Read Te B'aib'ara 2.Tamuera 20 Bible Online

2.Tamuera 20 - Te B'aib'ara bible

2.Tamuera 20

¹Ao e mena ikekei te tia kamangao man te baronga are Beniamin. Arana bon Tieba are natin Bikiri te m'aane. E katanga te bu b'a e na botiia aomata. Ao i mwiina, e taku, “Kaain Iteraera, Ai tiaki ara Uea Tawita are natin Iete te m'aane! Ti a nako n okiri mwengara.”

²Ma ngaia are, a aki ira Tawita ao a m'ananga nako ma Tieba. Ma a bon tiku i rarikin Tawita kaain Iuta ni moa man te Ioretan nako Ierutarem.

³E a tia ni katikuia tengaun buun Tawita i Ierutarem b'a a na tararuaa te bareti. Ma ngke e a oki, e a manga anaia nakon te auti teuana, ao e katikuia tautia i rarikiia b'a a na tararuaia. E anganiia b'aai nako ake a tangiri, ma e bon aki roko n te reke ana tai ni mamatu i rarikiia. A na tiku ikekei ni karokoa tokin maiuia b'a kaanga aroia aine aika a tia ni mate buuia.

⁴E taku Tawita nakon Amata, “I tangiriko ma ana taanga ni buaka Iuta ni buaka ikai tenua te bong mangkai!”

⁵Ao e waaki Amata ni bootia te taanga ni buaka, ma e kabanea tenua te bong i bukin karaoan arei.

⁶Ao e taku Tawita nakon Amata, “E na bon rangi ni kamarakiira riki Tieba nakon Abetarom, Anaiia au tautia aika a bane aroia ao naako ri mwiina. Ti aki tangiria b'a e na tam'arakea oon te kaawa ma ni biri nako mairoura.”

⁷Ao e kiitana Ierutarem Abitiai b'a e na kataia n taua Tieba. E kaira Ioaba ma ana tautia, ao ai uana naba ma taan tararuaa Tawita ao tautia aika a bane aroia.

⁸A tia n roko n taian b'aa ake a buubura ake i Kibeon ngke a reke irouia Amata. Bon iai ana biti Ioaba ae e nim i koreana i aon ana kaboraoi, ma e b'aka ngke e kawaekoa nakon Amata.

⁹Ao e taku Ioaba, “Tamau ae Amata, ko uara ngkai?” Ao e taui buain Amata teuare Ioaba ni baina are te angaatai, b'a e aonga ni konaa ni kiitinna.

¹⁰Ma e aki noora te biti Amata ni bain Ioaba are teaina. Ao e ewara biroton Amata teuare Ioaba, ao e nna nako kanoan nanona are iterana nako aon tano. E waekoa ni mate, ao e aki manga ewaria riki Ioaba. Ao i mwiina, a manga waaki nako Ioaba ma tarina are Abitiai n ri mwiin Tieba.

¹¹E tei temanna ana tautia Ioaba i rarikin rab'atan Amata ni weewete ni kaangai, “Akana a tei i bukin Ioaba ma Tawita a na ira Ioaba!”

¹²E onrake rab'atan Amata n te raraa ao e wene i nuukan te kawai. Te tautia are e a tia n takarua e nooria b'a koraki ake a ri rarikin Amata a riai n tei, ao e kam'awanako te rab'ata arei man te kawai ao e rabuna aona n te burangketi.

¹³A tib'a manga ira Ioaba aomata nako ni kaea Tieba ngke e a tia ni kanakoaki te rab'ata mai nanon te kawai.

¹⁴E ri rarikin abaia kaain te baronga are Iteraera Tieba ao e roko n te kaawa are Abera Beta Maaka, ao a bane ni bootaki ana tautia aika bane aroia n te kaainga are Beri ikekei, ma n iri nako nanon te kaawa.

¹⁵A roko Ioaba ma ana taanga ni buaka ao a katobibia Abera, b'a e aonga n akea ae e na konaa n otinako. A katabukirakea te tano nakon te oo ao a moana uruakan te oo ni b'ain uruanakin te oo.

¹⁶Ao e takaarua te aine ae e wanawana i aon te oo ieta ni kangai: Ongora Irou! Ongora Irou! I tangiria n taetae ma Ioaba! Tuangnga b'a e na nako mai ikai!”

¹⁷Ao ngke roko Ioaba, e taku neierei nakoina, “Ioaba ngkoe?” Ao e taku teuarei, “Eng bon ngai.” Ao e taku neirei, “Taiaoka, ongora nakon te b'ai ae N na taekinna.” Ao e taku teuarei, “Eng, N na ongora.”

¹⁸Ao e taku neierei, “A aki toki n taetaekinna aomata ngkoa, ‘Ngkana kam tangiria ni karekea reireiami ae e raoiroi, ao naako nakon te kaawa ae Abera ni karekea mai iai. Ao kaekaan aia titiraki ni kabane ake a karekea mai ikai bon ti b'aai aika a kainanoaki i bukin katokan te kangaanga.’ ”

¹⁹Bon Iteraera ngaira, ao ti tangira te rau! Ti rangi ni kakaonimaki ni b'aai nako. Ao e aera ngkai ko tangiria n urua te kaawa ae ti te bo ma te tina nakon Iteraera? E aera ngkai ko tangiria ni kamaunaiia Ana aomata te UEA?”

²⁰Ao e kaeka Ioaba ni kaangai, “I aki tangiria ni kamaunaa ke n urua te kaawa!

²¹Bon tiaki anne bukin rokora. Iai te aomata ae nako man te aba are e tabukibuki are Eberaim. Arana bon Tieba, ao bon te tia kairiiri ngaia n te bootaki ni kamangao are e kaaitaraa te uea are Tawita. Anganai, ao N na kiitana am kaawa. Ao e taku neierei nakon Ioaba, “Ti na karenakoa atuuna nakoim mai aon te oo.”

²²Ao e nako neierei ni kawariia kaain te kaawa arei ao e taetae ma ngaiia i bukin karaoan arei. Ao i mwiina, a korea atuun Tieba ao a karenakoa nakon Ioaba. Ao e katanga te bu Ioaba b'a te kanikina, ao a okira mwengaia tautia.

²³Ioaba bon mataniwiin ana taanga ni buaka Iteraera ae e b'anin. Benaia are natin Ieoiata te m'aane boni ngaia are e tararuaia taan tararuaa Tawita.

²⁴Atoram boni ngaia are e tararuaia taani m'akuri. Ao Ieotiab'ata are natin Airuta te m'aane boni ngaia are e tararua rongorongon te tautaeka.

²⁵Tewa bon te tia koroboki. Taian ibonga bon Tatoka ao Abiata.

²⁶Ao ana ibonga Tawita bon Ira are natin Iaira.