Read Te B'aib'ara Karikani B'aai 45 Bible Online

Karikani B'aai 45 - Te B'aib'ara bible

Karikani B'aai 45

¹Ao Ioteb'a e a aki kona n taotaona nanona ni karaba mairouia tarina, ma ngaia are, e a tuangiia aomata ni kabane b'a a na kitana te ru, ao ngke ai bon akea aomata, ao e a tuangiia tarina b'a antai ngaia.

²Ao e a tangi n takaarua, ma ngaia are, a ongo kaain Aikubita, ao e a roko rongorongona n ana bareti te uea.

³Ao e taku Ioteb'a nakoia tarina, “Bon Ioteb'a ngai. Ao e uara tamau, e boni maiu ngkai?” Ao ngke a ongo arei tarina, ao a bane ni maaku, ao a aki kakarongoa.

⁴Ao e a taku Ioteb'a nako ia, “Taiaoka ma keemai. Ao ngke a roko, ao e taku, “Bon tarimi ngai are Ioteb'a, are kam kabonakoa ngkoa nako Aikubita.

⁵Kam na aki nanokawaki, ke ni bukiningkami i bon iroumi i bukina ngke kam kabooai nako ikai. Bon te Atua ae kanakoai n ri moami nako ikai b'a N na kamaiuia aomata.

⁶Bon te kauoua n ririki n rongo aei i aon te aba; ao ai ti nimaua riki te ririki ae a na akea iai te ununiki ma te ribana.

⁷E karimoaai te Atua, b'a N na kamaiungkami n te aro ae kamimii aei, ao ni kakoauaa naba b'a kam na maiu, ao a na maiu naba ami kariki.

⁸Ma ngaia are, tiaki ngkami ae kam karokoai ikai, ma bon te Atua. E a tia ni karikai b'a te aobitia ae rietaata i roun te uea. E anganai taekan abana ni kabutaa, boni ngai te tia tautaeka i aon Aikubita ni kabutaa.

⁹Kam na kawaekoai ngkami ngkai ni kawara tamami, ao tuangnga ana taeka natina te mm'aane ae Ioteb'a ae kaangai, ‘E a tia te Atua n anganai tautaekanakin Aikubita ni kabutaa, kawaekoai ngkami n nako mai nako iu, ao tai babaenikai.

¹⁰Kam kona ni maeka n te tabo are Koten, b'a kam aonga ni kaani ma Ngai; ngkami ma ami ataei, tibumi, ami tiibu, ami kooti, ami kao, ao ami b'aai ni kabane.

¹¹N na kona n tararuaingkami ngkana kam maeka i Koten. Ai ti nimaua riki ririkin te rongo; ao I aki tangiringkami b'a kam na mate ni baki ma ami utu, ma ami nanai ni man aika kawakawa.’

¹²Ao e reitanako ana taeka Ioteb'a ao e taku, ‘Ma ngaia are, ngkai kam tia n noorai raoi b'a bon Ioteb'a ngai, ao ngkoe naba Beniamin,

¹³ao kam na tuanga tamau aroni m'aakau i aon Aikubita, ao tuangnga b'aai ni kabane aika kam a tia n noori. Ao i mwiina, kawaekoai ngkami ni kairaa mai tamami.’ ”

¹⁴Ao e kanakoa baina Ioteb'a n rab'ata tarina are Beniamin, ao a kaai n tang.

¹⁵Ao i mwina, e rab'atiia tarina ake tabeman, ao e inga ma ngaiia. Ao i mwiin aei, ao a tib'a taetae tarina ma ngaia.

¹⁶Ao ngke e roko te rongorongo arei n te baareti b'a a roko tarin Ioteb'a, ao a bane ni kukurei ana aobitia te uea.

¹⁷Ao e taku nakon Ioteb'a, “Tuangiia tarim b'a a na kaoni uotan aia aati man okira te aba are Kanaan.

¹⁸Ke a nako n anaa tamaia ma aia utu nako, ao a manga okira ikai. N na anganiia te aba ae rangi n tamaroa mai aon Aikubita, b'a a na maeka iai, ao e na bon toki nanoia ni baika tangiri mai aon te aba.

¹⁹Tuangiia naba b'a a na uoti taiani ka ake a katikitikaki i rouia maan b'a baoia buuia ma natiia ake a uarereke, ao tamaia.

²⁰A na aki raraomaeakini aia b'ai akana a tiku i mwiia, b'a a na b'aini b'ain te aba are Aikubita ni kabane aika moan raraoi.”

²¹Ao natin Iakob'a a karaoa are a tuangaki. Ao Ioteb'a e anganiia taiani ka ake a katikitikaki n taiani man, n ai aron ana taeka te uea, ao kanaia naba are aia tianaki i nanoni m'anangaia.

²²Ao e bane naba ni katoaia ma tatabeua aia kunnikai, ma e angan Beniamin tenibubua te m'akoro n tirewa, ao nimaua ana kunnikai.

²³Ao e kanakoa ana b'ai tamana tengaun taian aati aika a onrake n uotaia b'ain Aikubita aika rangi n tamaroa, ao tengaun naba taian aati aika a onrake n te uita, te kariki, ao am'arake riki tabeua b'a aia tianaki

²⁴Ao e kab'akaia i aoni kawaia, ao ngke a nako, ao e taku nako ia, “Kam na aki ngurengure i aoni kawaimi.”

²⁵A kitana Aikubita nakoni mwengaia, nakon tamaia are Iakob'a i Kanaan.

²⁶Ao a taku nakon tamaia, “E boni maiu Ioteb'a. Bon te tia tautaeka ngaia i Aikubita.” Ao e kubanako Iakob'a n te rongorongo arei, ao e aki kakoauaia.

²⁷Ao ngke a tia n tuangnga b'aai ni kabane are e tuangiia Ioteb'a, ao ngke e a noora te ka are e katikitikaki irouia maan are e kanakoa Ioteb'a mai Aikubita nako ina, ao e a tib'a kakoaua raoi.

²⁸Ao e taku, “E boni maiu natiu are Ioteb'a. Bon ti anne te b'ai ae I kan ongo taekana. N nangi nako ngkai n nooria i m'aini mateu.”