Read Te B'aib'ara 2.Tamuera 9 Bible Online

2.Tamuera 9 - Te B'aib'ara bible

2.Tamuera 9

¹N te bong teuana, e iango Tawita ao e taku, “N na rangini miimi ngkana iai ana utu Tauro aika teimatoa ni maiu. Ngkana iai, ao N na bon kaota akoaia, b'a I a tia ni karaoa au berita nakon Ionatan.”

²Ao Tawita, e wetea Tiba are temanna mai buakoia ana taani m'akuri ana utu Tauro. E taku Tawita, “Boni ngkoe Tiba.” “Eng boni ngai.”

³Ao e titiraki Tawita ni kaangai, “Iai ngkai ana utu Tauro ae e maiu? Ngkana iai, ao N na bon akoia.” Ao e kaeka Tiba ni kaangai, “E boni maiu naba ngkai temanna natin Ionatan te m'aane, ma e aki konaa n nakonako.”

⁴Ao e titiraki Tawita ni kaangai, “Ao e ngaa ngkai?” Ao e kaeka Tiba ni kaangai, “E maeka i Roteba iroun Makira are natin Amiera te m'aane.”

⁵Ao e kanakoia tabeman ana taani m'akuri Tawita b'a a na anaa natin Ionatan te m'aane mai Roteba.

⁶Arana bon Mebiboteta, ao bon tibun Tauro te m'aane. E roko iroun Tawita ao e boobaraaki. Ao e titirakinna Tawita ni kaangai, “Bon Mebiboteta ngkoe?” Ao e taku, “Eng, teuae ko karineaki.”

⁷Ao e taku Tawita, “Ko na aki maaku. N na akoiko b'a ngaia tamam Ionatan. N na anganiko te aba are ana b'ai tibum are Tauro. Ao i rarikin anne, ko na am'aam'arake i rarikiu n au taibora.”

⁸E a manga bobaraaki riki Mebiboteta ao e taku, “E aera ngkai ko tabeakinai? E manena riki te kamea ae e mate nako iu.”

⁹Ao e wetea Tiba are mataniwiia ana taani m'akuri Tauro ao e taku, “N na angan Mebiboteta b'aai ni kabane ake ana b'ai am toka are Tauro ma ana utu ngkai bon tibun Tauro Mebiboteta.

¹⁰Ko na m'akuri ngkoe ma natim m'aane ake tengaun ma niiman i bukin Mebiboteta. Kam na unika te aba ma n uoti uaana nakoina, b'a a aonga n reke kanaia ana utu ma ana taani m'akuri Tauro. Ma e na am'aam'arake Mebiboteta ma ngai n au taibora.”

¹¹Ao e kaeka Tiba ni kaangai, “N na karaoi b'aai ni kabane akana ko taekin teuae ko karineaki.”

¹²Ma ngaia are, a m'akuri ana utu Tiba i bukin Mebiboteta.

¹³E m'auku Mebiboteta, ma e a maeka i Ierutarem ao e am'aam'arake man ana taibora Tawita, kaanga aroia oin natin Tawita. Ao e a reke oin natina, ae arana Mika.