Read Te B'aib'ara 2.Uea 12 Bible Online

2.Uea 12 - Te B'aib'ara bible

2.Uea 12

¹E riki b'a te uea Ioati i aon Iuta n ana kaitiua n ririki ni uea Ieu i aon Iteraera, ao e tautaeka i nanon 40 te ririki mai Ierutarem. Boni kaain Beerateb'a tinana are Nei Tibia.

²E reireina Ioati te ibonga are Ieoiata ataakin te eti, ai ngaia are, e ongotaeka Ioati iroun te UEA ni kabane bongini maiuna.

³Ma e aki kamaunai taiani baangota, ao a bon teimatoa naba ni kabonganaaki b'a taabo n angakarea.

⁴E taku Ioati nakon te ibonga n te bong teuana, “Botiia m'aane ni kabane ake a angaanga aomata nakon ana Tembora te UEA, ake m'aane i bukin te roo n rab'ata ao b'aintangira,

⁵ao kamanenai i bukin onob'aian te Tembora. Kam konaa ngkami ibonga n anga bon oin ami m'ane naba.

⁶Ma a aki roko n te kakaraoa te onob'ai n te Tembora ibonga, ma ngaia are, n ana ka uabwi ma tenua n ririki n uea Ioati,

⁷ao e a wetea Ieoiata ao ibonga ake tabeman ao e taku, E aera ngkai kam aki kabongana te m'ane i bukin onob'aian te Tembora? Kam na aki manga anaa te m'ane bon i bukimi. E na ti kamanenaaki i bukin te onob'ai.”

⁸A kariaia ibonga te iango are a nang aki manga rikorikoa te m'ane ke ni mwiokoaki i bukin onob'aian te Tembora.

⁹E reke te b'aoki iroun Ieoiata ao e kab'angab'angaa taubukina, ao e katikua i angaatain te baonikarea ike a riirin iai aomata nakon te Tembora. Ngkana iai ae e anga m'ane nakon te Tembora, ao e butim'aia te ibonga are e tei i matan te mataroa ma ni karinna n te b'aoki.

¹⁰Ngkana e on te b'aoki n te m'ane, ao a warekaki m'aitina irouia ana tia koroboki te uea, ao te mataniwi n ibonga, ao a na karinna n taiani buua.

¹¹Ao i mwiin anne, a na anga nakoia m'aane ake taani kaira karaoan te onob'ai n te Tembora. A kabonganaaki m'aane tabeua i bukin kaboaia taani kateitei, ao taani m'akuri n te kai,

¹²ao taani koro atiibu, ao m'aane ake a karaoi taian o. A kamanenaaki m'aane tabeua i bukin boon taiani kai, ao atiibu, ao i bukin boon riki b'aai tabeua i bukin onob'aian te Tembora.

¹³I nanon tain karaoan te onob'ai ao e aki kamanenaaki te m'ane are a anga aomata nakon te Tembora ni karaoaki iai taiani boora aika tirewa, b'ain tiringan te taura, taiani boora ni katimtim aika a uarereke, taiani bu, ke b'aai nako aika a karaoaki man te koora ke te tirewa i bukin te Tembora.

¹⁴Ma a ti kamanenaa i bukin boon te onob'ai.

¹⁵A bane ni kakaraoa ae e raoiroi m'aane ake a mwiokoaki akekei, ai ngaia are bon akea ae e wareb'aia mwiin kamanenaan te m'ane irouia.

¹⁶A aki kamanenaaki n te Tembora m'aane ake taian tuua ake a kaairaki ma taian karea i bukin kaetani b'aai, ao karea naba i bukin buure. A b'ainaki m'aane aikai ti irouia ibonga.

¹⁷Ni bon te tai naba arei, e buakana te kaawa are Kaata uean Turia are Ataera, ao e taua. I mwiina, e a manga iangoia b'a e na buakana Ierutarem.

¹⁸Ma ngaia are, e rikoi b'aai ni kabane Ioati ake a tia ni katabuaki i rouna ma ana bakatibu are Ieotiab'ata, Ieoram, ao Aatia, ni ikotaki naba ma koora ake n taian ruunib'ai ake n te Tembora ma te bareti. E kanakoi ni kabane nakon Ataera b'a te b'aintangira. Ao ngke a reke iroun Ataera, e a tuangiia naba ana taanga ni buaka b'a a na kiitana Ierutarem.

¹⁹A bane ni koreaki taekan b'aai ni kabane ake e karaoi Ioati ngke uea i nanon te boki are Rongorongoia Uean Iuta

²⁰N tokin ana tautaeka, ao iai tabeman ana aobitia ake a manga kakaitaraa. Bon Ioteb'ata are natin Timeata te m'aane, ao Ieotiab'ata are natin Tiomera te m'aane

²¹ake a tiringa Ioati i nanon te auti ae e buubura n te tabo are e a manga kanoaaki aona are i mainikun Ierutarem i rarikin te kawai nako Tira. E taunaki i rarikiia ana bakatibu i Ierutarem, ao e a manga uea natina te m'aane are Amatia.