Read Te B'aib'ara Karikani B'aai 42 Bible Online

Karikani B'aai 42 - Te B'aib'ara bible

Karikani B'aai 42

¹Ao ngke e ataia Iakob'a b'a e m'aiti te uita i Aikubita, ao e taku nakoia natina mm'aane, “Kam ti a bon aorioringkami?

²I ongo b'a e m'aiti te uita i Aikubita, kam na nako ni kabooi karara tabeua ikekei b'a ti aonga n aki mate ni baki.”

³Ma ngaia are, a m'ananga ai tarin Ioteb'a ake tengaun ni kabooa te uita i Aikubita,

⁴ma e aki kam'ananga tarin raoi Ioteb'a are Beniamin Iakob'a ma ngaiia, b'a e kaawa ni manga riki naba te kangaanga nakoina.

⁵Ao a m'ananga natin Iakob'a ma raoia tabeman ni kabo uita i Aikubita, i bukina b'a e a rangi ni korakora te rongo i aon Kanaan.

⁶Ao e kakabonakoi taian uita Ioteb'a are te kowana i Aikubita nakoia aomata ni kabane ake a roko man taabo nako n te aonnaba. Ma ngaia are, a roko naba tarina akekei, ao a bobaraaki i matana nako aontano.

⁷Ao ngke e nooria tarina Ioteb'a, ao e kinaia, ma e bakan aki kinaia. Ao e titirakiniia n te b'ana ae matoa, ao e taku, “Kam nako mai ia?” Ao a taku, “Ti roko mai Kanaan b'a ti na kabooi karara.”

⁸Ao e kinaia tarina Ioteb'a, ma a aki kinaa Ioteb'a ngaiia.

⁹Ao e uringa miina ake e mii ngkoa, ao e taku nakoia, “Bon taan tutuo ni karaba ngkami; kam roko ngkai b'a kam na tuoa abau ni kakaea mamaarana.”

¹⁰Ao a taku, “Tiaki ngaia anne teuae ko karineaki, ti roko b'a am toro ngaira b'a ti na kabooi karara.

¹¹Bon taari ngaira ni kabane. Bon tiaki taan tutuo ni karaba ngaira. Bon aomata ngaira aika ti raoiroi.”

¹²Ao e taku Ioteb'a nakoia, “Kam kewe, ma kam roko n tuoa mamaaran abau.”

¹³Ao a taku, “Bon taari ngaira aika tengaun ma uoman m'aitira ni kabane, bon ti temanna tamara n te aba are Kanaan. E a tia ni mate tarira are temanna, ao tarira are te bina are tiku iroun tamara.”

¹⁴Ao e taku Ioteb'a, “Ngaia are I taku, bon taan tutuo ni karaba ngkami,

¹⁵ao N na tuoi ngkami n te aro aei. I berita n aran te uea b'a N na bon aki kanakoi ngkami ni karokoa e roko ikai tarimi ane te bina.

¹⁶E na nako temanna n anaia, ao a na tiku nikirana ni kaawakinaki ni karokoa reken raoi te koaua n aron ami taeka. I taku b'a I bon aki nano uoua b'a bon taan tutuo ni karaba ngkami.”

¹⁷Ao e a kainiia n te karabuuti i nanon tenibong.

¹⁸Ao e taku Ioteb'a nakoia n te katenibong, “Bon te aomata ngai ae I mamaaka te Atua, ao ti teuana te anga are N na kona ni kamaiu ngkami iai.

¹⁹E na tiku temanna mai buakomi n te tabo are kam kainaki ngkoa iai b'a kakoauaan ae aomata ngkami aika kam raoiroi, ao nikirana ana bane n oki rikaaki ni uoti rikaaki taian uita nakoia ami utu ake a bora ni baki.

²⁰Ao i mwiina, kam na uota mai tarimi are uarereke nako iu. Ao N na kakoaua iai b'a kam bon koaua n aron ami taeka nako iu, ao N na aki tiringingkami iai.” Ao a kukurei iai

²¹ao a taku i bon irouia, “Eng, ngkai e a bon roko mwiin ara m'akuri are ti a tia ni karaoia nakon tarira, ti bon noora kainanona ae korakora ngke e bubuti buokana, ma ti bon aki kan ongo. Ao bon anne bukina ngkai ti a reke n te kangaanga ae korakora n te tai aei.”

²²Ao e taku Reuben, “I bon tuangngkami ngkoa b'a kam na aki tiringnga, ao ngkai ti a katuaaeaki i bukin matena.”

²³Ao e atai baike a taekin Ioteb'a, ma a bon aki roko n te kinaa Ioteb'a, i bukina ngke bon iai are e kab'ara taeka i marenaia.

²⁴Ao e kiitaniia Ioteb'a ni kam'awaia, ao e tang. Ao ngke a toki angin tangina, ao e a manga okiria ni manga taetae nakoia, e katebenakoa Timeon mai buakoia, ao e kabaea i mataia.

²⁵Ao e anga ana taeka Ioteb'a b'a a na kanoaaki aia baeki tarina akekei n te uita, ao a na kaokaki aia m'ane [97] n tatabemaniia nako i nanon aia baeki, ao n anganaki naba kanaia ae tau i bukin m'anangaia. Ao e karaoaki arei nakoia.

²⁶Ao a katokai aia baeki ake a tia ni kabooi taari akekei i aon aia aati, ao a nako.

²⁷Ao ngke a tiku n te tabo teuana b'a e a taoniia te bong, ao e a kauka ana baeki teuare temanna b'a e na kam'arakeia ana aati, ao e a manga kunea ana m'ane mai matan ana baeki.

²⁸Ao e taku nakoia tarina ake tabeman, “E a manga kaokaki au m'ane nako iu, nooria e bon mena i nanon au baeki.” Ao a ruru ni maaku ngke a aitara mata i bon irouia, ao a taku, “Tera ae karaoia te Atua nakoira?”

²⁹Ao ngke a roko i Kanaan iroun tamaia are Iakob'a, ao a karakin b'aai ni kabane ake a tia n riki nakoia, ao a taku,

³⁰“E taetae n un te kowana nako ira ni bukiniira b'a taan tutuo ni karaba ngaira b'a ti na tuoa abana ni kabane.

³¹Ao ti taku, Bon tiaki taan tib'aai ngaira, ma bon aomata ngaira aika ti raoiroi.

³²Bon taari ngaira aika tengaun ma uoman, ao ti temanna tamara. E a tian ni mate tarira are temanna, ao tarira are te bina are e tiku i Kanaan ma tamana.”

³³Ao e taku teuarei, “Ao aio aron ae N na kakoauai iai ngkami b'a bon aomata ngkami aika kam raoiroi: E na tiku temanna ma ngai, ao nikirana ana anai taian uita ma ni uoti nakoia aia utu ake a bora ni baki.

³⁴Ao kam na manga uotaamai tarimi are uarereke nako iu. Ao N na ataia ngkanne b'a ngaia bon tiaki taian tib'aai ngkami, ma aomata ngkami aika kam raoiroi; Ao N na manga angani ngkami tarimi, ao kam na kona n tiku ikai ni karaoa ami kabob'ai.”

³⁵Ao i mwiina, ngke a kanakoi kanoan aia baeki, ao a bane ni kunei aia m'ane i nanon aia baeki, ao ngke a noori aia m'ane, ao a maaku ngaiia ma tamaia are Iakob'a.

³⁶Ao e taku teuare tamaia nakoia, “Kam bon tangiria b'a a na bane n akea natiu? E a bua Ioteb'a; E a bua naba Timeon, ao ngkai kam a manga tangira naba Beniamin. I a bon rangi ni maraki.”

³⁷Ao e taku Reuben nakon tamana, “Ngkana ti aki kaoka Beniamin nakoim, ao ko kona n tiringiia natiu mm'aane ake uoman. Anganai taekan Beniamin b'a N na kaawakinna, ao N na kaokia nakoim.”

³⁸Ma e taku Iakob'a, “E aki kona n iriko natiu te mm'aane; b'a e a tia ni mate tarina, ao ai bon tii ngaia ngkai.[98] E kaawa ni manga riki te b'ai teuana nakoina i aon te kawai, ao I a bon rangi ni kara, ao ane N na waekoa ni mate iai.”