Read Te B'aib'ara 2.Tamuera 2 Bible Online

2.Tamuera 2 - Te B'aib'ara bible

2.Tamuera 2

¹Tabeua te tai i mwiina, e titirakina te UEA Tawita ni kaangai, “E na riai b'a N na nako nakon kaawan Iuta?” Ao E kaeka te UEA ni kaangai, “Eng, Ko riai.” Ao e titiraki Tawita ni kaangai, “Ao te kaawa raa ae N na nako iai?” Ao E kaeka te UEA ni kaangai, “Naako Eberon.”

²Ao e nako Eberon Tawita ma buuna ake uoman, ake Nei Ainoam ao Nei Abikaira. Ainoam boni kaain Ietireera, ao Nei Abikaira bon kaain Karemera.

³Ao e kairiia naba ana m'aane ma aia utu Tawita b'a a na maeka n taiani kaawa aika a uarereke ake i rarikin Eberon.

⁴Ao a kaaitibo kaain Iuta ma Tawita i Eberon ao a kab'aroa b'aan te oriwa i aon atuuna ni kaotia b'a aia uea ae e boou. Ao i mwiina, e tuangiia Tawita ni kaangai, “Kaain Iabeti i aon Kireata, kam na tauna rab'atan Tauro.”

⁵Ao e kanakoa te tia uarongorongo Tawita b'a e na tuangiia ni kaangai: E na kakab'aiaingkami te UEA! Kam rangi ni karaoa ae e raoiroi ngkai kam tauna rab'atan Tauro ae ami tia tautaeka,

⁶ao I tataro b'a E na akoingkami ma ni kakaonimaki te UEA nakoimi. N na riki b'a raoraomi i bukin te b'ai ae kam a tia ni karaoia.

⁷E a mate Tauro, ma a tia barongan Iuta ni karikai b'a aia uea. Ma ngaia are, kam na korakora ao kam na ninikoria.

⁸Abenera are natin Nera te m'aane bon ana tia kairiiri temanna Tauro ngaia n te taanga ni buaka. E uota natin Tauro te m'aane are Itiboteta ri aon te karaanga are te Ioretan nako Maanaim

⁹ao e karikia b'a te uea i aon Iteraera, Ietireera, Eberaim, ao Beniamin.

¹⁰Ai abwi ana ririki ni maiu Itiboteta n te tai anne, ao e tautaeka i nanon uoua te ririki. Ma kaain Iuta a karika Tawita b'a aia uea,

¹¹ao e tautaeka mai Eberon i nanon itiua ma te iterana ana ririki.

¹²N te bong teuana, ao a m'ananga nako Abenera ma ana taanga ni buaka Itiboteta

¹³Ao i nanon te tai anne, e kairiia ana taanga ni buaka Tawita, ao a kaaini kaaitibo koraki aikai n te nei are i Kibeon. A tekateka Abenera ma ana rorobuaka n iteran te nei are teuana, ao Ioaba ma ana rorobuaka a tekateka ni iterana are teuana.

¹⁴Ao e takaarua Ioaba ni kaangai, “Ti a rineia ara tautia aika a bane aroia b'a a na bo! Ao e kariaia Ioaba,

¹⁵ao a teirake tengaun ma uoman man te baronga are Beniamin b'a a na buaka ma tengaun ma uoman rorobuaka mairoun Tawita.

¹⁶A kaai ni buriti iran atuuia ao a ewariia n aia biti. A bane ni mate ikekei! Ao bon anne bukina are e aranaki iai te tabo arei b'a “Katawanangin Te Ewaewa.”

¹⁷Ao i mwiin arei e a moanaki te buaka. A kaai ni kakorakoraia ni uaitera, ma a konaa Abenera ma ana tautia Iteraera ana tautia Tawita.

¹⁸A mena naba ikekei natin Teruia ake teniman ake: Ioaba, Abitiai, ao Ataera. E rangi ni biri m'aaka Ataera kaanga te ria i nanon te tawaana,

¹⁹ao e biri ni kaineta Abenera, n aki rarairaki nakon maingina ke ataina.

²⁰Ao e nooria Abenera ngke e rairaki, ao e taku, “Bon ngkoe anne Ataera?” Ao e kaeka ni kaangai, “Eng, ngaia anne.”

²¹Ao e taku Abenera, A m'aiti tautia ikai. Katoka kakioakiu ao un ma temanna mai buakoia! Tiringnga ao anaa ana kunnikai b'a am b'ai.” Ma e rawa n toki Ataera.

²²Ao e taku Abenera, “N na tiringko ngkana ko aki rairaki n oki! Ao N na bon aki manga kaitaraa ma tarim are Ioaba.”

²³Ma e bon aki rairaki Ataera, ma ngaia are, e ewaraki birotona iroun Abenera ni bukin ana kainiwai. E ribunako te kainiwai arei ao e otinako mai akuuna. Ao e b'aka ni mate Ataera. Ao a bane n tei ao a aki kakam'akuri aomata ngke a noora Ataera ni wene ni mate.

²⁴Ma a ri mwiin Abenera uaake Ioaba ao Abitiai. Ao n tokina, ngke e a kaani bong, ao a roko n tabukin Amma, e aki rangi n raroa ma Kia i aon te kawai nako Rereuan Kibeon.

²⁵E kairiia rorobuakan Beniamin teuare Abenera n reitaki ma te m'akoro teuana nako aon te tabuki, ao a katauraoi nakon te buaka.

²⁶Ao e takaarua Abenera nakon Ioaba ni kaangai, “Ti na katoka n ningai kakiokioakira i bon iroura? Ko aki ataia b'a ngkana maanra ni karaoa aei bon kakorakoraan riki te kangaanga n tokina? Ko nang tuangiia n ningai am rorobuaka b'a a nang katoka kakioakiia bon oin aia utu?”

²⁷Ao e takaarua Ioaba ni kaangai, “I tuea n aran te Atua ae e maiu, b'a ngke arona b'a ko bon aki taetae, ao a na teimatoa au rorobuaka ni kakioia aia utu ni karokoa te ngaina!”

²⁸Ao e anaa ana bu Ioaba ao e uka te bu are te kanikina nakoia ana tautia b'a a na katoka kaeakiia tautian Iteraera. Ao e toki naba man te tai anne te buaka.

²⁹Ao a m'ananga Ioaba ma ana taanga ni buaka ri nanon te M'arua are te Ioretan ni kangainaa. Ao i mwiina, a ri nanon te karaanga ao a m'aati ni kabanea te moaningabong arei ni karokoa rokoia i Maanaim.

³⁰Ao ni bon te tai are e katoka iai kakioan Abenera teuare Ioaba, e ikotiia ana taanga ni buaka Tawita ao e wareki m'aitiia. Ao bootaia ake a bua mai buakoia i rarikin Ataera bon tengaun ma ruaman.

³¹A tia ana taanga ni buaka Tawita n tiringiia 360 ana rorobuaka Abenera man te baronga are Beniamin.

³²A uotaanako rab'atan Ataera teuare Ioaba ma ana taanga ni buaka nako Betereem ao a taunna n aia ruanimate ana utu. Ao i mwiina, a nakonako ni kangainaa ni karokoa rokoia i Eberon i m'aain otin taai.