Read Te B'aib'ara 2.Uea 13 Bible Online

2.Uea 13 - Te B'aib'ara bible

2.Uea 13

¹E riki ni uea Ieoaati are natin Ieu i aon Iteraera n ana ka 23 n ririki ni uea Ioati i aon Iuta. E tautaeka Ieoati i nanon 17 te ririki mai Taamaria,

²ao e aki ongotaeka iroun te uea ngke e karaoa te m'akuri ae e kaairua. E aki toki ni katotoonga Ieroboam, are e a tia ni kairiia Iteraera nakon te bure.

³E un te UEA irouia Iteraera, ma ngaia are, e karika uean Turia are Ataera ma natina te m'aane are Benatata b'a a na tautaekaniia n te tai ae e maan.

⁴E tataro Ieoaati nakon te UEA i bukin buokaia, ao e noora kamamaten ana m'akuri Ataera nakoia Iteraera te UEA. Ao e kaeka Ieoaati

⁵ao e kanakoa te tia kairiiri nakon Iteraera are e na kamaiuia mairouia kaain Turia, ao a manga maeka ma te rau Iteraera n aroia are rimoa.

⁶Ma e a tia Ataera n urubekei ana b'ai ni buaka Iteraera ngke e kataenikaia n te aro are e tiku Ieoaati ma ti tebwiina ana kaanibuaka, nimangaun tautia ake a toka i aoia aoti, 10,000 tautia aika a bane aroia aika nikiraia ana tautia.

⁷A teimatoa Iteraera ni buubure ma ni katotongiia ana utu Ieroboam. A aki roko n te urui taiani bouananti ake a tia ni kateaki i Taamaria i bukin taromaurian te anti are Nei Aatera.

⁸A bane ni koreaki b'aai ni kabane ake e karaoi Ieoaati i nanon ana tai n uea, n reitaki ma ana m'akuri n ninikoria i nanon te boki are Rongorongoia Uean Iteraera.

⁹E mate Ieoaati ao e taunaki i Taamaria ao e manga uea natina te m'aane are Ieoati.

¹⁰E riki b'a te uea Ieoati i aon Iteraera n ana ka 37 n ririki n tautaeka uean Iuta are Ioati, ao e tautaeka i nanon 16 te ririki mai Taamaria.

¹¹E aki ongotaeka nakon te UEA ngke e karaoa naba are e karaoia ngkoa Ieroboam, are e kareketatiia Iteraera n te bure.

¹²A tauaki rongorongon b'aai ni kabane ake e karaoi Ieoati i nanon ana tai ni uea n reitaki ma buakanakin uean Iuta are Amatia i nanon te boki are Rongorongoia Uean Iteraera.

¹³E mate Ieoati ao e taunaki i Taamaria i rarikiia uean Iteraera ake tabeman. E a manga uea natina are te m'aane are Ieroboam.

¹⁴Tabeua te tai i m'aain maten te uea are Ieoati, ao e a rangi n aoraki te burabeti are Eritai, ao e a kaani mate. Ao e rin Ieoati ma n tei i rarikina ao e tang. Ao e taku, Au toka, tera ngkai ae a nang konaa ni karaoia ana kaanibuaka Iteraera ana taan toka i aoia aoti ngkana ai akea ngkoe?

¹⁵Ao e taku Eritai, Anaa te kainikatebe, ao tabeua taiani kanoan ni katebe, ao taui i nanoni baim.

¹⁶Ao e katokaa baina Eritai i aoni bain te uea

¹⁷ao e taku, Kauka te winto ane e kaaitaraa mainiku. Ao ngke e uki, ao e takaarua Eritai ni kaangai, Ani katebe. Ao e katebenakoa te kainikatebe Ieoati ao e taku Eritai, Te kainikatebe anne bon te kanikina b'a E na buokiko te UEA ni kataenikaiia kaain Turia i Abeki.

¹⁸E taku Eritai, Anai kanoanikatebe ao orea iai aontano. Ao e anai kainikatebe Ieoati ao e orea iai aontano tenua te tai, ao e a manga katokia.

¹⁹Ao e un Eritai iroun te uea ao e taku, Ngke tao ko orea aontano nimaua ke onoua te tai, ao ko na boni kamaunanakoia kaain Turia. Ma ngkai, ko na ti kataenikaiia ti tenua te tai.

²⁰E mate Eritai ao e taunaki. A kakatoa ririki kaain Moaaba ni kakanakoia aia taani kurib'ai nako Iteraera.

²¹N te tai teuana ngke a tabe n tauni aia mate Iteraera, ao a nooria te koraki n aomata aika kaain Moaaba. A kawaekoaia Iteraera akekei n tewenakoa rab'atan aia mate nako nanon ruanimaten Eritai ao a biri nako. Ao ni bon te tai naba are e bo iai rab'atan te m'aane arei ma riin Eritai, ao e a maiu naba te aomata arei, ao e teirake.

²²E mena Iteraera i aan ana tautaeka uean Turia are Ataera i nanon ana tai n tautaeka Ieoaati ni kabane.

²³Ma E ataataiaomata te UEA nakoia Iteraera ao e kaota te akoi nakoia i bukin ana berita ngkoa nakoia aia bakatibu ake Aberaam, Itaaka, ao Iakob'a. E bon tuai man tannako ke ni kariaia b'a a na kamaunaaki n tiringaki.

²⁴E mate Ataera ao e uea natina te m'aane are Benatata i aon Turia.

²⁵E buakana Turia uean Iteraera are Ieoati, ao e kataenikaia tenua te tai. E kaoka mairoun Bentata kaawa ni kabane ake e taui ngkoa Ataera n te buaka mairoun tamana are Ieoaati.