Read Te B'aib'ara Karikani B'aai 43 Bible Online

Karikani B'aai 43 - Te B'aib'ara bible

Karikani B'aai 43

¹Ao e a rangi ni korakora te rongo i aon Kanaan,

²ao ngke a bane kanaia ana utu Iakob'a ake a kabooi i Aikubita, ao e a taku Iakob'a nako ia natina mm'aane, “Kam na manga nako n okira Aikubita ni kabooa karara teutana.”

³Ao e taku Iuta nako ina, “E matoa b'anaan te aomata arei b'a ti na bon aki manga roko i matana ngkana ti aki kaira tarira.

⁴Ngkana ko kukurei b'a ti na kaira tarira, ao ti a tib'a kona n nako ni kabooa te am'arake i bukim.

⁵Ao ngkana ko aki kukurei iai, ao ti na aki nako, b'a e taku te aomata arei b'a ti na bon aki kaoti i matana ngkana e aki iriira tarira.”

⁶Ao e taku Iakob'a, “E aera ngke kam a manga tuanga teuarei b'a iai riki tarimi temanna? Kam bon karekea te kangaanga ae ab'ab'aki nako iu.”

⁷Ao a taku, “B'a e rangi n titirakiniira te aomata arei i bukiia ara utu. E titirakiniira naba i bukin tamara b'a e maiu ke e aki, ao e titirakiniira naba b'a iai riki tarira ke akea, ao ti bon riai ni kaekai taian titiraki akanne, ao ti aki ataia b'a ngaia e nang tuangiira tarira b'a ti na kairiia.”

⁸Ao e taku Iuta nakon tamana, “Mwiokoai iroun te ataei, b'a ti aonga ni waekoa n nako, b'a ti a kaawa ni mate ni baki.

⁹I berita b'a N na bon kaokia raoi nako im, ao ngkana I aki, ao ko na bon karekea kaiu n taai nako.

¹⁰Ngkana tao arona b'a ko bon aki tuukira mai m'aaina, ao tao ai uaoki ngkai okira mai ikekei.”

¹¹Ao e taku tamaia nako ia, “Ngkana ai ngaia anne arona, ao kam na uoti b'aai aika a rangi n raoiroi mai abara i nanon ami baeki b'a ami b'ai n tangira nakon te kowana, aia karewe manibeeru, renganan taian am'arake, taiani koraa aika kakanaki ake te naani bititakio, ao ai te naan amon. [99]

¹²Bon uouoti naba ami m'ane aika rawata, b'a kam na kaoki taiani m'ane ake a mena i matan ami baeki ngkoa. E na mena ngkoa ao boni kaairuan te m'akuri.

¹³Kaira tarimi ao kawaekoai ngkami n nako.

¹⁴E bia karika te aomata arei te Atua ae m'aaka b'a e na nanoangaingkami, b'a e aonga ni kaoka tarimi ae Beniamin ma tarimi naba ake tabeman nako imi. Ngkana tao ai boni katauana b'a a nang akea natiu, ao kai are I a kataua naba.”

¹⁵Ma ngaia are, a uoti aia b'ai n tangira ma aia m'ane aika m'aiti riki nakon are mai m'aaina, ao a nako Aikubita, ao e a iri Beniamin. Ao a nako ni kawara Ioteb'a.

¹⁶Ao ngke e noora Beniamin Ioteb'a b'a raoia, ao e taku nakon ana toro are e tararua ana auti, “Kairiia aomata aikai nakon au auti, b'a N na katawanou ma ngaiia, ma ngaia are, ko na tiringa te man b'a karara.”

¹⁷Ao e karaoa are e tuangaki te toro arei, ao e kairiia tarin Ioteb'a nakon ana auti Ioteb'a.

¹⁸Ao ngke a uotaki nakon ana auti Ioteb'a, ao a maaku, ao a taku i nanoia, “Ti a uotaki nako ikai ngkai i bukin taiani m'ane ake a kaokaki nakon ara baeki ni moan rokora. Ane a na karinaira ni buakaniira ma n anai ara aati, ma ni karikiira b'a aia toro.”

¹⁹Ma ngaia are, ngke a roko n te mataroa, ao a taku nakon te toro are e tararua te auti,

²⁰“Taiaoka Nao, ti roko ikai mai m'aaina ni kabooi karara.

²¹Ao ngke ti a katea ara auti n rianna i aon kawaira n okira mwengara, ao ti a kauki ara baeki, ao ti a bane n noori ara m'ane i matan nako ara baeki, ake ti bon anga ngkoa b'a booia. Ti a manga uoti ngkai nakoim.

²²Ao ti uoti naba ara m'ane riki b'a ti na manga kabooi riki karara. Ti aki ataia b'a antai ae manga kaoki ara m'ane nako nanon ara baeki.”

²³Ao e taku te toro arei, “Kam na aki raraoma, tai maaku. Bon Atuami are Atuan tamami ae kaoki nako imi taiani m'ane nako nanon ami baeki. B'a I bon bane ni karekei boon ami b'ai ni kabane n te tai arei.” Ao i mwiina, e a kaira Timeon nakoia.

²⁴Ao e kairiia tarin Ioteb'a akekei te toro arei nakon te auti. E anganiia te ran b'a a na teboki waeia iai, ao e kamooi aia aati.

²⁵Ao a katauraoi aia b'ai n tangira i m'ain rokon Ioteb'a n te tawanou, b'a a tia n tuangaki ae a na katawanou n am'arake ma ngaia.

²⁶Ao ngke a okira ana auti Ioteb'a ngke e a tawanou, ao a uoti aia b'ai nako nanon ana auti ma ni bobaraaki nako aontano i matana.

²⁷Ao e titirakiniia b'a a uara, ao i mwiina, e taku, “Kam kaongoai ngkoa tamami-e uara? e boni maiu naba ngkai ma ni marurung?”

²⁸Ao a taku, “Eng, e boni maiu ma ni marurung naba am toro are tamara.” Ao a katorobubua ma ni bobaraaki i matana.

²⁹Ao ngke e nooriia Ioteb'a, ao e taku, “Ngaia aio tarimi are te bina, are kam tuangai ngkoa. Te roronga, E na kakab'aiako te Atua.”

³⁰Ao e kawaekoa n nako Ioteb'a, b'a e waerakeia te tang ngke e a tib'a noora tarina are Beniamin. E a roko i rouna ae kaanga e nang tang i mataia. Ma ngaia are, e nakon ana ru, ao e a karaua n tang iai.

³¹Ao e a manga otinako ngke e a tia ni kakaoi ranni matana, ngke e a bon toki nanona n tang, ao e a kanakoa ana taeka b'a a nang uotaki taian am'arake nakoia.

³²Bon teuana ana taibora Ioteb'a, ao naake tarina bon teuana naba aia taibora, ao kaain Aikubita ake a am'arake naba ma ngaia n te tai arei, bon teuana naba aia taibora ae okoro, b'a a raarawa ni bootaki n am'arake ma Ebera.

³³Ao naake tarina, e kaitaraa aia taibora ma Ioteb'a, ao a karinan raoi n tekateka man te ikawai ni karokoa te bina. Ao a itaramata ma te mimi ngke a noora aron katekatekakiia arei.

³⁴Ao a uouotaki taian am'arake nako ia man ana taibora Ioteb'a, ao e rangi n raka riki uouotakin te am'arake nakon Beniamin b'a nimaua te tai rakana nakoia ake tabeman. Ma ngaia are, a am'arake ma ni mooi ma Ioteb'a ao n reke aia tai ae moan te raoiroi.