Read Te B'aib'ara 2.Tamuera 23 Bible Online

2.Tamuera 23 - Te B'aib'ara bible

2.Tamuera 23

¹Aikai ana kabanea n taeka Tawita are natin Iete te m'aane. E rinea Tawita Atuan Iakob'a ao E karikia b'a te uea ae e kakannato. E tangiraki Iroun te Atua Iteraera ae E M'aaka. E taku Tawita ngke E taetae te Atua nakoina:

²E a tia Tamnein te UEA n tuangai te b'ai ae N na taekinna.

³E taku nako iu Atuan Iakob'a Au b'a ae e korakora, [10] E karaoa ae e raoiroi te tia tautaeka ae e ongotaeka nakon te Atua

⁴kaanga ootan taai i nanon bongin te riringa, ke kaanga te karau ae raneanea i aon te uteute.”[11]

⁵I a tia n tautaeka n te aro aei, ao E na bon aki kona n urua Ana berita nako iu. E a tab'anin raoi ana berita te Atua ao E aki konaa ni manga bitaki; E na bon teimatoa ni buokai ma n anganai te b'ai ae I kantaningaia.

⁶Ma a rebenako aomata aika a buakaka kaanga ingin kaai aika a kateketeke. A aki konaa n tauaki n te bai,

⁷ma a kabuokaki ni nneia n te kainiwai ae e kakang.

⁸Aikai araia ana taani buaka Tawita: Iatiobeam [12] natin Akemon te m'aane[13] bon te tia kairiiri mairouia taani buaka ake teniman.[14] E tiringiia wanibubua te m'aane n te buaka n ana kainiwai.[15]

⁹Te kauoman mai buakoia taani buaka ake teniman bon Ereata are natin Toto te m'aane are kaain Aoa. N te tai teuana ngke a buaka kaain Biritia ma Iteraera, ao a kakaewenakoia Iteraera ngaia ma Tawita b'a a na bo ma ngaiia. A biri nako tautian Iteraera mairouia kaain Biritia,

¹⁰ao bon ti nikirana Ereata. E tiringiia kaain Biritia ni karokoa ae e rangi ni matoatoa baina n taua ana kabaang. Ao e a toki ana buaka Ereata, akea riki te b'ai ae a na manga karaoia ana taanga ni buaka Iteraera b'a a na ti okirikaaki n anai aia b'ai ni buaka aia kairiribai ma kunnikaia ni buaka. E a tia te UEA n angan Iteraera te tokanikai ae e kakannato n te bong anne.

¹¹Are i mwiina, bon Tiamma are natin Akee te m'aane are kaain Ara. N te tai teuana a bootia aia taanga ni buaka kaain Biritia b'a a na urui taian uaanikai nako ake a maiu n te tawaana teuana i rarikin Rei. A biri nako angiia tautian Iteraera mairouia Iteraera,

¹²ma e tei Tiamma i nuukan te tawaana n tiringiia kaain Biritia. A aki mate taian aroka, ao E anga te tokanikai ae e korakora te UEA nakoia Iteraera.

¹³N te ririki teuana i nanon tain te tai, a m'ananga Taani Buaka ake Teniman b'a a na kawara Tawita n te tabo are Nanganangan B'aan Aturam.[16] A tia ana taanga ni buaka Biritia ni katea aia kaemb'a ni M'aruan Rebaim

¹⁴ao e a tia n reke irouia Betereem. E mena Tawita i nanon ana nono,

¹⁵ao e a rangi n taka. Ao e taku, “Tera ngke reke nimau man ranin te m'anib'a are ni mataroan Betereem.”

¹⁶Ao a raba nako naba taani Buaka ake Teniman nakon aia kaemb'a kaain Biritia ao a anaa te ran man te m'anib'a are i rarikin mataroan Betereem. Ma ngke a tia ni uota te ran nakon Tawita, e a manga rawa n nimma. Ma e a manga kab'aroa b'a te karea

¹⁷ao e taku nakon te UEA, “I aki konaa n nima te ran aei! Bon raraaia m'aane aikai aika a anga maiuia ibuku.” A karaoi m'akuri n ninikoria aikai Taani Buaka Aika Teniman aikai.

¹⁸Bon te tia kairiiri irouia Taani Buaka ake Teningaun tarin Ioaba are Abitiai, ao n te buaka teuana e tiringiia tenibubua te m'aane n ana kainiwai. Bon te tia buaka ngaia ae tanoata taekana kaanga Taani Buaka ake Teniman

¹⁹ao ni koauana e bon roko naba tanoatan arana kaanga Taani Buaka ake Teningaun. Bon te kam'anta ngaia irouia Taani Buaka ake Teningaun, ma e bon tuai naba ma ni kaaina te Taanga ni Buaka ake Teniman.

²⁰Bon te aomata ae e ninikoria Benaia are natin Ioiata te m'aane are man Kabeteera are e karaoi b'aai aika a kamimii. E tiringiia uoman ana taani buaka Moaba aika a bane aroia, [17] ao ni bongin te kam'aitoro teuana e ruona b'angan te raian ao e tiringa te raian.

²¹N te tai teuana, e tiringa kaain Aikubita, ae e rangi ni buubura kaanga te aintoa.[18] Iai ana kainiwai kaain Aikubita arei, ao bon akea te b'ai ae e uotia Benaia b'a ti te ambo. E rawea ana kainiwai kaain Aikubita arei Benaia ao e tiringnga iai.

²²E karaoi baikai Benaia. E bon tuai man raoniia Taani Buaka ake Teniman,

²³ma e bon roko naba kakannatona ni kakannatoia ni kabane Taani Buaka ake Teningaun. Ma Tawita e karikia b'a mataniwiia taan tararuaia.

²⁴Aikai tabeman mai buakoia Taani Buaka ake Teningaun:

²⁵Ataera are tarin Ioaba, Ereanan natin Toto te m'aane mai Betereem

²⁶Tiamma mai Arota, Erika are kain Arota Ereti are kanoan Baretaite

²⁷Ira are natin Iketi mai Tekoa, Abietera mai Anatota Mebunnai [19] are kanoan Utia.

²⁸Taremon are kanoan Aoa, Maarai mai Netob'a

²⁹Ereba are natin B'aana te m'aane mai Netob'a, Itai are natin Ribaai te m'aane mai Kireata man te baronga are Beniamin

³⁰Benaia mai Biraton, Itai man karaangan nako aon te Maunga are Kaati

³¹Abiarebon man Beta Arab'a, Atimaweta mai Baurim[20]

³²Eriaba mai Tiaarebon Iaten[21]

³³Ionatan are natin Tiamm'a te m'aane are kaain Ara[22]

³⁴Aiam are natin Tarara te m'aane are kaain Ara, Eribereta are natin Aatib'ai te m'aane mai Maaka

³⁵Eriam are natin Aitobera te m'aane mai Kiro, Etiro mai Karemera ao B'aarai are kanoan Arabi

³⁶Ikara are natin Natan te m'aane mai Tib'a, Bani are kanoan Kata ao Tereka mai Ammon

³⁷Naarai mai Beerota, are e uouota ana b'ai ni buaka Ioaba are natin Teruia te m'aane

³⁸Ira are kanoan Ietera, Kareb'a are kanoan Ietera ao ai Uria are kanoan Eta

³⁹Bootaia ni kabane bon teningaun ma itiman.