Read Te B'aib'ara 2.Tamuera 13 Bible Online

2.Tamuera 13 - Te B'aib'ara bible

2.Tamuera 13

¹Iai natin Tawita te aine ae arana Nei Tam'aa, ae m'anen Abetarom. Bon ai m'anen naba Amnon, are e a manga tataana neierei.

²Ma bon te ataeinaine Nei Tam'aa, ao e aki reereke ana anga Amnon n ae e na ti ngaia ma neirei n te auti. E a rangi ni bora n ana iango arei n te aro are e a aoraki iai.

³Ao iai raoraon Amnon ae arana Ionataba, are natin tarin Tawita are Timea. E buobuoka Amnon ni kakaaea angan rekena i rouna,

⁴ao e taku nakon Amnon, “Tera ae e riki? Bon natin te uea ngkoe te m'aane! Ko riai n aki nakonako ma rawaawatan nanom n aron anne ni katoa ingabong.” Ao e taku Amnon, “I a rangi n tangira Nei Tam'aa, are m'anen tariu are Abetarom.”

⁵Ao e taku Ionataba nakoina, “Ko na wene ni bakaaea aongkoa ko aoraki i aon am kainiwene. Ngkana e roko tamam n nooriko, ao tuangnga b'a e na karokoa Nei Tam'aa, b'a ko na nooria ngkana e kuukana kanam. Ao ane e na reke am tai ngkana e nikira kanam iroum.”

⁶Ao e tiku n ana kainiwene Amnon ni bakaaea te aoraki. Ao ngke e roko te uea n nooria, ao e taku Amnon, “Taiaoka, butiia Nei Taama b'a e na nakomai, b'a e na karaoa te kariki ibuku ikai b'a N na matakuakinna ngkana e karaoia ao e na nikira kanau te kariki.”

⁷Ao e tuanga Nei Tam'aa Tawita ni kaangai, “Ko na nakon ana auti Amnon ni katauraoa kanana teutana.”

⁸Ao ngke e roko ikekei, ao ngaia e wene i aon te kainiwene. E kabooboa te buraawa, ao e karaoa te kariki tabeua mai iai, ao e kam'aia ao ngaia e mamataku.

⁹Ao i mwiina, e anaa te kariki man te baan ao e kaaki i nanon te raurau, ma e rawa ni kanna. Ao e taku Amnon, “Kaotinakoia taani m'akuri ni kabane man te auti.” Ao ngke a nako,

¹⁰e a taku nakon Nei Tam'aa, “Uotaamai te am'arake nakon au runimatu.” Ao e anaa te kariki are e karaoia Nei Tam'aa ao e uotia nakon ana runimatu Amnon.

¹¹Ma e bon uotia nakoina, ao e a rawea naba neirei, ao e taku, “Ko na wene ma ngai n te kainiwene!”

¹²Ao e taku neirei, “I aki! Ko na aki i manonoai! E rangi n tabuaki te aekaki ni m'aan aei i aon Iteraera. E rangi ni kab'ainrang!

¹³Ko na iangoai. Ngkana ko karaoa aei nako iu, ao N na bon b'ainrang n aki toki! Ao ko na iangoiko naba. Ane a na bane Iteraera n araniko b'a ko onrake n te nanobaba! Ko na riai n tuanga moa te uea, ngkana tao e na kariaia marem ma ngai.”

¹⁴Ma e aki kan ongo Amnon n te b'ai are taekinna neirei. E korakora riki nakoina, ma ngaia are, e raira neirei, ao e taua.

¹⁵Ao e a manga rangi ni korakora riki ribaakin neirei nakon korakoran tangirana i rouna mai m'aaina. E taku nakon neirei, “Teirake ao otinako!”

¹⁶Ao e taku neirei, “Ko na aki kanakoai! E a rangi ni buakaka riki aei nakon are ko a tia ni karaoia.” Ma e aki kan ongo Amnon.

¹⁷E weteia ana taan m'akuri ao e taku, “Tewea nako te aine aei nako tinaniku ao kaina te mataroa!”

¹⁸Ao a kanakoa neierei taan m'akuri, ao a kaina te mataroa.

¹⁹Ao e raeuaa niiniirana Nei Tam'aa ao e kaaki te mannang i aon atuuna. Ao e karaba matana ni baina ao e tang n takaarua ngke e tabe n nakonako.

²⁰Ao e taku Abetarom are m'anen Nei Tam'aa nakoina, “E na kangaa ni karaoa anne Amnon nakoim! Ngkai bon m'anem ao tai tuanga temanna b'a tera ae riki.” Ao e m'aing Nei Tam'aa nakon ana auti Abetarom, ma e bon teimatoa n nanokawaki ma ni kanaokoro n taai nako.

²¹Ao ngke e ongo Tawita te b'ai are e riki nakon Tam'aa, ao e rangi ni maraki nanona iai. Ma bon akea te b'ai ae e konaa ni karaoia Tawita nakon Amnon i bukina ngke bon ana karimoa, ma e rawa ngkana e na manga rawaawata iai Amnon.

²²Ao e bon karaoa naba ae e raoiroi Abetarom nakon Amnon kaanga akea te b'ai ae e riki, ma e bon rangi n ribaa Amnon n te b'ai are e karaoia nakon m'anena are Nei Tam'aa.

²³Uoua te ririki i mwiina, a tabe n koroburaea te tiibu ana taani m'akuri Abetarom i B'aara Atora i rarikin te kaawa are Eberaim, ao e kaoiia natiia uea ni kabane aika m'aane Abetarom nako ikekei.

²⁴Ao i mwiina, e kawara Tawita ao e taku, “A koroburaei tiibu au taani m'akuri. Taiaoka nakomai ira ara bootaki!”

²⁵Ma e kaeka Tawita ni kaangai, “I aki natiu, ti aki konaa n roko. E na bon rangi korakora te kabane m'ane iai nakoim.” Ma e bon kabanea naba ana anga Abetarom n anaa nanona, ma e aki roko n te kan nako Tawita. E ti kakab'aiaa aia bootaki.

²⁶Ao e taku Abetarom, “Ao ngkana ko aki kan m'ananga, ko na kanakoa tariu are Amnon b'a e na raoniira.” Ao e titiraki Tawita ni kaangai, “B'a bukin tera ngkai e na raoningkami?”

²⁷Ma e kakorakoraa ni butiia, ni karokoa e a kariaia Tawita nakon Amnon ma natina m'aane ni kabane n raona Abetarom. Ao e katauraoa te baka ni kukurei Abetarom ae aia baka ni kukurei uea.

²⁸Ma e tuangiia ana taan m'akuri b'a a na kaaki mataia i aon Amnon. Ngkana e a reke angina teuana n te wain ma ni kukurei, ao N na anga te kanikina. Ao ngkami, kam a tiringnga naba! Boni Ngai ae I tuangkami b'a kam na karaoia, ma ngaia are, kam na aki maaku. Kam na korakora ao kam na ninikoria.”

²⁹Ao a tiringa Amnon ana taani m'akuri Abetarom, ngke tuangiia Abetarom. Ao natin te uea ake nikirana, a kawaekoaia ni birinako i aon aia miure ni biri nako mairoun Abetarom.

³⁰Ao ngke a tabe n okira Ierutarem, iai temanna are e tuanga Tawita ni kaangai, “E a tia Abetarom n tiringiia natim m'aane ni kabane! Bon akea temanna nikirana.”

³¹Ao e teirake Tawita, ao e raeuaaka ana kunnikai i bukin rawaawatan nanona ao e wene i aon te tano. A reiti teiia ana taani m'akuri, ma a raeuaaki kunnikaiia naba.

³²Ao e taku Ionataba are natin tarin Tawita te m'aane are Timea, “Te Uea ae ko karineaki, a aki bane ni mate natim m'aane! Bon ti Amnon. E a kaman iangoa tiringan Amnon, Abetarom man te tai are e taua iai Nei Tam'aa.

³³Ko na aki tabe ma te rongorongo are aongkoa a bane ni mate b'a bon ti Amnon ae mate,

³⁴ao e a tia ni biri nako Abetarom.” Ao temanna te tia tei, e nooriia aomata aika a m'aiti aika a tabe n roko n iteran te tabuki are te iterana n te kawai nako Oronaim.

³⁵Ao e taku Ionataba, “Te Uea ae ko karineaki, nooria! A bane n roko natim m'aane n aron are I a tia n tuangko.”

³⁶Ao e aki maan imwin ana taeka, ao a roko natin Tawita m'aane akekei. A tang n takaarua, ao e tang naba n takaarua Tawita ma ana mataniwi ni kabane.

³⁷E biri nako Abetarom nako Keturi, ike e tiku iai i nanon tenua te ririki ma te Uea are Taremai, are natin Ammiura te m'aane.

³⁸Ao e rangi ni maan Tawita n nanokawaki i bukina ngke e a mate Amnon.

³⁹E bon rangi nanokawaki Tawita i bukin buan natina are Amnon, n te aro are e tangiria ni kam'anangaa ana taanga ni buaka nako ikekei n taua Abetarom.