Read Te B'aib'ara 1.Uea 19 Bible Online

1.Uea 19 - Te B'aib'ara bible

1.Uea 19

¹Ao Aaba e tuanga Ietebera b'aai ni kabane ake e karaoi Eria ao arona n tiringiia ana burabeti B'aara.

²Ao e kanakoa te reta neierei nakon Eria ae e kaangai, “Ko tiringiia au burabeti. Ao ngkai N nang manga tiringko. Bon au tataro b'a a na katuaaeai anti n te aro ae e rangi ni korakora ngkana I aki tiringko n taina naba aei nakon te ingabong.

³Ao e rangi ni maaku Eria ngke e a reke i rouna ana rongorongo, ao e a biri nakon te kaawa are Beerateb'a i Iuta, ao E katuka ana toro ikekei,

⁴ao e a manga m'ananga i nanon teuana te bong nakon te rereua. Ni karokoa e a roko n te buakoako teuana ae korakora ao e a tekateka i aan nuuna. E a tataro ni buubutii nakon te UEA ni kaangai, “E a bati n tau. An tiringai. A kakab'aiaki riki au bakatibu nako iu.”

⁵Ao e wene i aan te nu arei ao e matunako. Ao e karina ni kautaki iroun te anera ao e taku te anera, “Teirake am'arake.”

⁶Ao e taratara nako Eria, ao e noora te tiaeki n ran i etan atuuna, ao tabeua taiani kariki. E karaua n tekateka, ao e a am'arake mani mooi, ao e a manga wene naba matu i mwiin am'arakena ma mooina.

⁷Ao e a manga kautaki naba iroun Ana anera te UEA ao e taku te anera, “Teirake am'arake b'a ko a kaawa n rangi ni kua ngkana ko m'ananga.”

⁸Ma ngaia are e a manga teirake Eria n am'arake mani mooi. Ao kanana are e a tia ni kanna, e bon anganna te korakora ni m'ananga i nanon 40 te bong, ni karokoa e roko n te Maunga are Tinai, are Ana Maunga te Atua,

⁹ao e a kangainaa ikekei i nanon te nangananganib'a. Ao ngke e mena Eria i aon te Maunga are Tinai, ao E a titirakinna te Atua ni kaangai, Eria, e aera ngkai ko nako mai?

¹⁰Ao e taku Eria, “Te UEA ae Moan te M'aaka, I aki toki ni kakabanea korakorau n ongongotaeka iroum. Ma a tia am Aomata n urui aia berita nakoim. A tia n urui am Baonikarea ao a tiringiia am Buraabeti, ao bon ti nikiraia ngai. Ao ngkai ae a boni kataia naba ni kan tiringai.”

¹¹Ao E taku te UEA, “Ko na otinako, ao naako tei i aon te maunga. I tangiria b'a ko na noorai ngkana I rirarikim.” Ao e karina n roko te ang ae moan te korakora ni ioioa te maunga, ao ni katabwenabwenai taiani b'a. Ma E bon aki mena naba te UEA i nanon te ang ae moan te korakora. Ao i mwiina, e a manga roko te m'aeiei, ma e aki mena naba i nanon te m'aeiei.

¹²Ao i mwiina, e a manga roko te ai, ma E aki mena naba iai te UEA. Ao n te kabanea, e a roko te ang ae e aabeebete.

¹³Ao ngke e ongo Eria, ao e karabai matana n ana kunnikai. Ao e otinako ao e tei i matan te nangananganib'a, ao E taku te UEA nakoina, “Eria, e aera ngkai ko nako mai?”

¹⁴Ao e taku Eria, “Te UEA ae Moan te M'aaka, I aki toki ni kaakaraoa kabaneani korakorau n ongongotaeka iroum. Ma a tia am Aomata n urui aia berita nakoim. A tia n urui am baonikarea ao a tiringiia am burabeti, ao bon ti nikiraia ngai. Ao ngkai ae a boni kataia naba n tiringai.”

¹⁵Ao E taku te UEA: Eria, ko konaa ni manga okira te rereua are i rarikin Tamateko. Ao ngkana ko roko ikekei, ao rinea Ataera b'a e na uea i aon Turia.

¹⁶Ao i mwiina, rinea Ieu are natin Nimti b'a e na uea i aon Iteraera, ao Eritai are natin Tiabata b'a e na onea mwiim ni burabeti.

¹⁷Ataera are e na moana tiringaia ake a taromauria B'aara. Ao Ieu e na tiringiia koraki akana a birinako mairoun Ataera, ao Eritai e na tiringiia akana a birinako mairoun Ieu.

¹⁸Ma boni iai 7,000 m'aitiia Iteraera aika a rawa n taromauriia B'aara, ao boni ngaiia aika a na maiu.

¹⁹Ao e nako Eria, ao e noora Eritai ngke e tabe ni kamaraua tanon ana tawaana n ana kaom'aane aika uoman. Boni iai naba tengaun ma temanna riki m'aane aika a mena i matana, ao a bon tabe naba ni kamaraua te tano n taian kaom'aane aika uoman. Ao e nako Eria ni kawariia ao e katokaa ana kunnikai i aon Eritai.

²⁰Ao e katoka ana kamarautano Eritai, ao e biri ri mwiina ao e taku nakoina, “Kanakoai moa b'a N na kaboo nakoia tamau ma tinau, ao i mwiina I a nakomai n iriiriko.” Ao e taku Eria, “Naako ma ururinga te b'ai ae I a tia ni karaoia i bukim.”

²¹Ao e nako Eritai ao e kairiia ana kaom'aane ake uoman. E tiringiia, ao e kaburoia i aon te ai ae e aianna ni kain ana b'arau. E anga irikon ana man akekei nakoia aomata ake a mena i rarikina, ao a bane n am'arake. Ao i mwiina, e ri mwiin Eria ao e riki ngaia b'a te tia buobuokia.