Read Te B'aib'ara Karikani B'aai 41 Bible Online

Karikani B'aai 41 - Te B'aib'ara bible

Karikani B'aai 41

¹Ao i mwiin uoua te ririki, ao e a mii uean Aikubita b'a e tei i etan te karaanga are te Naire,

²ao e nooria itiman kao aika marikarika man tararaoi rab'ataia aika a otinako man te karaanga ao a am'arake n taian uteute.

³Ao a manga otirake itiman naba taian kao aika a bakitaia n rii ni kangenge. A roko n tei i rarikiia ake i mataniwiin te karaanga,

⁴ao a kang taiani kao ake a marikarika. Ao i mwiina, e a uti naba te uea man matuuna.

⁵Ao e a manga matu riki, ao e a manga mii naba. E miia itiua te amwi ni uita aika kakanoa raoi ma n tai raoi, aika uaan te uita ae ti te oina.

⁶Ao a manga raure riki itiua naba taian amwi ni uita aika irariki aika a rai n angin te rereua,

⁷ao taian amwi ni uita akekei, a manga kab'auti taian amwi ni uita ake a kakanoa raoi ma n tai raoi. Ao e a uti te uea, ao e a ataia b'a ngaia bon te mii.

⁸Ao e a raraoma ngke a ingabong, ao e a weteia taan tabunea ni kabane ao mm'aane naba ni kabane aika taan rabakau i aon Aikubita. E tuangiia miina, ma bon akea temanna ae kona ni kab'ara nanon miina nako ina.

⁹Ao e a taku te tia uouota ana wain te uea nakon te uea, “N nang bon kab'ara moa au bure b'a I bon riai ni kaman kaongoko.

¹⁰Ko un ngkoa irou ma te tia kariki, ao ko karabutiniira n ana auti mataniwiia taan tararuaia buure.

¹¹Ao ti kaai ni mii n te tairiki teuana, ao a kakaokoro nanon miira.

¹²E mena naba ikekei temanna kaain Ebera ae ana toro te mataniwi irouia taan tararuaia buure. Ti karakina miira nakoina, ao e kab'arai nanon miira nakoira.

¹³Ao a koro bukin b'aai ake e tuangiira: I a manga okira nakoau ngai, ao ko tiringa teuare te tia kariki.

¹⁴Ao e kananako wetean Ioteb'a te uea, ao e kawaekoaaki n anaaki man te karabuuti. Ao e a koreaki moa buaina ma n oneaki kunnikaina, ao i mwiina, e a tib'a uotaki nako matan te uea.

¹⁵Ao e taku te uea nako ina, “I a tia ni mii, ao bon akea temanna ae kona ni kab'ara nanona. Ao I kaongoaki b'a ko kona ni kab'ara nanon taiani mii.”

¹⁶Ao e taku, “Te uea, I aki kona ni kab'ara mii, ma E na anga nanon miim te Atua.”

¹⁷Ao e taku te uea, “I mii b'a I teitei i etan te karaanga are te Naire,

¹⁸ao a otinako man te karaanga taian kao aika itiman aika marikarika ma n raoiroi rab'ataia, ao a am'arake n taian uteute.

¹⁹Ao a manga otinako naba itiman riki taiani kao aika irariki n ri ni kangenge. Bon taiani kabanea ni kananoanga mai buakoia kaao aika I a tia n nonori i aon Aikubita.

²⁰Ao kaao ake a irariki, a manga kang taiani kao ake a marikarika,

²¹ma e aki ataaki ae a tia ni kang akekei b'a bon ti te bo naba ma taraaia ni kawai are a bon rangi ni bakitaia naba. Ao i mwiina, ao I a uti.

²²Ao I miia naba taian amwi ni uita aika itiua aika kakanoa ma n tai raoi n te uita ae ti te oina.

²³Ao a manga riki taian uita naba aika itiua, aika irariki, aika rai n angin te rereua,

²⁴ao taian uita ake a irariki a manga kab'auti uita ake a kaakanoa raoi. I a tia n tuangiia taan tabunea, ma bon akea mai buakoia ae kona ni kab'ara nanona nako iu.”

²⁵Ao e taku Ioteb'a nakon te uea, “Bon ti te bo nanon mii akana uoua akanne; E na bon tuangko te Atua te b'ai ae E nang karaoia.

²⁶Kao ake itiman ake a marikarika bon ririki aika itiua, ao amwi ni uita naba ake itiua bon ririki naba aika itiua; bon ti te bo nanoia.

²⁷Ao taian kao ake a irariki ake a tib'a roko, ao taian amwi ni uita ake itiua ake a rai n angin te rereua bon ririkin te rongo aika itiua.

²⁸Boni ngaia are I a tia n tuangko-E a tia n tuangko te Atua te b'ai ae nang karaoia.

²⁹A na roko itiua ririkin te mari i aon aban Aikubita ni kabutaa.

³⁰Ao i mwiin anne, ao e na manga roko ririkin te rongo aika itiririki, ao ane a na mauna nako kukureia aomata, i bukin kamamaten te rongo i aon te aba.

³¹A na bon akea nikiran kanoan ririki ake a mari i bukin korakoran te rongo n ririki ake i mwiina.

³²Okiokin miim bon kaotana b'a E a tia te Atua ni kamatoa b'a E na karokoa n te tai ae aki maan n taai aika i m'aaira.

³³“Ma ngaia ae ko riai ngkai n rineia mm'aane tabeman aika rabakau ma n atatai b'a a na tararua aon te aba.

³⁴Ko riai naba n rineia taian aobitia tabeman ake a na taia kanima m'akoron uaan aon te aba i nanon itiua te ririki ni mari.

³⁵Tuangiia b'a a na taia te am'arake i nanon itiua ririki ni mari aika na roko, ao anganiia te mwioko b'a a na kaawakin taian uita i nanon te kaawa ma n tararuaia.

³⁶A na riki am'arake akanne b'a am'arake i nanon ririki n rongo ake itiua ake a nang roko i aon Aikubita. Ao a na aki mate aomata n te aro anne.”

³⁷Ao a kariaia te iango anne te uea ma ana aobitia,

³⁸ao e taku nakoia, “Bon akea riki te aomata ae e raoiroi ae ti kona ni kunea i rarikin Ioteb'a, te aomata ae e mena Tamnein te Atua i rouna.”

³⁹Ao e taku te uea nakon Ioteb'a, “E a tia ni kaoti b'aai aikai ni kabane te Atua nakoim. Ma ngaia are, e bon teretere raoi b'a e bon raka riki rabakaum ma am atatai i aoia aomata nako.

⁴⁰N na rineiko b'a ko na tararua abau ni kabane, ao a na bane aomata n ongotaeka nakon am taeka. Ko na riki b'a au kauoman.

⁴¹I a rineiko n te tai aio b'a te kowana ngkoe i aon Aikubita ni kabane.”

⁴²Ao e buuta ana m'am'a te uea mai baina, te m'am'a are e mena i aona ana kanikina te uea, ao e karinna i aon bain Ioteb'a. Ao e karina naba te kunnikai ae tamaroa i aon Ioteb'a, ao e karina te m'ae te tiein ae te koora i aon roroana.

⁴³Ao e anganna te kauoua ni ka ni uea are katikitikaki irouia aoti b'a baona, ao e ririmoana te tia kawakinna n tatakarua ni kaangai, “Kam'awa te kawai. Kam'awa te kawai.” Ma ngaia are, e a rineaki Ioteb'a b'a te kowana i aon Aikubita ni kabutaa.

⁴⁴Ao e taku te uea nakoina, “Bon te uea ngai-bon akea temanna ae e na tabeka baina ke waena ngkana akea kariaiakana.”

⁴⁵Ao e angan Ioteb'a te ara n Aikubita ae Tabenata-b'anea, ao e anganna naba buuna ae Nei Atenata, natin Botibera te aine bon te ibonga n te kaawa ae buubura are Erioboriti.[96] Ao e m'am'ananga Ioteb'a i aon Aikubita ni kabutaa.

⁴⁶Tenibwi ana ririki Ioteb'a ngke e kamataniwiaki iroun te uea, ao e mwiokoia te uea n taabo nako

⁴⁷Ao e kariki uaanikai aika m'aiti aon te aba i nanon ririki ake itiua,

⁴⁸ao e bane n rikoi Ioteb'a ni kaawakin i nanon te kaawa are buubura. E kaona te kaawa teuana ma teuana ni uaan taian tawaana ake a bon mena i rarikiia nako.

⁴⁹Ao e a katoka warekan te am'arake Ioteb'a ake e kaawakin b'a e a rangi n ri aon ae riai-ai aron m'aitin tanon taari.

⁵⁰Ao a riki natin Ioteb'a ma Nei Atenata aika uoman mm'aane i m'aain rokon te rongo.

⁵¹Ao e taku, “E a tia te Atua ni karaoai b'a N na m'anuokin rawaawatau ma ni katoka ururingaia ana utu tamau ni kabane.” Ma ngaia are, e arana ana karimoa te mm'aane b'a Manate.

⁵²Ao e taku naba, “E a tia n anganai natiu te Atua n te aba ae I rawaawata iai;” ma ngaia are, e arana natina te mm'aane are te kauoman b'a Eberaim.

⁵³Ao akea b'a e a roko n tokina bongin ririkin te mari ake a tia ni kukurei iai kaain te aba are Aikubita,

⁵⁴ao e a moanaki ririkin te rongo, n aron ana taeka Ioteb'a. A taonaki naba aaba ake i rarikin Aikubita n te rongo, ma e a rangi n tiraua te am'arake i Aikubita ni kabutaa.

⁵⁵Ngkana a taonaki kaain Aikubita n te baki, ao a tang nakon te uea, ao te uea e tuangiia b'a a na kawara Ioteb'a ma ni karaoa te b'ai are e tuangiia.

⁵⁶Ao e rikirake korakoran te rongo ni kabutaa aon te aba arei ni kabutaa, ma ngaia are, e a kauki taian auti ake a kaawakinaki iai taian am'arake ma ni kabooi nako taian uita nakoia aomatan Aikubita.

⁵⁷Ao a roko aomata nako man te aonnaba ni kabutaa nako Aikubita ni kabooa te uita mairoun Ioteb'a, b'a e a rangi korakora te rongo n taabo nako.