Read Te B'aib'ara 2.Tamuera 3 Bible Online

2.Tamuera 3 - Te B'aib'ara bible

2.Tamuera 3

¹Bon moanan te buaka ae e anaanau te buaka aei imarenaia ake a tei i bukin Tauro ma ake a tei i bukin Tawita. E rikirake ni mamaara korakoran Tauro, ma e rikirake ni buubura m'aakan Tawita.

²A bungiaki natin Tawita tabeman m'aane ngke e maeka Tawita i Eberon.

³Natina te m'aane are te karimoa bon Ammon, are tinana bon Nei Ainoam man te kaawa are Ietireera. Natin Tawita te m'aane are te kauoman bon Kireaba, are tinana bon Nei Abikaira, are e a tia ni mare ma Naab'ara are kaain Karemera.

⁴Ao te kateniman bon Abetarom. Ao tinana bon Nei Maaka, are natin te uea are Taremai are kaain Keturi. Natina te kaaman bon Atoniia, are tinana bon Nei Akita.

⁵Te kaaniman bon Teb'atia, are tinana bon Nei Abitara. Te kaonoman bon Iteream are tinana bon Nei Ekera, temanna naba mai buakoia buun Tawita.

⁶N te tai are e reitinako iai te buaka imarenaia ana utu Tawita ma Tauro, ao e rikirake riki m'aakan Abenera nakon te tai are mai m'aaina i nanon ana utu Tauro.

⁷E a bon matu naba ma buun Tauro temanna are Nei Ritiba are natin Aiia. Ma e taku Itiboteta are natin Tauro nakon Abenera, “Ko riai n aki matu ma buun tamau temanna!”

⁸Ma e rangi ni maraki nanon Abenera n ana taeka Itiboteta, ao e taku nakon Itiboteta: Ko taku b'a antai ngai, kamean Iuta ae akea manenana? I a tia ni kakaonimaki nakoia ana utu tamam ao nakoia ana koraki ma raoraona nako. I tuai man anga ngkoe nakon Tawita. Ao ngkai ko a taetae n aron anne nako iu b'a kaanga aei aron ae iai au kaairua ma te aine aei.

⁹I buubutiia te Atua b'a e na buokai ngkana I aki buoka Tawita n anganna te b'ai ae E berita iai te UEA nakoina!

¹⁰E taekinna te UEA b'a E na aki manga kauea temanna man ana utu Tauro ao e na onomwi Tawita n riki ni uea. E taekinna naba b'a E na tautaeka Tawita i Iteraera ao i Iuta, ao n taabo nako mai Taan i meaang nako Beerateb'a i maiaki.

¹¹E rangi ni maaka Abenera teuare Itiboteta n te aro are e aki konaa naba ni kaeka.

¹²Ao e kanakoia ana rorobuaka Abenera nakon Tawita ma te rongorongo ae e kaangai, “Ko na riki b'a te tia tautaeka i bukin te botannaomata ae e b'anin, ngkana ko karaoa te boraraoi ma ngai, N na kairoroia aomata nako i aon Iteraera b'a a na karaoiko b'a aia uea.”

¹³Ao e kaoka te rongorongo Tawita ae e kaangai, “E tamaroa! N na karaoa te boraraoi ma ngkoe. Ma I m'aain ae I taetae ma ngkoe i aon te b'ai aei, ko na riai moa ni kaoka natin Tauro te aine nako iu.”

¹⁴Ao e kanakoia ana mataniwi Tawita ma te rongorongo aei nakon Itiboteta: “Kaoka Nei Mikara are buu nako iu! I a tia n tiringiia tebubua m'aitiia kaain Biritia i bukin mareakiu ma neienne.”

¹⁵E kanakoia tabeman rorobuaka b'a a na anaa Nei Mikara mairoun buuna are e boou, are Baretiera are natin Raiti te m'aane.

¹⁶Ao e ira Nei Mikara teuare Baretiera ao rorobuaka akekei ni karokoa B'aurim, ma te tangitang ngke a tabe n nakonako. Ma e a okira mwengana ngke e a kaokia Abenera.

¹⁷Ao e taetae Abenera ma taani kairiiri man barongan nako Iteraera ni kaangai, “Ngkai kam tangiria ni karika Tawita b'a ami uea n aki toki.

¹⁸Ma ngaia are, kam riai ni karaoa anne! B'a E a tia n taekinna te UEA b'a E na kamanenaa Tawita ni kamaiuia Iteraera mairouia aia kairiribai, ma ai moara ra riki mairouia kaain Biritia.”

¹⁹Ao n tokina, e a taetaenikawai Abenera ma te baronga are Beniamin. Ao i mwiina, e kiitana Eberon n tuanga Tawita b'aai ni kabane are a tangiria kaain te baronga are Beniamin ao nikiraia Iteraera ni karaoia.

²⁰E kairiia uangaun tautia ma ngaia Abenera, ao ngke a roko i Eberon, e karaoa butim'aeana Tawita n te bootaki n am'arake ae e korakora.

²¹Ao e taku Abenera i mwiin te baka n am'arake, “Ko kariaia b'a N na nako ngkai, ao N na kaoka Iteraera nako ikai i bukin karaoan te boraraoi ma ngkoe. Ko na riki b'a te uea i bukin te botannaomata ae e b'anin, n aron are ko tangiria.” Ao Tawita, e tuanga Abenera b'a e nang nako, ao e nako, ao akea te kiriwe ae e karaoia.

²²Ao n te tai ae e aki maan i mwiin nakon Abenera mai Eberon, ao a oki Ioaba ma tabeman ma ana tautia Tawita, ma uotaia b'aai aika a m'aiti aika a uoti man aia kaawa aia kairiribai.

²³Bon i m'aain rokoia, iai aika a tuanga Ioaba ni kaangai, “E kawara te uea teuare Abenera, ao e kariaia b'a e na nako. Ao e nako Abenera, ao akea te kiriwe ae e karaoia.”

²⁴Ao e nako Ioaba ni kawara Tawita ao e taku, “Tera ngkai ae ko karaoia? E roko Abenera nakoim, ao ko kariaia b'a e na nako. Ao ngkai e a maan n nako!

²⁵Ko ataa Abenera-e roko b'a e na kam'aneko. E tangiria ni kan ataa korakoraia am taanga ni buaka ma n atai baika ko karaoi ni kabane.”

²⁶Ao e kiitana Tawita teuare Abenera, ao e kanakoia tabeman taan uarongorongo b'a a na ri mwiina. Ao a kaokia man te m'anib'a are Tira, ma bon akea te b'ai ae ataia Tawita.

²⁷Ao ngke e roko Abenera i Eberon, ao e a bakaaea te kan maroroo teuare Ioaba ma ngaia ni karaba. Ma ngaia are, e kaira Abenera nakon te ru teuana ae e uarereke ake bon m'akoron naba mataroan te kaawa ao e ewara birotona. E tiringnga Ioaba i bukina ngke e a tia Abenera n tiringa tarina are Ataera.

²⁸Ao e ongo Tawita ae e tiringaki Abenera iroun Ioaba ao e taku, “I tuea nakon te UEA b'a I bon aki bure ni maten Abenera!

²⁹A bure iai Ioaba ma ana utu. Bon au tataro b'a a na taonaki n te aoraki ae te kaboa ana utu Ioaba n taai nako ao aorakin te kun ake tabeua. A na riki b'a aomata aika a kibiubiu, ao a na mate n te buaka ke te baki.”

³⁰A tiringa Abenera teuare Ioaba ma tarina are Abitiai i bukina ngke e tiringa tariia are Ataera n te buaka i Kibeon.

³¹Ao e tuangiia aomata ni kabane ake raonna ni kaangai, “Kaota nanokawakimi n raeuai kunnikaimi ao ni karin kunnikai aika a mangaingai! Kam na nakonako ririmoan Abenera ao kam na tang!” E nakonako Tawita i akuun te b'ai are e uouotaki iai rab'atan Abenera.

³²E taunaki Abenera i Eberon, ao e tei Tawita ma aomata nako ietan ruana ao a tang n takaarua.

³³Ao i mwiina, e anenea te tanginimate te uea i bukin Abenera ae e kaangai: Abenera, e aera ngkai ko na mate kaanga te tia riri aon taian tua?

³⁴Bon akea ae e kabaei baim ke n taui waem n te taurekereke, ko mate b'a konaia taan tiritiri. Ao a manga bane aomata n tang riki.

³⁵Ao i mwiina, a uota te am'arake teutana nakon Tawita ao a tuangnga b'a e na reke raun nanona ngkana e am'arake teutana. E tuai ni bong, ao e taku Tawita, “I tuea nakon te Atua b'a N na bon aki tenaa naba teutana te kariki ke te b'ai teuana i m'aain bungin taai!”

³⁶Ao a bane aomata n ataa te b'ai are e karaoia Tawita, ao a kariaia, ni bon aroaroia n taai nako are a kukurei ni b'aai ni kabane ake e karaoi.

³⁷Ao a kakoauaa ngkai kaain Iuta ao Iteraera b'a bon akea rekereken Tawita ma tiringakin Abenera.

³⁸Ao e taku Tawita nakoia ana mataniwi. “Kam aki ataia ae e a tia ni mate n te bong aei temanna ana tia kairiiri Iteraera ae e korakora?

³⁹Bon te uea ngai ae I rineaki, ma bon iai riki m'aakaia Ioaba ma Abitiai nakon ae I karaoia. Ma ngaia are, E na bon kabooa mwiin te m'akuri ae e buakaka te Atua ae a karaoia.”