Read Te B'aib'ara 2.Tamuera 7 Bible Online

2.Tamuera 7 - Te B'aib'ara bible

2.Tamuera 7

¹Ao e m'aing Tawita nakon te bareti ae e boou, ao te UEA e kariaia b'a e na waaki abanueana ma te rau.

²N te bong teuana, ngke e tabe n taetae Tawita ma Natan are te burabeti, ao e taku Tawita, “Nooria, I maeka n te bareti ae e karaoaki n te tiira, ma e meemena te Atiniberita i nanon te autinrianna.”

³Ao e taku Natan, “E mena te UEA iroum, ma ngaia are, ko na karaoa are ko bon taku!”

⁴N te tairiki anne, e tuanga Natan te UEA

⁵b'a e na nako ni kawara Tawita n anganna te rongorongo ae e kaangai: Tawita bon au tia m'akuri ngkoe, ma ngaia are, ko na ongora nakon te b'ai ae I taekinna. E aera ngkai ko na karaoa te tembora ibuku?

⁶I bon aki maeka n te tembora ngke I kaotinakoia au aomata mai Aikubita, ao I tuai ni maeka naba i nanon teuana n te tai aei. Bon mwengau te autinrianna n taabo nako ike I iriia nako iai.

⁷I rineia taani kairiiri ao I tuangiia b'a a na riki b'a taani kaawakintiibu i bukiia au aomata aika Iteraera. Iai te tai ae I tia iai n tuanga temanna mai buakoia b'a e na karaoa te tembora man te tiira ibuku?

⁸Tawita, aei au taeka Ngai ae te UEA ae Moan te M'aaka nakoim. I uotiko n nako mai man te tawaana are ko tararuaia am nanai n tiibu iai, ao I karikiko b'a te tia kairiiri irouia au aomata.

⁹I buokiko n taabo nako ike ko nako iai, I buokiko ni kamaunaia am kairiribai i boni matam. Ao I karikiko b'a temanna mai buakoia aomata aika kabanea ni kakannato ao n tanoata n te aonnaba.

¹⁰I a tia n anganiia au aomata aika Iteraera oin abaia ike a na konaa ni maeka ma te rau iai, ao a na aki manga ruru ni maaku riki. A na aki manga roko aomata aika a buakaka n aki karauaia, n aron are a tia ni karaoia ngkoa

¹¹ngke I kariaia taani motikitaeka b'a a na tautaekana au botannaomata. Ao I a tia n taraia ami kairiribai b'a a na aki buakaningkami. Ngkai I berita b'a ko na uea ma am kariki.

¹²N na rinea temanna mai buakoia natim m'aane b'a e na uea ngkana ko a roko n tokin maium ma n taunaki n ruanimateia am bakatibu. N na karikia b'a te tia tautaeka ae e korakora,

¹³ao bon akea temanna ae e na konaa n anaa abanueana mai rouna. Boni ngaia are e na katea te tembora ibuku.

¹⁴N na riki b'a tamana, ao e na riki b'a natiu te m'aane. N na kaetia ngkana e karaoa te kaairua, n aroia naati ngkana a kaetaki irouia aia karo.

¹⁵Ma N na bon kateimatoa au boraraoi ma ngaia, n arou ngkoa ngke I katoka au boraraoi ma Tauro, are e uea ngkoa i m'aaim.

¹⁶N na kakoauaa raoi b'a e na uea n taai nako temanna mai buakoia am kariki.

¹⁷E tuanga Tawita te burabeti are Natan b'aai ni kabane ake e ongo raoi n te mii.

¹⁸Ao e nako Tawita n rin n te autinrianna are e a tia ni kateia i bukin te Atiniberita. Ao i mwiina, e tekateka ikekei n tataro ni kaangai: Te UEA ae Moan te M'aaka, e bon riai n aki reke nako iu ma au utu te b'ai ae Ko a tia ni karaoia nakoira,

¹⁹ma e ngae n anne, Ko a tia ni berita b'a ko na karaoa riki ae e m'aiti. Bon aei arom ae e ko kaakaraoia nakoia am aomata?

²⁰Bon am tia m'akuri ngai, ao Ko atai au iango nako, ma ngaia are, bon akea riki te b'ai ae I tangiria n taekinna.

²¹Ko a tia ni karaoa te m'akuri ae e kamimii aei, ao Ko kariaia b'a N na ataia, i bukina ngke Ko tangiria ni kakoroa bukin am berita.

²²Te UEA ae Moan te M'aaka, Ko korakora riki nakoia ake tem'angina. Bon akea ae ti te bo ma Ngkoe, bon ti Ngkoe te Atua. A bane ni koaua b'aai ni kabane aika taekam ake ti ongo.

²³Bon akea riki te botannaomata n te aonnaba ae ti te bo ma Iteraera, te botannaomata are Ko kamaiua man te tautoronaki i Aikubita b'a a na riki b'a oin Am b'ai. Ko moanna n ataaki ni karaoan kakai aika a kamimii ngkana Ko kairoroia botannaomata ma antiia b'a a na kiitana abam, b'a a aonga ni konaa ni maeka ikai Am aomata.

²⁴Ko a tia ni rinea Iteraera b'a Am aomata n aki toki, ao Ko a tia n riki b'a Atuaia.

²⁵Ao ngkai te UEA ae te Atua, taiaoka ni karaoa te b'ai are Ko a tia ni berita iai nako iu ma au kariki nako.

²⁶Ao ane E na tanoata iai taekam n aki toki, ao ane a na bane ni kaangai aomata, “E tautaekana Iteraera te UEA ae Moan te M'aaka, ao ana uea aika e rineia bon Tawita ma ana kariki nako.”

²⁷E ngae n anne, bon te UEA ae Atuan Iteraera ae Moan te M'aaka Ngkoe. Ko a tia n tuangai b'a ko na karikiia b'a uea au kariki nako, Ao bon anne ngkai I kaungaaki n tataro nakoim n aron aei, e ngae ngkai bon ti am tia m'akuri ngai.

²⁸Te UEA ae Moan te M'aaka, bon te Atua Ngkoe. Ko a tia ni berita ni b'aai tabeua aika a raraoi nako iu, ao ko bon kakoauaaki b'a Ko na karaoa te b'ai are Ko a tia ni berita iai.

²⁹I butiiko b'a Ko na kakab'aiaia au kariki ma ni kariaia b'a a na riki b'a uea aika a rineaki. Ko a bon tia ni berita iai, ao I kakoaua b'a Ko na bon kakab'aiaa au utu n aki toki.