Read Te B'aib'ara 2.Uea 18 Bible Online

2.Uea 18 - Te B'aib'ara bible

2.Uea 18

¹E a manga riki b'a uean Iuta Etekia are natin Aati te m'aane i nanon ana katenua n ririki ni uea Otea n tautaekana Iteraera.

²Bon 25 ana ririki ni maiu Etekia ngke e uea, ao e tautaeka i nanon 29 te ririki mai Ierutarem. Tinana bon Nei Abi are natin Tekaria te aine.

³E ongotaeka Etekia iroun te UEA n aron are e a tia ni karaoia ana bakatibu are Tawita.

⁴E urui taiani baangota, ao i mwiina, e kamaaei bannaia anti ianena, ao e korouaa te boua ae tabu are b'ain taromaurian Nei Aatera. E urubekea naba te naeta te buraati are e karaoia ngkoa Moote. A aranna aomata b'a Neutitan ao a tia n angaanga karea nako ina.

⁵E onimakina te UEA ae Atuan Iteraera Etekia. Bon akea uean Iuta ae ai arona ma i m'aaina, ao i mwiina naba.

⁶E rangi n ongotaeka iroun te UEA man irii nanon tua ake E anga ngkoa te UEA nakon Moote i bukiia aomata.

⁷E buoka Etekia te UEA, ma ngaia are, a kororaoi bukin b'aai ni kabane ake e karaoi. E kakaitaraa naba uean Aturia, b'a a rawa n riki b'a ana toro.

⁸E kataenikaiia kaawan Biritia ni karokoa Kaata, ni moa naba ma ni kaawa aika a uarereke ni karokoa kaawa aika a rangi ni korakora ake a nonoaki.

⁹I nanon ana kaaua n ririki n tautaeka Etekia, are bon ana kaitiua n ririki Otea n tautaeka i aon Iteraera, ao e a kam'anangaa ana taanga ni buaka Tiaremanetera are uean Aturia nako Taamaria, are kaawan te tautaeka i Iteraera. A buakanna

¹⁰ao e reke i rouna i mwiin tenua te ririki, i nanon ana kaonoua n ririki n tautaeka Etekia ao a na karuaiwa n ririki n tautaeka Otea.

¹¹E kairiia Iteraera uean Aturia b'a taenikai, ao e kairoroia tabeman mai buakoia b'a a na maeka n te kaawa are Ara, ao tabeman b'a a na maeka i rarikin te Karaanga are Tabora n te aba are Kotan, ao ake tabeman naba b'a a na maeka ni kaawa ike a maeka iai kaain Miria.

¹²A riki b'aai aikai ni kabane i bukina ngke a aki ongotaeka Iteraera iroun te UEA ae Atuaia. A aki kubara te boraraoi ae e matoa are E a tia ni karaoia ma ngaiia, ao a aki tabe ma b'aai ni kabane ake e a tia n tuangiia ana toro te UEA are Moote.

¹³N ana katebwi ma aua n ririki n tautaeka Etekia, ao e roko Tennakeriba are uean Aturia ni buakana te aba, ao e taui kaawa ni kabane ake a buubura ake a nonoaki, ma ti Ierutarem ae e aki reke.

¹⁴E kanakoa ana rongorongo Etekia nakon Tennakeriba, are e mena n te kaawa are Rakiti: I ataia b'a I boni bure ngke I kakaaitarako. Ma N na kabooi mwiin b'aai ni kabane n aron ane ko tangiria, ngkana ko katoka buakanakira. Ao Tennakeriba e tuanga Etekia b'a e na kab'aka nako ina 11 te tan te koora.

¹⁵Ma ngaia are, e rikoi taian tirewa ni kabane Etekia man ana Tembora te UEA ao man ana runikaub'ai te uea.

¹⁶E boni kanakoi naba taian koora ake a kabiraki iai ngkoa taiani mataroa ma taiani boua n te Tembora. E angan Tennakeriba ni kabane.

¹⁷Ao e tuangiia ana aobitia aika a rietaata n te taanga ni buaka uean Aturia b'a a na kiitana Rakiti man kaira te taanga ni buaka nako Ierutarem. Ao ngke e roko, ao a tei taian aobitia i nanon te kawai i rarikin ana titoa te tia karao kunnikai are e tei i etan te kanare are e nako man te nei n tebotebo are i eta.

¹⁸A wewetea Etekia, ao a otinako ana mataniwi aika a rietaata ni kawariia. Temanna mai buakoia bon Irekia are natin Eriakim te m'aane, are bon te buraiminitita. Ao ake uoman bon Tebena, bon ana kauoman te buraiminitita, ao ai Ioa are natin Ataba te m'aane, are bon te tia taui mwiin rongorongon te tautaeka.

¹⁹Ao e taku temanna te mataniwi n taanga ni buaka mai Aturia nakoia: “Iai ana rongorongo uean Aturia ae e kakannato nakon Etekia. Kam na titirakina Etekia b'a e aera ngkai e mwiokoia boni i rouna?

²⁰E taku b'a e konaa ni baairea kawaina ni buaka ao e a tokanikai naba ti n te taetae? Antai ane e na konaa ni buokia, ngkai e a manga kakaitaraa uean Aturia?

²¹E mwiokoa Aikubita ma ueana? Ti te bo anne ma te aomata ae e raraa te kai ae e m'aotoua b'a e na bon teke iai baina.

²²E mwiokoa ngkai te UEA ae Atuami Etekia? E bon tuai kab'akai taiani baonikarea ni kabane, ao ni katuka are ana Baonikarea te UEA. E bon aki naba tuangiia aomatan Iteraera ma Iuta b'a a na taromauri n te tabo ane ti teuana anne.”

²³“E tangiria uean Aturia ni karaoa te katuaa ma aomata. E na anganingkami 2,000 taian aoti ngkana kam konaa ni katoai aon tenaan aoti n toka i aoia.

²⁴Kam na kangaa ni kataenikaiia au aobitia ake mai nano, ngkana ko onimakina Aikubita i bukin taiani kaanibuaka ao taani buaka i aoia aoti?

²⁵Kam na aki m'aninga are bon te UEA ae E kanakomaiai b'a N na kamaunaa ami botannaomata.”

²⁶Ao a taku Eriakim, ma Tebena, ao Ioa, “Teuae ko karineaki, ti aki tangiriia aomata aika a kakauongo man te kaawa ae buubura ae e nonoaki b'a a na ataa te b'ai ae e taekinaki. Ma ngaia are, ti butiiko b'a ko na taetae nakoira n te taetae n Aram'aika ao tiaki n te taetae n Ebera.

²⁷Ao e kaeka teuare te mataniwi ni buaka mai Aturia, “E kanakomaiai au uea b'a N na taetae nakoia aomata ni kabane, ao tiaki ti nakoia taani kairiiri. Ae a nang kana nakotariia ma mimiia aomata aikai n te tai ae e aki maan. Ao ai uana naba ngkami akana teniman aikanne.”

²⁸Ao ni bon te tai naba arei, ao e a takaarua naba te tia kaira te taanga n te taetae n Ebera ni kaangai; “Kam na ongora n ana taeka uean Aturia ae e kaangai;

²⁹“Kam na aki kaburababaaki iroun Etekia. E bon aki konaa ni kamaiungkami.

³⁰Kam na aki onimakinna ngkana e tuangngkami b'a aongkoa E na kaawakiningkami te UEA mairoun uean Aturia.

³¹‘Tai ongo iroun Etekia ma kam na ongo iroun au uea. Taenikai i rouna. E na kainaomataingkami ni kaawakini ami onaroka ni kureebe, ao arokami naba taiani biiku

³²i nanon tabeua te tai, ao i mwiina, e na roko n uotingkami nakon te aba ae ai aron abami, ike kam konaa iai n uniki arokami taiani kureebe, man uniki arokami taian uita, ao a na rangi ni bati ami b'aa n oriwa ao ami karewe te manibeeru. Kam na kakoauaai, kam na bon aki mate ni baki ikekei.’ E taekinna Etekia b'a aongkoa E na kamaiungkami te UEA ma kam na aki kaburababaaki i rouna.

³³‘Bon iai te anti ae e konaa n taua abana mairoun uean Aturia?

³⁴Tera ae e riki nakoia antin Amata ma Arebata? Ao tera aroia naba antin Tebarewaim, Ena ao Iwa? A konaa antin Taamaria ni kaawakina abaia mairouia ana taanga ni buaka Aturia?

³⁵Bon akea mai buakoia anti aikai ae e konaa ni kaawakiniia ana aomata mairoun uean Aturia. E nang konaa riki te UEA ae Atuami ni kamaiungkami?’ ”

³⁶A tia n tuangaki Eriakim ma Tebena, ao Ioa iroun te uea ae Etekia b'a a na aki kaekaekaa mataniwiin te taanga ni buaka mai Aturia.

³⁷Ma ngaia are, a raeuai aia kunnikai i bukin rawawatan nanoia, ao a kaongoraea Etekia b'aai ni kabane ake e a tia n taekin mataniwiin te taanga ni buaka mai Aturia.