Read Te B'aib'ara 2.Tamuera 5 Bible Online

2.Tamuera 5 - Te B'aib'ara bible

2.Tamuera 5

¹Ao a kaaitibo taani kairiiri mai Iteraera ma Tawita i Eberon ao a taku, “Bon am koraki ngaira.

²Ngke e bon uea naba ngkoa Tauro, ao ko bon kairiia naba ara botannaomata nakon te buaka. E a tia ni berita te UEA b'a ko na riki b'a te tia tautaekana Iteraera ma ni kaawakinna kaanga te tia kaawakintiibu.”

³Ao e karaoa ana boraraoi ma taani kairiiri Tawita i nanon tain te boowi, ao e butiia te UEA b'a e na riki b'a aia tia kakoaua. Ao i mwiina, a kab'aroa b'aan te oriwa taani kairiiri i aon atuun Tawita ni kaotia b'a e a uea man te tai aei i aon Iteraera.

⁴Ai tenibwi ana ririki ni maiu Tawita n te tai are e riki iai b'a te uea, ao e tautaeka i nanon abwi te ririki.

⁵E maeka i Eberon i nanon ana moan ririki ake itiua ma te iterana te ririki ao n tautaekana ti Iuta. Ao i mwiina, e a manga m'aing nako Ierutarem, ike e a tautaekani iai Iteraera ma Iuta i nanon tenibwi ma tenua te ririki.

⁶A maeka kaain Iebuti i Ierutarem, ao a kaira ana taanga ni buaka Tawita ni buakaniia. A aki kaantaningaia kaain Iebuti b'a e na konaa n rin, ma ngaia are, a taku nakoina, “Ko aki konaa n rin ikai! Ti konaa ni kakionakoko, e ngae ngkana ti mataki ke ti aki konaa n nakonako!”

⁷Ao e taku Tawita nakoia ana taanga ni buaka, “Kam na riai n rin man kawain te ran ni karekeia kaain Iebuti aikai.

⁸I aki ribaia aomata aika a aki konaa n nakonako ke a mataki.

⁹Bon anne bukina ngkai iai te tua ae e kaangai, “Bon ti aomata aika a konaa n nakonako ke a noraaba aika a kariaiakaki i nanon te tembora.” E taua te nono are i aon Maungan Tion Tawita, ao i mwiina, e a manga m'aing nako ikekei, ao e arana te tabo arei b'a Ana Kaawa Tawita. Ao e a manga karaoa te kaawa arei, ni moanna man kanoaan nanona are mai mainiku.

¹⁰Ao e riki b'a te uea ao te tia tautaeka Tawita ae e korakora, i bukina ngke E mena te UEA ae Moan te M'aaka i rarikina.

¹¹E kanakoia ana mataniwi tabeman Uean Turo are Iram nakon Tawita. Ao a airi ma ngaiia taani kaabenta ma taani koroatiibu, ao a uoti kaai aika taian tiira b'a aonga ni konaa ni katea ana bareti Tawita.

¹²Ao e ataia Tawita b'a bon te UEA ae e karikia b'a te uea i aon Iteraera ao E a tia ni karikia b'a te tia tautaeka ae e korakora i bukin karaoan te raoiroi nakoia ana aomata.

¹³Ao i mwiina, ngke e a kiitana Eberon Tawita nako Ierutarem, e a mare ma aine aika a m'aiti ao a riki natina aika a m'aiti.

¹⁴Aikai natina ake a bungiaki ikekei: Tiammua, Tiobaba, Natan, Toromon,

¹⁵Iba, Eritua, Nebeki, Iabia,

¹⁶Eritiama, Eriata, ao Eribereta.

¹⁷Ao a ongo kaain Biritia ae e a uea ngkai Tawita i aon Iteraera, ao a roko nakon aaba ake a tabukibuki ni kataia ni taua. Ma e ataia Tawita ao e nako n rin n ana nono.

¹⁸Ma ngaia are, a kaemb'a n te M'arua are Rebaim.

¹⁹Ao e titirakina te UEA Tawita ni kaangai, “N na buakaniia kaain Biritia ke N na aki? Ko na katokanikaiai ke ko na aki? Ao E tuanga Tawita te UEA ni kaangai, “Buaka! N na katokanikaiko.”

²⁰Ao e buakaniia kaain Biritia Tawita ao e konaiia. Ao e taku, I taratara te UEA ngke e urua aia taanga ni buaka kairiribai kaanga te ieka ae e korakora.” Ma ngaia are, e arana te tabo arei b'a “E uruaniia te UEA”

²¹Ao a uoti nako naba taian bouananti ake a katikui kaaini Biritia imwiia ana taanga ni buaka Tawita.

²²Tabeua te tai i mwiina, a manga oki kaain Biritia nakon aaba ake a tabukibuki ao a katei kaemb'a ni M'aruan Rebaim.

²³E titirakina te UEA Tawita b'a tera ae e na karaoia, ao e kaeka te UEA ni kaangai: Ko na aki buakaniia mai mataia. Naako katobibia mai akuiia ao buakaniia mai buakon taian aroka ake marubere.[4]

²⁴Kam na tataninga ikekei ni karokoa ae kam na ongo karongoaia taanga ni buaka aika a m'aati mai taberan taian aroka. Ao kam na kawaekoaingkami ni buaka! Nanon te tang anne b'a I a tia n rimoami ni m'aati ni buakaniia aia taanga ni buaka kaain Biritia.

²⁵Ao e ongotaeka Tawita iroun te UEA ao e konaiia kaain Biritia. E a bon kakionakoia ni karokoa a roko i Keeb'a are te kawai n rin nako Ketera.