Read Te B'aib'ara 1.Uea 1 Bible Online

1.Uea 1 - Te B'aib'ara bible

1.Uea 1

¹E a bon rangi ni kara ngkai te uea are Tawita, ao e a rangi ni mamariri e ngae ngkana e rabunaki ni burangketi aika a rawata.

²Ao a taku ana aobitia, “Te uea, ae ko karineaki. Ti na kakaaea te ataeinaine ae e na tararuaiko. E na wene i rarikim ni kakabueeko.”

³Ao a kakaaenako ni kabutaa aon Iteraera ni karokoa e reke ataeinainen Tunem ae moan te tikiraoi.

⁴A kairia nakon Tawita, ao e tararuaa Tawita neierei. E aki roko n te matu Tawita ma neirei.

⁵Natin Tawita te m'aane ma Nei Akita bon Atoniia. Boni karimwiin Abetarom, ao e rangi ni botonim'aane. Ao n te bongi teuana, ao e taetae ni karietata Atoniia ao e taku, “N na riki b'a te uea.”

⁶Ma ngaia are, e a karekei ana kaanibuaka ma ana aoti, ao e kabooia nimangaun te m'aane b'a taani kaawakinna. Ao e aki kan takuia Tawita n ana waaki arei. Ma ngaia are, e aki roko n te taetae nakon Atoniia n te b'ai are e karaoia.

⁷Ao e kaaitibo Atoniia ma Ioaba are natin Teruia, ao e kaaitibo naba ma Abiata are te ibonga, ao e buubutiia b'a a na buokia ni kauea, ao a kaai ni kariaia buokana.

⁸Ma a rawa Tatoka are te ibonga ma teuare Benaia are natin Ieoiata, ma Naatan are te burabeti, ma Timei, ma Rei, ao taani kawakina Tawita, n tei i bukina.

⁹Ao Atoniia e kaoiia tarina nako ma ana aobitia nako Tawita ma Iuta b'a a na iria nakon te B'a are Toreta are i rarikin koburaken ranin Rokera, ike e anga iai ana karea tabeua tiibu, kaom'aane, ao kaao ataei aika a marika.

¹⁰Ma e aki kaoa Natan ke Benaia ke taani kaawakina Tawita, ke ai tarina are Toromon.

¹¹Ao ngke e ongo Naatan te b'ai are e riki, ao e titirakina Nei B'atateb'a are tinan Toromon ni kaangai: “Ko bon tuai n ongo ae e a tia n aaia ueana i boni i rouna Ten Atoniia are natin Nei Akita? Ma e aki ataa te b'ai teuana Tawita.

¹²Ao ko na tiringaki ngkoe ma natim are Toromon, ma ti ngkana ko karaoa te b'ai ae N na tuangko, ao kam na aki tiringaki.”

¹³Naako taetae nakon Tawita ni kaangai, “Ko bon aki berita ngkoa nako iu b'a e na uea Toromon i mwiim, ma e aera ngkai e a uea Atoniia?

¹⁴Ngke ko bon tabe n taetae ma Tawita ao I a roko naba ni manga tuanga Tawita b'a a koaua ni kabane b'aai ake ko taekin.”

¹⁵Ao e mena Tawita n ana runimatu ike e tararuaaki iroun Nei Abitaika i bukina ngke e a rangi ni kara. Ao e rin Nei B'atateb'a

¹⁶ao e bobaraaki. Ao e taku Tawita, “Tera ae ko iangoia?”

¹⁷Ao e taku Nei B'atateb'a: “Te uea ae ko karineaki. Ko berita ngkoa nako iu n aran te UEA ae Atuam b'a e na uea natiu ae Toromon i mwiim.

¹⁸Ao ngkai, e a tia n riki b'a te uea Atoniia, ao akea te b'ai ae ko ataia.

¹⁹E anga taiani kao ma kao ataei, ao taian tiibu aika a m'aiti b'a a na karea. Ao e kaoa Abiata are te ibonga, ma Ioaba are mataniwiin te taanga ni buaka, ao natim m'aane ni kabane, ma ti Toromon ae te toro ae e kakaonimaki ae e aki kaoa.

²⁰Te uea ae ko karineaki. A bane n tataningaa am babaaire Iteraera ni kabane b'a antai ae ko na katanoataa b'a e na uea i mwiim.

²¹Ngkana ko aki katanoata b'a antai ae e na uea i mwiim, ao ane a na taku aomata b'a I kamangao ma Toromon. Ane a na karaoira b'a kaanga buure ao a na tiringiira bon i mwiin naba matem.”

²²Ao e a kaoti te burabeti are Natan,

²³ao e kaongoaki Tawita, ao e a roko Natan, ao e a rin. E bobaraaki ni kabo matana ma aontano

²⁴ao e taku: “Te uea ae ko karineaki, ko bon tua b'a e na kaueaaki Atoniia?

²⁵Ngke e ingabong riki ao e tiringi taiani kao ma kao ataei ao taian tiibu aika a m'aiti. E kaoiia taiani mataniwi n te taanga ni buaka, Abiata, ao natim m'aane ni kabane nako ikekei. Ao a am'arake ni kukurei ma ni mooi ni karokoa te tai aei ma n tatakarua ni kaangai, ‘E na teimatoa maiun te uea ae Atoniia!’

²⁶Ma e aki kaoai ke Tatoka are te ibonga ke Benaia ke Toromon.

²⁷Ko bon tuangiia b'a a na karaoa anne, ao a aki kaongoira aomata ni kabane b'a antai ae e na uea i mwiim?”

²⁸Ao e taku Tawita, “Tuanga B'atateb'a b'a e na nako mai.” Ao e roko n tei i matana.

²⁹Ao e taku, “E a tia ni kaawakinai UEAN Iteraera ae E maiu. Ma ngaia are, n te bong aei

³⁰N na kakoroa bukin te berita are I karaoia ngkoa nakoim n aran te UEA. E na riki Toromon b'a te uea ae e boou.”

³¹Ao e bobaraaki B'atateb'a nako aontano ao e taku, “Bon au tataro b'a e na anaanau maium.”

³²Ao e taku Tawita, “Tuangiia Tatoka, Natan ao Benaia b'a a na nako mai.” Ao ngke a roko,

³³ao e taetae nakoia ni kaangai: “Kairiia tabeman au aobitia b'a kam na katokaa Toromon i aon au miure [1] ao kairiia nakon Koburaken ranin Kion.

³⁴Ngkana kam roko ikekei, ao a na karaoa kaueaan Toromon b'a uean Iteraera ae boou Tatoka ma Natan. Ao i mwiin te kauea, ngkana e a b'ara ao kam na karekea temanna ae e na katanga te bu ma n tuangiia aomata b'a a na takaarua ni kaangai, ‘E na teimatoa maiun te uea ae Toromon.!’

³⁵Kaokia rikaaki nako ikai b'a e na onea mwiiu ni uea. Boni ngaia ae I a tia n rineia b'a e na uea i aon Iteraera ma Iuta.”

³⁶Ao e kaeka Benaia ni kaangai, “Ti na karaoa anne, te uea ae ko karineaki. Bon au tataro b'a E na kakororaoia te UEA ae Atuam.”

³⁷E bon tararuaiko te UEA n taai nako, ao bon au tataro b'a E na manga tararuaa Toromon ngkai. Tera ngke E buoka Toromon ni karikia b'a te uea ae korakora riki nakoim.

³⁸Ao a nako Tatoka ma Natan ao Benaia ao a kairiia uakoraki ana taani kaawakina Tawita aika a bane aroia. Ao e toka Toromon i aon ana miure [2] Tawita ngke a m'ananga nakon Koburaken ranin Kion.

³⁹E uota b'aan te oriwa Tatoka are te ibonga man te Um'antabunrianna, ao e kab'aroa i aon atuun Toromon ni kaotia b'a e a uea ngkai. E tangi te bu, ao a bane n takaarua aomata ni kaangai, “E na teimatoa maiun te uea ae Toromon.”

⁴⁰Ao a katangi taiani kaib'ab'aa, ao a kukurei ngke a riri mwiin Toromon n okira Ierutarem. E bon rangi ni korakora karongoaaia n te aro are e a ruru aontano.

⁴¹E a tib'a tia n am'arake Atoniia ma ana iruwa ngke a ongo te karongoa. Ao e ongo naba tangin te bu Ioaba, ao e titiraki ni kaangai, “Ai tera te karongoaa ae e korakora ae e nako man te kaawa?”

⁴²Ao ni bon te tai naba arei, ao e a biri n roko Ionatan are natin te ibonga are Abiata. Ao e taku Atoniia, “Rin nako. E na bae ni iai te rongorongo ae e raoiroi mairoun te aomata ae e kakannato n ai arom.”

⁴³Ao e taku Ionatan, “Bon akea! Ara uea ao ara toka ae Tawita e a tia ni katanoataa b'a e a uea Toromon.

⁴⁴E toka Toromon i aon ana miure Tawita ngke a m'ananga nakon Koburaken ranin Kion, ao a iria Tatoka, Natan, Benaia, ao taani kawakina Tawita ake a bane aroia.

⁴⁵Ao ngke a roko ikekei, ao e a karaoaki kaueaan Toromon iroun Tatoka, Natan ao Benaia. Ao a bane ni kukurei aomata i aon kawaia n okira Ierutarem. Bon anne bukin te karongoa are kam ongo are e nako man te kaawa.

⁴⁶E a uea ngkai Toromon.

⁴⁷Ao ongora aia taeka ana aobitia Toromon nakon Tawita, “Bon ara tataro b'a E na buoka Toromon Atuam ni karikia b'a te uea ae e korakora riki nakoim.” E wene Tawita i aon ana kainiwene n te tai arei ma e bobaraaki

⁴⁸ao e tataro ni kaangai, “I neboiko Atuan Iteraera. Ko a tia ni karika natiu ae Toromon b'a te uea ao ko kateimatoa maiu b'a N na kauia.”

⁴⁹Ao a ruru ni maaku ana iruwa Atoniia ngke a ongo te rongorongo aei, ao a kabiri m'aakaia ni birinako.

⁵⁰Ao e maaku Atoniia b'a tera ngkai ae na karaoia Toromon nakoina, ma ngaia are, e biri nakon te Um'antabunrianna ao e taui ni kamatoa baina i aon koonan te baonikarea.

⁵¹Ao iai ae e kaongoa Toromon ni kaangai, “E maakuko Atoniia ao e tangiriko b'a ko na berita b'a ko na aki tiringnga.”

⁵²Ao e taku Toromon, “Ngkana e aki karaoa te kakiriwe Atoniia, ao N na bon aki kaikoakia, ma ngkana e karaoa te kakiriwe ao N na bon tiringnga.”

⁵³Ao e kanakoa temanna nakon te baonikarea b'a e na anaa Atoniia. Ao ngke e a tia ni bobaraaki Atoniia, ao e taku Toromon nakoina, “Atoniia, naako okira mwengam.”