Read Te B'aib'ara 1.Uea 22 Bible Online

1.Uea 22 - Te B'aib'ara bible

1.Uea 22

¹Ao e teimatoa te rau i nanon tenua te ririki ake i mwiina i marenaia Iteraera ma kaain Turia.

²Ao i nanon ana katenua n ririki ni uea Iotiab'ata are uean Iuta ao e a m'ananga ni kawara uean Iteraera are Aaba.

³Ao e titirakiniia ana taani kairiiri Aaba ni kaangai, “E aera ngkai ti tuai ni kataia ni kaoka Ramota Kireata mairouia kaain Turia? Bon abara.”

⁴Ao i mwiina e taku nakon Iotiab'ata, “Ko aki irai nako Ramota ni buakaniia kaain Turia?” Ao e taku Iotiab'ata, “Ko na ti tuangai b'a tera ae N na karaoia. A mena taekan au tautia ma au aoti i nanoni baim.

⁵Ma ti na riai moa n titirakina te UEA nanona.”

⁶Ao e weteia 400 burabeti ao e titirakiniia ni kaangai, “N na buakaniia kaain Turia i Ramota ke N na aki?” Ao a taku taiani burabeti, “Eng, ko na buakanna, ao E na buokiko te UEA ni kataenikaiia.?”

⁷Ao e taku Iotiab'ata, “A boni bane ngkai ana burabeti te UEA aika ti konaa n titirakiniia b'a ti aonga ni koaua raoi?”

⁸Ao e taku Aaba, “Ti konaa naba n titirakina te burabeti are Mikaia are natin Imra, ma I rangi n ribaia b'a e aki toki n tataekin taeka aika a aki kakukurei nako iu.” Ao e taku Iotiab'ata, “Ko na aki taetae ni kaanganne.”

⁹Ma ngaia are, te uea are Aaba n te tai ae e waekoa e a kanaanako weteakin Mikaia.

¹⁰Ao n te tai aei, ao a tekateka Aaba ma Iotiab'ata i aon aia kaintokanuea ma niiniiraia ni uea n te tabo ni kanako kun ni uita i matan mataroan te kaawa are Taamaria. A tabe n ongora irouia burabeti ake a taekin Ana taeka te UEA nakoia.

¹¹Ao Tetekia are natin Kenaana are temanna mai buakoia burabeti, e karaoa te koro man te biti, ao e takaarua ni kaangai, “Aaba, E taku te UEA b'a ko na buakaniia kaain Turia n aron te kaom'aane ma korona aika biiti mani kamaunai mataia.”

¹²Ao a bane ni boraoi burabeti n te koaua are e na riai Aaba ni buakana Turia i Ramota, ao a berita b'a E na buokiia te UEA ni kataenikaiia aia kairiribai.

¹³Ao i mwiina teutana ao e a taku te aomata are e nako ngkoa ni kawaekoa Mikaia ao e wiirikiriki nakon Mikaia ni kaangai, “Noria a bane taiani burabeti n taekina te rongorongo ae e raoiroi nakon Aaba. Ma ngaia ae, ko na nako ngkai ao ko na taekina naba ae aekakin arei.”

¹⁴Ma e kaeka Mikaia ni kaangai, “N na taekina are e tuangai te UEA ae e maiu.”

¹⁵Ao i mwiina, ao e a nako Mikaia ni kawara Aaba, ao e a taku Aaba nakoina, “Mikaia, N na buakana Turia i Ramota ke N na aki?” Ao e taku Mikaia, “Eng, ko na buakanna b'a E na anganiko te UEA te tokanikai.”

¹⁶Ao e takaarua Aaba ni kaangai, “Mikaia, ai iraua te tai ae I tuangko iai b'a ko na tuangai raoi te koaua. Tera raoi ae E taekinna te UEA nakoim?”

¹⁷Ao e taku Mikaia, “I nanon te kaotioti are I nooria, ao I nooriia tautian Iteraera b'a a m'ananga ni katobibi i aon taian tabuki n aroia tiibu aika akea te tia kaawakiniia. Ao e taku te UEA, “Akea aia tia kairiiri taian tautia aikai. A riai n okira mwengaia ao a na aki buaka.”

¹⁸Ao e rairaki Aaba nakon Iotiab'ata ao e taku, “E uara ngkanne, ao are I a kaman tuangko are e aki toki n tataekina nako iu te rongorongo ae e aki kakukurei.”

¹⁹Ao e taku Mikaia: Ongora n te b'ai aei. Ao I noora naba te UEA b'a E tekateka i aon ana kaintokanuea ma b'aai ni kabane aika a maiu i karawa b'a a bootaki ni katobibia.

²⁰Ao E titiraki te UEA ni kaangai, Antai ae e konaa ni kam'anea Aaba b'a e a onga n nako ni buaka b'a e aonga ni mate i Ramota? Ao a bane n iangoia moa teutana te tai,

²¹ao i mwiina, ao e koerake te tamnei ao e taku, I konaa n kam'anea Aaba. Ao E titiraki te UEA ni kaangai, “Ao ko na kanga ni kam'anea?”

²²Ao e taku, “N na karaoia ana burabeti b'a a na kewe nakoina.” Ao E taku te UEA, “E raoiroi. Ko na nako ngkai ni karaoa anne.”

²³Bon aei te b'ai ae e riki Aaba. E karaoia am burabeti ni kabane b'a a na keweiko, ao E ataia b'a ko nang mate n te tai ae e waekoa.

²⁴Ao e keerake Tetekia nakon Mikaia ao e orea ubuna ao e titirakinna ni kaangai, “N na am iango E ti taetae te UEA nakoim ao E aki taetae nako iu?”

²⁵Ao e taku Mikaia, “Ane ko na nooria n te bong arei b'a ane ko na karabako i kabin te ru n te auti teuana.”

²⁶Ao e takaarua Aaba ni kaangai, “Katika Mikaia? Uotia nakon te natinuea are Ioati ao te Koowana are Ammon are kaain Taamaria.

²⁷Tuangiia b'a a na kainna n te karabuuti ao ana ti kam'arakea n te kariki ao te ran ni karokoa manga okiu ni buaka ma te maiu.”

²⁸Ao e taku Mikaia, “Ngkana arona b'a ko oki, ao ngaia I a tia n aki ongo raoi te b'ai are E tangiria te UEA b'a N na taekinna.” Ao e a manga taku riki nakoia aomata, “Tai m'am'aninga te b'ai are I a tia n taekinna.”

²⁹Ao a kaira aia taanga ni buaka Aaba ma Iotiab'ata nako Ramota i Kireata.

³⁰Ao i m'ain m'anangaia nakon te buaka ao e taku Aaba, “Iotiab'ata, N na bitii kunnikaiu b'a I aonga n aki kinaaki ao ngkoe ko boni katokai niiniiram ni uea.” Ao i mwiina e m'ananga Aaba nakon te buaka ao e a aki kinaki.

³¹E a tia uean Tiiria n tuangiia 32 mataniwiia ana taan buaka n taian kaanibuaka b'a ana tii buakana Aaba.

³²Ao ngke a noora Ieotiab'ata ma niiniirana ni uea ao a roko ni buakanna b'a a taku b'a Aaba. Ma ngke e takaarua Iotiab'ata nakoia,

³³ao a tib'a ataia ae tiaki Aaba ao a kitanna.

³⁴Ao i nanon tain te bo ni buaka ao iai temanna te tautia ae e katebe n aki akaaka ike e a teke naba iai te tabo teuana ae e uki i aon kunnikain Aaba are te kunnikai ni buaka ao e takaarua nakon teuare te tia kabuta ana kaanibuaka, “I a teke! Uotai kaotinakoai mai ikai.”

³⁵Ao e bong bongin te buaka arei ao e totokoaki Aaba i aon ana kaanibuaka b'a e aonga ni kona n nooria tautian Tiiria. E rangi ni korakora tiinakon raraana n te aro are e a rarabuabua nanon te kaanibuaka, ao e a mate ngke e a bong.

³⁶Ao ngke e a bungitaai, ao e takaarua temanna tautian Iteraera nakoia raona ni kaangai, “Keerikaaki! Okiri mwengami.”

³⁷Ao e uotaki rikaaki rab'atan Aaba nako Taamaria ao e taunaki ikekei.

³⁸Ao a kaitiaka ana kaanibuaka tabeman taani m'akuri i rarikin te koburake n ran are i Taamaria, ao a tebokia taian kabekaau ni kaitiakia n raraana. A newenewea raraan Aaba ake n te tano taian kamea, n aron are e a tia n taekinna te UEA.

³⁹Ao a bane n tauaki mwiin b'aai ake e karaoi Aaba i nanon ana tai ni uea, n te boki are Rongorongoia Uean Iteraera, ni ikotaki ma kaawa ake e a manga kamatoai ao te bareti are e karaoi b'ain nanona ni koron te ereb'anti.

⁴⁰E mate Aaba, ao e uea natina are Aatia.

⁴¹Ao e uea Iotiab'ata are natin Ata i aon Iuta i nanon ana kaua n ririki Aaba ni uea i aon Iteraera.

⁴²Bon 35 ana ririki Iotiab'ata ngke e uea ao e tautaeka mai Ierutarem i nanon 25 te ririki ao aran tinana bon Nei Atuba are natin Tirei.

⁴³Ao e ongo taeka Iotiab'ata iroun te UEA, n aron are e karaoia naba tamana are Ata, ao e aki roko n te buaka ma Iteraera i nanon ana tai ni uea. Ao e kanakoia taian aine ni mataawa [21] ni kabane man bangotan aon te aba, ma e aki urua te bangota, ao a bon tiku b'a taabo n angakarea. Ao a tauaki mwiin b'aai ni kabane ake e karaoi Iotiab'ata i nanon ana tai ni uea i nanon te boki are Rongorongoia Uean Iuta, n reitaki ma ninikoriana ao tokanikaina n taian buaka.

⁴⁴

⁴⁵

⁴⁶

⁴⁷Bon akea Uean te aba are Etom n te tai anne, ngaia are e a tauaki taekana iroun temanna te tia kairiiri.

⁴⁸E bon karao kaibuke Iotiab'ata ni m'am'ananga i taari i bukin anaakin te koora i Obira. Ma a bane ni koro i Etion-Kebera ao aki manga oki ni m'am'ananga.

⁴⁹Ao Ataia are natin Aaba e b'aintangira n anga ana kaimoa b'a ana iriia ana kaimoa Iotiab'ata ma e rawa Iotiab'ata.

⁵⁰E mate Iotiab'ata ao e taunaki i rarikiia ana bakatibu i Ierutarem ao e a manga Uea natina are Ioram.

⁵¹Ao e uea Aatia are natin Aaba i aon Iteraera n ana ka 17 n ririki Iotiab'ata ni Uea i aon Iuta, ao e uea i nanon 2 te ririki mai Taamaria.

⁵²E aki ongotaeka Aatia iroun te Uea n aron are e karaoia tamana, ao tinana, ao Ieroboam. A bane ni uota Iteraera nakon te bure.

⁵³E taromauria B'aara te uea are Aatia ao e rangi ni kauna te Uea ae Atuan Iteraera, n aron are e tia ni karaoia tamana.