiia nako mataia ana aobitia.

²¹Ao e a manga kaoka ana tia uouota nimana nakon nakoana nikawai,

²²ao e tiringa ana tia karao kariki n aron are e bon taekinna Ioteb'a.

²³Ma e aki roko n te uringa Ioteb'a te tia uouota ana wain te uea-e rangi ni m'aninga taekana.