Read Te B'aib'ara Karikani B'aai 46 Bible Online

Karikani B'aai 46 - Te B'aib'ara bible

Karikani B'aai 46

¹Ao e katauraoi b'aai ni kabane Iakob'a, ao e nako Beerateb'a, ao e anga taiani karea nakon Atuan Itaaka, are tamana.

²Ao E taetae te Atua nakoina n te mii ngke e a bong, ao e weteia, “Iakob'a! Iakob'a!” Ao e taku Iakob'a, “Oo! aio ngai.”

³Ao e taku te Atua, “Bon Atuan tamam Ngai. Ko na tai maaku ni m'ananga nako Aikubita; N na karikiia ami botannaomata b'a te botannaomata ae korakora ikekei.

⁴N na iriingkami nako Aikubita, ao N na manga kaokiia ami kariki nakon te aba aei. E na mena i rarikim Ioteb'a ngkana ko mate.”

⁵Ao e a m'ananga nako Iakob'a mai Beerateb'a. Ao e a katokaaki irouia natina mm'aane i aon ana ka te uea are e kanakoa mai Aikubita, are e katikitikaki irouia maan, n ikotaki naba ma ataei, ao buuia.

⁶Ao a uoti aia nanai ni man ma aia b'ai nako ake a reke ni boni korakoraia i aoni Kanaan, ao a nako Aikubita. Ao e kairiia kanoana ni kabane Iakob'a:

⁷natina mm'aane, tibuna mm'aane, natina aine, ao tibuna aine.

⁸Ao ana utu Iakob'a ake a iria nako Aikubita bon: te karimoa are Reuben,

⁹ao natin Reuben mm'aane ake Anoka, Baru, Etiron, ao Karemi;

¹⁰Timeon ma natina mm'aane: Iemuera, Iamin, Oata, Iakin, Toara, ao Tiaura are natina ma ainen Kanaan;

¹¹Rewi ma natina mm'aane: Kerition, Koata, ao Merari.

¹²Iuta ma natina mm'aane ake: Tiera, Bereti, ao Teera, (Natin Iuta riki mm'aane ake tabeman, Era ao Onan, ake a mate i Kanaan.) Natin Bereti mm'aane ake Etiron, ao Amura,

¹³Itaakara ma natina mm'aane ake: Tora, Buwa, Iatiuta, Iobe ao Timron;

¹⁴Teburun ma natina mm'aane ake: Tereta, Eron, ao Iareera.

¹⁵Ao aikai natin Rea mm'aane ake natina ma Iakob'a i Metobotamia, i rarikin natina te aine are Nei Rina. Bootani kanoana ma Nei Reea bon teningaun ma teniman.

¹⁶Kaata ma natina mm'aane ake: Tibion, Aki, Tuni, Etibon, Eri, Arota, ao Areri;

¹⁷Atera ma natina mm'aane ake: Imna, Itiwa, Itiwi, Beria, ao m'aneia are Nei Tera. Natin Beria mm'aane bon Ebera ao Marekiera.

¹⁸Koraki aika tengaun ma onoman aikai, boni kanoan Iakob'a ma Nei Tireba, are te toro te aine are e anga Raab'an nakon natina te aine ae Nei Reea.

¹⁹Ao e karikiia uoman naati mm'aane Nei Rakera are buun Iakob'a, aika Ioteb'a ao Beniamin.

²⁰A riki natin Ioteb'a uoman mm'aane i Aikubita, aika Manate, ao Eberaim irouni buuna are Nei Atenata, are natin Botibera te aine, are te ibonga ae rietaata i Erioboriti.

²¹Natin Beniamin mm'aane bon Bera, Bekera, Atibera, Kera, Naaman, Ei, Roti, Mubim, Ubim, ao Areta.

²²Boni kanoan Iakob'a ma Nei Rakera koraki aika tengaun ma aman aikai.

²³Taan ma natina te mm'aane are Utim.

²⁴Nabetari ma natina mm'aane ake: Iatiera, Kuni, Ietera, ao Tirem.

²⁵Boni kanoan Iakob'a ma Nei Birea are te toro te aine, are e anga ngkoa Raab'an nakon natina te aine are Nei Rakera, koraki aika itiman aikai.

²⁶Bootan raoi kanoan Iakob'a ake a m'ananga nako Aikubita bon onongaun ma onoman, ngkana a aki warekaki buuia natina mm'aane.

²⁷A riki natin Ioteb'a uoman mm'aane i Aikubita, are e karokoa ana utu Iakob'a n te m'aiti ae itingaun ake a mena ikekei.

²⁸Ao e kanakoa Iuta Iakob'a n rimoa n tuanga Ioteb'a b'a e na butim'aia i Koten. Ao ngke a roko

²⁹ao e a tokara ana ka ni buaka Ioteb'a, ao e a nako ni kaitibo ma tamana i Koten. Ao ngke a kaitibo, ao e a rab'ata roroan tamana Ioteb'a, ao e tang n te tai ae maan.

³⁰Ao e taku Iakob'a nakon Ioteb'a, “I a tauraoi nakon te mate b'a I a tia n nooriko, ao I a ataia b'a ngaia ko boni maiu.”

³¹Ao e taku Ioteb'a nako ia tarina ma ana utu ni kabane, “N nangi nako n tuanga te uea b'a a roko tariu ma au utu ni kabane ake a maeka ngkoa i Kanaan ni kawarai.

³²N na tuangnga b'a bon taani kaawakin tiibu ngkami, ao kam na tararuaia ami nanai ni man ake kam kairiia ma ami nanai n tiibu, ma ami b'ai ni kabane.

³³Ngkana e weteingkami te uea n titirakiningkami b'a tera ami m'akuri,

³⁴ao kam na ururingnga n tuangnga b'a bon taan tararuaia maan ngkami mairouia ami bakatibu. B'a ngkana kam karaoa anne, ao ane e na kamaekaingkami n te aba are Koten.” E taekina aei Ioteb'a b'a a aonga n aki manga kaawakiniia maan kaain Aikubita.