Read Te B'aib'ara 2.Tamuera 16 Bible Online

2.Tamuera 16 - Te B'aib'ara bible

2.Tamuera 16

¹Ao e m'ananga Tawita nakon iteran te Maunga are Oriweta are te iterana, ngke a kaaitibo ma Tiba, are mataniwiia ana taani m'akuri Mebiboteta. Iai uoman ana aati Tiba aika a uoti uabubua taiani kariki, ao tebubua te abuta te kureebe are e a m'au, ao tebubua taiani biiku, ao tabeua taiani wain.

²Ao e titiraki Tawita ni kaangai, “Tera te b'ai aei?” E taku Tiba, “Taian aati aikai bon i bukini baaom ma am utu. Ao te kariki ma taiani uaanikai i bukin kanaia aomata, ao te wain i bukin te mooi n te rereua ngkana a taka.”

³Ao e titiraki Tawita ni kaangai, “E ngaa Mebiboteta?” Ao e kaeka Tiba ni kaangai, “Are e tiku i Ierutarem, i bukina b'a e taku b'a a tangiria Iteraera b'a e na riki b'a te tia tautaekana abanuean tibuna are Tauro.”

⁴Ao e tuangnga Tawita ni kaangai, “A riki ngkai b'aai ni kabane ake e b'ain Mebiboteta b'a am b'ai.” Ao e taku Tiba, “Te Uea ae ko karineaki, bon am tia m'akuri ngai ae I mangori, ao au kaantaninga b'a N na bon kakukureiko.”

⁵Ao e tabe ni kaan Tawita nakon te kaawa are Baurim ngke e a ti otinako naba te m'aane temanna ni kamaraiia. Te aomata arei bon Timei are natin Kera te m'aane, ao bon temanna ngaia mai buakoia ana utu Tauro ae e a raroa.

⁶E karebanaa Tawita n te atiibu, ao ana tautia, ao aomata nako, n reitaki ma taan tararuaa te uea ake a nakonako i rarikin Tawita ake uaitera.

⁷E tatakarua Timei nakon Tawita ni kaangai, “Naako mai ikai, ngkoe ae te tia tiritiri! Bon akea manenam,

⁸ane e na kabooa mwiin te b'ai are ko a tia ni karaoia te UEA i bukin tiringakiia ana utu Tauro aika a m'aiti. Ko iraea abanueana, ao ngkai e a tia te UEA n angan natim te m'aane are Abetarom. Ao bon anne ngkai ko a reke n te kangaanga ae e korakora!”

⁹Ao e taku Abitiai, “Te Uea ae ko karineaki, ti te bo te aomata aei ma te kamea ae akea manenana ae e a mate! E riai n aki anganaki te kariaia b'a e na kamaraiako. Kariaiai b'a N na nako ni korea roroana ni kanakoa.”

¹⁰Ao e kaeka Tawita ni kaangai, “Ko na aki katabea nanom iai ma tarim are Ioaba. Ngkana arona b'a e kamaraiaai Timei b'a e tuangnga te UEA, ao antai ngkami b'a kam na katokia?”

¹¹Ao e taku Tawita nakon Abitiai ao ana tautia ni kabane: E kataia n tiringai oin natiu te m'aane! Ao e aera ngkai e tangiria riki te m'aane aei man te baronga are Beniamin b'a n na mate riki? Ke kamaraiaia ni kabane akana e tangiriia. E na mena ngkoa ao E bon tuangnga te UEA b'a e na kamaraiaai.

¹²Ma I taku b'a ngkana e ongo te UEA taeka ni kamaraia aikai ma n noora te kangaanga ae I a mena i nanona, ao I taku b'a E na bon nanoangaai ao N na aki maraia.

¹³Ao a touanako kawaia Tawita ma raona i nanon te kawai. Ao e m'ananga Timei i rarikin te tabuki i rarikin te kawai, ni kakamaraia ma ni kakarebanaia n te atiibu ma n tauniia n te tano.

¹⁴Ao ngke a roko Tawita ma raona akekei n te Karaanga are te Ioretan, ao a bon kua, ma i mwiin motirawaia, e a manga reke korakoraia.

¹⁵Ao n te tai aei, e a tia n roko Abetarom ma Aitobera ma raoia i Ierutarem.

¹⁶Ao e roko raoraon Tawita are Utiai iroun Abetarom ao e taku, “E na teimaan maiun te uea! E na teimaan maiun te uea!”

¹⁷Ma e taku Abetarom nakon Utiai, “Bon anne arom ni kaota am kakaonimaki nakon raraom are Tawita? E aera ngkai ko aki iria?”

¹⁸Ao e taku Utiai, “E a tia te UEA ma Iteraera n rineiko b'a aia uea. I aki konaa n nako. N na riai n tiku ma ni m'akuri i bukin ae a tia n rineia.

¹⁹Ao i rarikin anne, e bon riai b'a N na m'akuri i bukim n aron naba ngkoa ngke I m'akuri iroun tamam.”

²⁰Ao e rairaki Abetarom nakon Aitobera ao e taku, “Tera am iango! Tera ngkai ae N na karaoia?”

²¹Ao e kaeka Aitobera ni kaangai, “Iai buun tamam aika a tiku ni kaawakina te bareti. Ko na wenenibure ma ngaiia. Ao ane a na ataia iai aomata b'a ko bon rangi ni kabuakaka tamam. Ao e na kakorakora riki nanoia aika a raoniko.”

²²Ao e katea ana autinrianna Abetarom i aon taubukin te bareti are e booraoi, ao a bane ni mataku aomata ngke rin nako ma buuia tamana nako nanon te autinrianna.

²³E angaanga ana taeka n reirei Aitobera ni boong akekei ake a kaai n taku Abetarom ao Tawita b'a a roko mairoun te Atua.