Read Te B'aib'ara 1.Uea 20 Bible Online

1.Uea 20 - Te B'aib'ara bible

1.Uea 20

¹Ao e bootia ana taanga ni buaka Benatata. Ao e raonaki irouia 32 riki taiani uea ni ikotaki ma aia aoti ao aia kaanibuaka, ao a kaai ni m'aati nako Taamaria ma ni buakanna.

²Ao e kanakoa ana rongorongo Benatata nakon uean Iteraera are Aaba ae e kaangai,

³“Aaba ko na anganai am koora ma am tirewa, ma buum, ao natim m'aane ake kabanea ni korakora.”

⁴Ao e taku Aaba, “Te uea ae ko karineaki. Bon am b'ai au b'ai ni kabane n ikotaki naba ma ngai.”

⁵Ao i mwiin tabeua te tai, ao e a manga kanakoa riki ana rongorongo Benatata ae e kaangai nakon Aaba, “I a tia n tuangko ngkoa b'a ko na anganai am koora ma am tirewa, ma buum, ao natim ni kabanea.

⁶Ma ngaia ae, nakon te ingabong n taina naba aei, ao N na kanakoia au aobitia nakon am kaawa b'a a na tuoa am bareti ao aia auti am aobitia. A na anai b'aai ni kabane akana ko b'ain.”

⁷Ao e tewea ana boowi Aaba ma taani kairiiri i aon Iteraera ao e taku, “E karika te kaangaanga ae e korakora Benatata. E tuangai b'a N na anganna buu ma natiu, n ikotaki ma au koora ma au tirewa, ao I kariaia.”

⁸Ao a taku taani kairiiri, “Ko na aki ongo i rouna. Ko na aki karaoa te b'a are e taekinna.”

⁹Ao e kanakoa te aomata temanna Aaba b'a e na tuanga Benatata ni kaangai, “Te uea ae ko karineaki. N na anganiko au koora ma au tirewa, ao buu naba ma natiu, ma bon akea te b'ai riki ae N na manga anganiko.” Ao ngke e ongo arei Benatata,

¹⁰ao e taku, “N na boni kamaunaa Taamaria ni kabane. E na bon akea nikirana naba teutana are e na konaa n uotaki rikaaki i nanon baiia tautia. Ngkana I aki karaoa aei, ao I tataro b'a e na karekea kaiu te anti n te aro ae moan te kamaamate.”

¹¹Ao e taku Aaba, “Benatata, ko na aki kamoamoako i m'aain te bonibuaka. Ti na mataku ngkana ko na teimatoa ni maiu ni karokoa tokin te buaka.”

¹²Ao a tabe ni mooi manging Benatata ma uea ake raona i nanon aia autinrianna. Ma ngke e roko ana kaeka Aaba, ao e a tuangiia ana tautia b'a a na katauraoia nakon buakanakin Taamaria, ao a bane n tauraoi.

¹³Ao ni bon te tai naba arei ao e biri rake te burabeti nakon Aaba ao e taku, “I nooria b'a e rangi ni korakora ana taanga ni buaka Benatata. Ma E a tia te UEA ni berita b'a E na buokiko ni kataenikaiia n te bong aei. Ao ko na ataia ikanne b'a E bon baairei b'aai ni kabane te UEA.”

¹⁴Ao e taku Aaba, “Antai aika a na buaka?” Ao e taku te burabeti, “Bon rorobuaka ake taan tararuaia aobitia n aono.” Ao e a manga taku Aaba, “Ma antai ae e na kairiia nakon te buaka?” Ao e taku te burabeti, “Ko na kairiia.”

¹⁵Ma ngaia are, e a bootia 232 tautia aika rorobuaka ao 7,000 tautian Iteraera te uea are Aaba, ao e katauraoia nakon buakanakin Turia.

¹⁶Ao ngke e a tawanou, ao a m'aati te uea are Aaba ma tautian Iteraera nako Taamaria ma ana tautia ake rorobuaka mai i moa.

¹⁷A koro ni manging te uea are Benatata ma uea ake 32 ake a raonna ngke a biri n oki taian tikauti are e kanakoa Benatata nakon ana autinrianna, man takaarua ni kaangai, “Ti nooria ngkai tautian aika a m'aati n otinako mai Taamaria.”

¹⁸Ao e taku Benatata, “Tauia ma kam na aki tiringiia, e aoria ngkana tao a na buakaniira ke tao a na taenikai.”

¹⁹Ao a kaira te taanga ni buakan Iteraera tautia ake rorobuaka nakon te bonibuaka,

²⁰ao a buaka ngaiia ni kabaneia man tiringiia tautia ake aia kairiribai. Ao nikiraia tautian Turia a rairaki man birinako, ao a rimwiaki nako irouia Iteraera. Ao Benatata ma tabeman a birinako i aon taian aoti,

²¹ma a taorimwiiaki irouia Aaba ma ana tautia ao a tauia aia aoti ma aia kaanibuaka. Ao e kaboraia kaain Turia Aaba ma tautian Iteraera.

²²Ao i mwiina teutana, ao e okirikaaki te burabeti [19] ni kauringa Aaba ni kaangai, “Ane e na manga buakaniko Benatata ni moan iteran te aumaiaki ae e na roko. Kamatoatoa riki am taanga ni buaka, ao kakoaua raoi b'a ko na karaua ni katea am kawai ae e nakoraoi.”

²³Ao a m'ananga ana taani kairiiri Benatata ni kawara Benatata ao a kab'arab'ara aia iango ni kaangai: Bon antin aoni maunga atuaia Iteraera. Ti konaaki irouia i bukina ngke ti buakaniia i aon taian tabuki. Ma ngkana ti buakaniia i aon te tabo ae e boraoi, ao ti na bon aki konaa ni konaaki.

²⁴Ao aei te b'ai ae ti na karaoia. Te moanib'ai ti na tiringiia moa uea ake 32 ao kaaki taiani mataniwi n tautia n onea mwiia.

²⁵Ao i mwiina karekeia riki am tautia, ma am aoti, ao am kaanibuaka, ao ane e na manga okira korakorana am tautia n aron are rimoa. Ti na buakaniia Iteraera i aon te aba ae e aoraoi ao ti na kamaunaia. Ao e kariaia Benatata, ao e karaoi b'aai ake a taekin.

²⁶Ao ngke a roko te aumaiaki, ao e a bootia ana taanga buaka Benatata, ao a m'aati nakon te kaawa are Abeki, ao a buakania Iteraera.

²⁷Ao a katauraoia naba Iteraera nakon te buaka. Ao a otinako ni butim'aia kaain Turia, ao a kaai n katei autinrianna taanga ni buaka aika uoua aikai ni kaaitara i bon irouia. A kaona te tabo arei kaain Turia, ao Iteraera kaanga taraaia nanai n kooti aika a uarereke aika uananai.

²⁸Ao e nakon Aaba te burabeti ao e taku, “A taku kaain Turia b'a Atuan taian tabuki Atuaia Iteraera ao tiaki Atuan taiani m'arua. Ma ngaia ae, E a tia ni berita b'a E na buokiko ni kataenikaia te taanga ni buaka ae e korakora aei. Ao ko ane ko na ataia b'a E baairei b'aai ni kabane te UEA.”

²⁹Ao a kaai n tiku n aia kaemb'a taanga ni buaka aika uoua aikai i nanon itiua te bong ni kakaitaraa. Ao e a bo te buaka n te kaitiua ni bong, ao i m'ain bungin taai, ao Iteraera a tia ni kamateia 100,000 tautian Turia.

³⁰Ao a biri rikaaki nikiraia kaain Turia nako Abeki, ma e a manga b'aka oon te kaawa ao a manatua ni mate iai 27,000. Ao e biri nako naba Benatata nako Abeki ao e karabaa n te ru teuana i tinanikun te auti.

³¹Ao e taku temanna ana taani kairiiri, “Te uea ae ko karineaki, ti ongo b'a a bon aki konaa n urua aia berita uean Iteraera. Ma ngaia ae, ti na niniira koreara n taiani baeki aika a mka, ao taian roobu i aon atuura, ao ti a bubutiia Aaba b'a e na aki tiringko.”

³²Ao a karin taiani baeki aika mka, ao a katokai taian roobu i aon atuuia, ao a nako ni kawara Aaba ao a taku, “E buubutiiko am toro are Benatata b'a ko na aki tiringnga.” Ao e taku Aaba, “E boni maiu? Bon ti te bo tangiran Benatata ma tariu.”

³³Ao a kataia ana taani kairiiri Benatata ni kakaea raoi ana iango Aaba, ao ngke e kaangai, “Tariu,” ao a waekoa ni kaangai, “E boni koaua. Bon ti te bo ma taari ngkoe ma Benatata.” Ao e taku Aaba, “Naako kairiia mai.” Ao ngke e roko Benatata, ao a kaai n tam'arakea te kaanibuaka.

³⁴Ao e taku Benatata, “N na kaoki taiani kaawa ake e anai tamau mairoun tamam. Ao ko konaa naba ni katei am tabo ni kabob'ai i Tamateko n aron tamau ngkai iai naba ana tabo ni kabob'ai i Taamaria.” Ao e taku Aaba, “Ngkana ko karaoi akanne nako iu, ao N na kanakoko ni kainaomatako.” Ao i mwiin arei, ao a tiainaa aia boraraoi n raoi, ao e kainaomata Benatata te uea are Aaba.

³⁵Ao n te tai aei e a tuangaki te burabeti iroun te UEA b'a e na kaangai nakon raoraona, “Oreai.” Ma e rawa raoraona arei n oreia,

³⁶ao e taku te burabeti nakoina, “Ko aki ongotaeka nakon te UEA. Ma ngaia ae, e na kaniko te raian ngkana ko m'ananga nako.” Ao e m'ananga nako raoraona arei, ao e karina n roko te raian n tiringnga.

³⁷Ao e a manga reke te aomata temanna iroun te burabeti ao e taku nakoina, “Oreai.” Ao e orea te burabeti te aomata arei.

³⁸Ao e m'ananga nako te burabeti ao e kabaebaea ubuna b'a e aonga n aki kinaaki. Ao e nako n teitei i rarikin te kawai, n tataninga Aaba ngkana e rikekei.

³⁹Ao ngke e rikekei Aaba, ao e takaarua te burabeti arei nakoina ni kaangai, “Te uea ae ko karineaki, ngke e bo te buaka ao iai ae e kaira te taenikai nako iu ao e tuangai b'a N na tarataraia b'a e na aki birinako. E tuangai naba b'a ngkana e birinako te taenikai, ao N na bon katuaeaki n tiringaki ke ni kab'aka 34 te kirokuraem te tirewa.

⁴⁰Ma I rangi n tabeaianga ni karaoi b'aai aika a m'aiti, ao e a ti birinako naba te taenikai arei.” Ao e taku Aaba, “Ko na bon riai n katuaeaki n aron are ko a tia n taekinna.”

⁴¹Ao e kawaekoa n taekaanako kabaean ubuna teuarei, ao e a kinaa Aaba b'a ngaia bon temanna mai buakoia burabeti.

⁴²Ao e taku te burabeti, “E bon tuangko ngkoa te UEA b'a ko na tiringa Benatata, ma ko a tia ni kainaomata. Ao ngkai ko nangi manga tiringaki n onea mwiina, ao a na tiringaki naba am aomata n onea mwiia ana aomata.”

⁴³Ao e okira Tamaria Aaba ma te un ao te rawaawata n nano.