Read Te B'aib'ara 1.Uea 18 Bible Online

1.Uea 18 - Te B'aib'ara bible

1.Uea 18

¹Ao e aki b'aka te karau i nanon tenua te ririki i aon Taamaria, ao e a moanna n tare te am'arake n taabo ni kabane.

²Ao E taku te UEA nakon Eria, “Naako kawara te uea are Aaba b'a N nang kab'aka te karau n te tai ae e aki maan.” Ma ngaia are, e a nako Eria ni kawara Aaba.

³Ao e riki Ob'aria b'a te tia tararua ana bareti Aaba n te tai anne, ma e bon kakaonimaki naba n taromauria te UEA.

⁴Bon Ob'aria are e karabaia 100 Ana burabeti te UEA n taian nangananga ni b'a ake uoua ao e kakarekei kanaia ma nimaia ngke e kataia Nei Ietebera n tiringiia. Ao e kanaanako wetean Ob'aria te uea are Aaba

⁵ao e taku, “Ti na riai ni kakaaea kanaia ara aoti ma ara miure [18] Ao ngkana ti aki ao e raoiroi riki ngkana ti tiringiia. Ti na nako ni kakaaea te uteute ni kabutaa aon te aba i rarikin taiani karaanga aika a uarereke ma koburake n ran.

⁶Ko na nako n te kawai teuana, ao ngai te kawai teuana.” Ao i mwiin arei, ao a waakinako ni kawaia aika a kakaokoro.

⁷Ao ngke e tabe ni waaki nako Ob'aria i aon kawaina, ao e kaaitibo ma Eria. Ao e kinaa Eria ma ngaia are, e bobaraaki nakon Eria ao e taku nakoina, “Eria, bon ngkoe anne?”

⁸Ao e taku Eria, “Eng. Ko na nako n tuanga Aaba ae I mena ikai.”

⁹Ao e taku Ob'aria: Ane e na tiringai Aaba ngkana I tuangnga anne. Ao bon akea te kairua ae I a tia ni karaoia.

¹⁰I tuea nakoim n aran te UEA ae maiu ae Atuam b'a e a tia te uea ni kakaaeko n taabo nako. E kanakoia aomata b'a a na tarataraiko n aaba nako, ao ngke a bon aki roko n te kuneko ao e tuangiia taani kairiiri ni kabane n aaba nako b'a a na tuea ae bon akea ngkoe i abaia.

¹¹Ao ngkoe ko bon tangiria b'a N na tuangnga ae ko mena ikai?

¹²Tera ngke E waekoa n anaiko Tamnein te UEA n te tai are I kitaniko naba iai? B'a ngkana e roko Aaba n anaiko ao ko na bon aki reke i rouna. Ao ane e na manga bon tiringai. I bon tataromauria te UEA mangke te ataeinim'aane ngai.

¹³Boni ngai naba are I karabaia tebubua ana burabeti te UEA n te nangananga ni b'a ngke e kataia Nei Ietebera n tiringiia. I bon anganganiia naba kanaia ma nimaia.

¹⁴Ko bon tangirai b'a N na tuanga Aaba ae ko mena ikai? E na bon tiringai.

¹⁵E taku Eria, “Boni ngai ana toro te UEA ae E maiu ae Moan te M'aaka, ao I berita n arana b'a N na kaitibo ma Aaba n te bong aei.”

¹⁶Ao e nako Ob'aria ao e tuanga Aaba te tabo are e mena iai Eria. Ao e nako Aaba ni kawara Eria,

¹⁷ao ngke e nooria, ao e takaarua Aaba ni kaangai, “Ai boni ngkoe anne te tia kakiriwe i aon Iteraera. Ko rangi ni buakaka.”

¹⁸Ao e taku Eria, Tiaki ngai te tia kakiriwe ae moan te buakaka ma boni ngkoe. Boni ngkoe ma am utu aika kam aki ongotaeka nakon ana Tua te UEA ngkai kam taromauria B'aara.

¹⁹Weteia aomata ni kabane i aon Iteraera ao tuangiia b'a a na kawarai i taubukin te Maunga are Karemera. Ao ko riai naba n kairiia ana burabeti B'aara ake 450 ao 400 ana burabeti Nei Aatera ake a am'am'arake n ana taibora Nei Ietebera.

²⁰Ao e bootia aomata Iteraera ni kabane Aaba, ao a nako ni kawara Eria i aon te Maunga are Karemera.

²¹Ao e tei Eria i mataia ao e taku, “Ai ti maanra riki ngkami ni biribiri i marenan b'aai aika uoua? Ngkana kam taku b'a te Atua te UEA, ao taromauria. Ma ngkana te Atua B'aara ao taromauria.” Ao bon akea te b'ai ae a taekinna aomata.

²²Ao e a manga reitanako ana taeka Eria man taku, bon ti ngai ana burabeti te UEA ikai, ma a m'aiti ana burabeti B'aara b'a 450.

²³Uotimai uoman taiani kaom'aane. Anganiia ana burabeti B'aara temanna b'a a na tiringnga, ma ni korokoroia ni kauarerekea. Ao i mwiina a konaa ni katokaa i aon taian aia ma a na aki kauraa. N na karaoa naba ae aron anne n te kaom'aane are temanna ao N na aki naba kauraa aina.

²⁴A na tataro ana burabeti B'aara nakon antiia, ao ngai N na tataro nakon te UEA. Ao e na atongaki b'a te Atua ni koaua ane E kauraa te ai. Ao a taku aomata, “E raoiroi te iango anne.”

²⁵Ao e taku Eria nakoia ana burabeti B'aara, “Kam na waaki moa b'a a m'aiti riki ami koraki. Kaotinakoa te kaom'aane ao katauraoia, ma kam na aki kauraa aina. Ao i mwiina kam a tataro nakon antimi.”

²⁶Ao a rinea aia kaom'aane ana burabeti B'aara ao a katauraoia, ao a tataro nakoni B'aara ni kabanea te ingabong arei ni butiia b'a e na kauraa ain aia karea. A ruruoia ni katobibia aia baonikarea ao a tatakarua ni kaangai, “Kaekaira B'aara!” Ma bon akea kaekaakiia.

²⁷Ao ngke e a tawanou, ao e a moana b'ainingareaia Eria ao e taku, “Tataro ni kaooa riki b'anaami. Kam taku b'a boni iai B'aara. Tao ane e tabe ni kakantaninga ke e nako n rairaki, ke tao ane e nakonako moa nakon taabo tabeua, ke tao ane e tabe ni matu, ma kam riai ni kautia.”

²⁸Ao a tatakarua ana burabeti ao a korokoroi rab'ataia n taiani kabaang ma taiani biti ni karokoa ae a raraabuabua. Ao anne aroia n tataro,

²⁹ao ai bon aroia naba anne ni karokoa e a b'akataai. Ma bon akea naba te kaeka teutana nakoia.

³⁰Ao e weteia aomata Eria ngke e tabe ni katauraoa ana Baonikarea te UEA.

³¹Ao i mwiina, e anai tebwi ma uoua te atiibu ni karaoa iai te baonikarea b'a karinean te UEA. E tei teuana te atiibu i bukin barongan Iteraera ake tebwi ma uoua,

³²are bon te ara are E anga te UEA nakon aia bakatibu are Iakob'a. Ao e kena te m'anono Eria ni katobibia te baonikarea, ae e konaa n taua te ran ae m'aitina 13 te riita.

³³E katokai taiani kai i aon te baonikarea, ao i mwiina a korokorea te kaom'aane ni kauarerekea ao a katokai taiani iriko i aon taiani kai. Ao e tuangiia aomata ni kaangai, Kanoai aua taian tiaeki aika a buubura, ao kab'aroi i aon te iriko ma taiani kai. Ao ngke e a tia ni karaoaki aei,

³⁴ao e tuangiia b'a a na karaoa riki te aro arei uoua riki te tai. Ao a karaoi b'aai ni kabane ake e tuangiia

³⁵ni karokoa, e a b'aro rikaaki te ran mai aon te baonikarea ni kanoaa te m'anono are e katobibia te baonikarea.

³⁶Ao ngke e a bo tain te angakarea n te tairiki, ao e tataro Eria ni kaangai: Ara UEA, Boni ngkoe Atuan Aberaam, Itaaka, ao Iteraera. Ko na kaotia raoi b'a boni ngkoe Atuan te botannaomata aei, ao ngai ae am toro I boni karaoa aei n am babaaire.

³⁷I butiiko b'a ko na kaekaai, b'a aonga aomata aikai n ataia b'a boni Ngkoe te UEA ae te Atua, b'a Ko aonga ni kaoki nanoia nakoim.

³⁸Ao e kanakoa te ai te UEA boni ngkekei naba, ao e kabuoka te karea ma taiani kai ao taian atiibu naba. Ao e kam'aia te tano are i rarikin te baonikarea ni katobibia ma ni kam'aua te ran ni kabane are i nanon te m'anono are e katobibia te baonikarea.

³⁹Ao ngke a noora te b'ai are e riki arei aomata, ao a bane ni bobaraaki man takaarua ni kaangai, “Bon te Atua te UEA.”

⁴⁰Ao e taku Eria, “Tauia ana burabeti B'aara! Tai kabiri nakoa naba temanna.” Ma ngaia are, a raweia ana burabeti B'aara aomata ao a uotiia nakon te Karaanga are Kition, ike e a tiringiia iai Eria ni kabaneia.

⁴¹Ao e taku Eria nakon Aaba, “Karekea kanam ao am'arake b'a I ongo rurungaan te karau ae e korakora ae e a tabe n roko.”

⁴²Ao e nako Aaba, ma e aki nako Eria b'a e a manga oki n tam'arakea taubukin te Maunga are Karemera. Ao ngke e roko i taberana, ao e bobaraaki ni kabo matana ma te tano

⁴³ao e taku nakon ana tia m'akuri, “Naako taraa marawa.” Ao e nako te tia m'akuri arei. Ao ngke e oki ao e taku, “I a tia n tara marawa ma akea te b'ai ae I nooria.” Ao e a manga tuangnga riki Eria b'a e na noora marawa itiua te tai.

⁴⁴Ao ngke e taratara te kaitiua n tai, ao e taku, “I noora te nang ae e tabe n roko. Ao buburana ai aron te timoinibai.” Ao e taku Eria, “Ko riai ni kaea mwengam ngkai. B'a e kaawa n oaki n te karau.”

⁴⁵Ao i mwiin tabeua te tai, ao e tabe n uananginang karawa ma n angang, ao e a tabe ni b'aka te karau.

⁴⁶Ma ngaia are, e ninira kunnikaina Eria i aona, ao e anganaki korakorana iroun te UEA n te aro are e a konaa ni biri mai ikekei ni karokoa Ietireera n rimoan Aaba.