Read Te B'aib'ara 2.Tamuera 12 Bible Online

2.Tamuera 12 - Te B'aib'ara bible

2.Tamuera 12

¹Ao e kanakoa Natan are te burabeti b'a e na karakina te karaki teuana nakon Tawita ae e kaangai: Te aomata ae e kaub'ai ao te aomata ae e maiu ni kainano aika a maeka n te kaawa ae ti teuana.

²Iai ana tiibu ao a na kao aika a m'aiti te aomata are e kaub'ai arei,

³ma bon ti temanna ana tiibu ae te ataei te aomata are e maiu ni kainano ae e kabooa ao e kaikawaia. E riki te tiibuteteei arei i rouna ma natina b'a te man ae a tatangiria. E bon kaam'arakea naba n ana raurau ao e kamooia naba n ana m'angko ao e kamatuua ni b'ab'akoia. E riki ana tiibuteteei arei b'a kaanga oin natina.

⁴N te bong teuana, e roko ana iruwa te aomata are e kaub'ai, ma e aki tangiria te kaub'ai arei n tiringiia ana tiibu ke ana kao b'a butim'aean ana iruwa. Ma ngaia are, e iraea ana tiibuteteei te aomata are e maiu ni kainano ao e karaoia b'a a na butim'aai.

⁵Ao e rangi n ribaa te aomata are e kaub'ai Tawita ao e taku nakon Natan, “I tuea iroun te UEA b'a e na riai ni mate te aomata ane e karaoa anne!

⁶Ngkai e aki nanoanga te aomata ae e maiu ni kainano, e na kabooa mwiina aua te tai okiokin boon te tiibuteteei.”

⁷Ao e taku Natan nakon Tawita: Boni ngkoe te aomata ae e kaub'ai! Ko na ongora ngkai nakon te b'ai ae E taekinna te UEA ae te Atua i bukim: “I rineiko b'a uean Iteraera. I kaawakiniko mairoun Tauro

⁸ao e bon anganiko naba ana auti ma buuna nako. I kariaia b'a ko tautaekana Iteraera ma Iuta, ao ngkana arona b'a e tuai rau nanom n anne, N na manga anganiko riki.

⁹E aera ngkai ko aki ongotaeka irou ao ko karaoa te b'ai ae rangi ni kakamaaku? Ko tiringa Uria are kaain Eta ngke ko anga b'a e na tiringaki irouia kaain Ammon, b'a ko aonga ni konaa n anaa buuna.

¹⁰Ngkai ko aki ongotaeka irou ao ko anaa buun Uria b'a buum, ao e na aki konaa n reke te rau i nanon am utu.

¹¹Ane e na iai mai buakoia am utu ae e na karika te kanganga ae e korakora nakoim, ao N na anaiia buum ma n anga nakon te m'aane temanna i bon i matam. Ane e na matu ma ngaiia ngke a bon matakuakinaki irouia.

¹²Ko kakaraoa te m'akuri ni karabaa, ma N na kaotia nakoia Iteraera ni kabane b'a a na nooria.”

¹³Ao e taku Tawita, “I a tia ni aki ongotaeka nakon te UEA.”

¹⁴Ao e taku Natan, “Eng, ko a tia! Ko bon aki tabe ma te b'ai ae e tangiria te UEA. E a tia ni kab'araa am bure, ma ngaia are, ko na aki mate. Ma e na mate natim are e a tia ni bungiaki.”

¹⁵Ao i mwiin arei, e a okira mwengana Natan. Ao e kaoraka natin Tawita te m'aane ae e uarereke te UEA.

¹⁶Ma ngaia are, e aki am'aam'arake Tawita ni kaota nanokaawakina, ao e butiia te Atua b'a e na kamarurunga natina. Ao e aki matu i aon ana kainiwene, ma e wene i aon te burooa ni kangainaa.

¹⁷Ao a tei ana mataniwi i rarikina ni kataia n tuangnga b'a e na teirake. Ma e bon aki roko n te teirake ke n am'arake.

¹⁸Ao e a mate te ataei arei imwiin wenena n aoraki i nanon itibong, ao a maaku ana aobitia n tuangnga Tawita ae e a mate. Ao a taetae i bon irouia, “E a kangaa arona ngkai b'a ngke e bon maiu te ataei ao e aki kan ongo iroura, ao ti nang kanga riki ngkanne n tuangnga ae e mate natina? E mena ao e nang karaoa riki ae e rangi ni buakaka!”

¹⁹Ao e namakinna Tawita b'a a wirikiriki ana taani m'akuri, ao e a ataia ae e a mate te ataei. Ao e a titirakiniia ana taani m'akuri ni kaangai, “E a mate te ataei?” Ao a taku ana taan m'akuri, “Eng, e a mate.”

²⁰Ao e teirake Tawita mai aon te burooa; e tebotebo, e kaara irana, ao e karina kunnikaina. Ao e m'ananga nakon ana autinrianna te UEA ao e taromauri, ao i mwiina, e a manga okira mwengana. Ao e bubuti kanana, ao e a am'arake ngke e roko kanana irouia ana taan m'akuri.

²¹Ao e taku ana mataniwi nakoina, “Tera ae ko karaoia? Ko aki am'aam'arake ao ko tang i bukin natim te m'aane ngke e bon maiu! Ma ngkai, ngkai e a mate, ko teirake ao ko a am'arake.”

²²Ao e kaeka Tawita ni kaangai, “I aki am'aam'arake ao I tang ngke e boni maiu b'a au kaantaninga b'a e na reke maiuna. I kaangai inanou, Antai ae ataia, ao E na nanoangaai te UEA ni kamaiua natiu.”

²³Ma ngkai, e a mate, ao tera nanon ae N nang aki am'aam'arake? I aki konaa ni manga kaoka maiuna! N na manga bon raonna naba n te tai teuana ni mate, ma e aki konaa n okirai.

²⁴E karaua nanon buuna are Nei B'atateb'a Tawita ao e matu ma ngaia. Rimwi riki, e a manga bungia riki natina te m'aane ao e aranna b'a Toromon. E tatangira Toromon te UEA

²⁵ao E kanakoa Natan b'a e na tuanga Tawita ni kaangai, “E na aranna te UEA b'a Ieriria.”

²⁶I nanon te tai anne, e a tia ni mena Ioaba n te aba are Ammon, b'a e buakana te kaawa are Rab'a. E reke i rouna ana oo te uea

²⁷ao e kanakoa te tia uarongorongo ni kaongoa Tawita ni kaangai: I a tia ni buakana Rab'a ao e a reke irou te oo are e teiakini raan i bukin nnen nimaia kaain te kaawa.

²⁸Weteia nikiraia te taanga ni buaka ni bootia. Ao katobibiia te kaawa, ao ko na taua ni bon ti ngkoe. B'a ngkana ko aki karaoa anne, ao ane a na ururingnga aomata ae boni ngai ae I taua te kaawa.

²⁹Ao e bootia nikiraia te taanga ni buaka ao e buakana Rab'a. E taua te kaawa

³⁰ao e anaa te baunuea man bouanantin te anti are Mirekom. Ao e uoti nako naba b'aai ni kabane aika a boongana.

³¹Ao e kam'akuriia kaain Rab'a Tawita b'a a na urua oon te kaawa n taian beke ao taian tanai aika taiani biti, ao e a manga tuangiia b'a a na karaoi taiani buriki. E karaoa naba te aro arei nakon kaawan Ammon ni kabane. E a manga okira Ierutarem Tawita, ao a okiri mwengaia nako Iteraera.