Read Te B'aib'ara 2.Uea 19 Bible Online

2.Uea 19 - Te B'aib'ara bible

2.Uea 19

¹Ao ngke e ongo te rongorongo arei Etekia, ao e raeuaa ana kunnikai i bukin rawawatan nanona, ao e karin kunnikai aika a mangaingai. Ao i mwiina, e nako n rin n ana Tembora te UEA

²E tuanga te mataniwi n te bareti are Eriakim, ana kauoman are Tebena, ao mataniwiia ibonga b'a a na kunnikaiia ni kunnikai aika a mangaingai ao e tuanga te burabeti are Itaia ni kaangai:

³Bon taai ni kangaanga ao taai n nanokawaki taai aikai. Kaanga ai aron te aine ae e ngore ni bungiia natina, ngke e a roko ana tai ni bungiia natina.

⁴Taiaoka tataro i bukira ngaira aika nikira ni maiu. E kanakoa ana taanga ni buaka uean Aturia b'a e na kakaewenakoa te Atua ae e maiu. E na mena ngkoa ao E ongo te UEA te b'ai ae e taekinna ao E na karaoa te b'ai teuana, ngkana ko tataro.

⁵Ngke a m'ananga nakon Itaia taani kairiiri aikai,

⁶ao e tuangiia Ana rongorongo te UEA aikai nakon Etekia: Bon te UEA ngai. Kam na aki kakiriwei nanomi n taian taeka ni kakaewenako ibuku mairoun ana tia uarongorongo uean Aturia.

⁷N na kab'araa nanona n taiani maningongoo i bukin ana kaawa. Ane e na oki, ao N na karaoia b'a e na mate ikekei n te mate ae e rangi ni kakamaaku.

⁸Inanon te tai anne, ao e ongo mataniwiin ana taanga ni buaka Aturia ae e a tia ni kiitana te kaawa are Rakiti te uea ao e a buakana ngkai Ribena. Ma ngaia are, e a manga nako ikekei.

⁹Ni bon te tai naba ae ai aron arei, ao e a ataia uean Aturia ae e nang roko Tikeraka are uean Itiobia ni buakanna. Ai ngaia are, e a kanakoa ana tia uarongorongo ma ana taeka nakon Etekia:

¹⁰Ko na aki onimakina Atuam ke ni kaburababaaki n ana taeka are aongkoa E na kaawakina Ierutarem mairou.

¹¹Ko a bon tia n ongo rongorongora ngaira aika uean Aturia ni kamaunaiia botannaomata ake tabeua ni kabaneia. Tera ae kam taku b'a kam a boni mano iai?

¹²Uean Aturia ake mai m'aaiu, a kamaunai kaawan Kotan, Aran, Reteba, ma kaain Eten ni kabane ake a maeka i Terata. Tera ae a karaoia antiia nakoia?

¹³A tia ni mauna nako uean Amata, uean Arebata, uean Tebarewaim, uean Ena, ao uean Iwa.

¹⁴Ao ngke e a tia ni wareka ana rongorongo uean Aturia te uea are Etekia, ao e uotia nakon te Tembora ao e taakinna i matan te Atua b'a e na nooria.

¹⁵Ao e tataro: Te UEA ae Atuan Iteraera, e mena am kaintokanuea i aoia b'aai aika a maiu aika iai baiia ni kiba. Ko karaoa karawa ma aonnaba, ao bon ti ngkoe ae Ko tautaekani abanuean te aonnaba aei.

¹⁶Ma Ko na tii taraa ana m'akuri Tennakeriba ni kakaewenakoko, ngkoe ae te Atua ae Ko maiu.

¹⁷E boni koaua ara UEA b'a a tia uean Aturia n karikii taian botannaomata b'a taian rereua.

¹⁸A urui taiani bouananti ake taiani kai ao taian atiibu ake a karaoi aomatan taian botannaomata aikai man taromaurii.

¹⁹Ma boni ngkoe ara UEA ao Atuara. Ti bubutiiko b'a ko na kamaiura mairoun uean Aturia. Ao ane a na ataiko iai aomata n taian abanuea ni kabane n te aonnaba ae bon ti ngkoe te Atua.

²⁰Ao e nako Itaia ni kawara Etekia ma n tuangnga te b'ai are E taekinna te UEA ae Atuan Iteraera: Etekia I ongo am tataro i bukin Tennakeriba are uean Aturia.

²¹Ao aei te b'ai ae I taekinna nakon te uea arei: “A ribaiko kaain Ierutarem ao a b'ainingareiko; a ngareakiniko mai akuum.

²²Tennakeriba, ko taetae ni karereanti, ko takaarua, ao ko b'ainingareai, Ngai ae Atuan Iteraera ae e Tabu

²³Ko kariaia am mataniwi b'a a na kakaewenakoai, Ngai ae te UEA. Ao aei te b'ai ae ko a tia n taekinna bon i bukim, “I kairiia au kaanibuaka nakon kabanean rietaatani maungan Reb'anon. I rinnakoa kabin buakonikaina, ma ni koroi ni kab'akai tiira ake kabanea n tamaroa, ao kaai aika m'aiango.

²⁴I kaorai taian karaanga ni kabane ake n te aba are Aikubita, ao I nim ranin taiani m'anib'a ake I a tia ni ken.”

²⁵‘Tennakeriba, ongora ngkai irou ngai ae te UEA. I baairei b'aai aikai n taai aika a b'akanako. Ao ko bon aki roko naba n te ataia ae bon ti ngai ae I baaireia b'a ko na karaoi b'aai aikai. Bon ngai ae I karaoiko b'a ko na urui taiani kaawa aika a buubura aika a nonoaki.

²⁶A rikirake ni mamaara aia aomata, a rangi ni mangaongao. Kaanga ai aron uteuten te tawaana ngaiia ke uteute aika a ubuubu aika a maiu i taubukin te auti ae e boraoi, aika a rai i m'aain ae a ikawai.[30]

²⁷“I atai rongorongom ni kabane, I ataia naba ma aron korakoran unim irou.

²⁸I a tia n noora kainikatongam ma ribaakiu ae moan te korakora iroum. Ao ngkai N na karina te matau i nanoni b'airim, ao te m'akoro ni biti i nanoni wiim, ao i mwiina I a kaokiko nakon te tabo are ko nako mai iai.[31]

²⁹Etekia, N na tuangko te b'ai ae e nang riki. N te ririki aei ko na kang taian uita aika a riki bon irouia, ao n te ririki ae e na roko ko na manga kang b'aai aika a na bwebwerake mai mwiin uita aikai. Ma n te katenua n ririki, ko na uniki taiani uita ao taian kureebe, ao ko na kana ae ko bon taia.

³⁰A na riki koraki ake taian nikira ni maiu i aon Iuta b'a kaanga taiani nne n aroka ni kureebe aika a nene wakaaia ma ni kariki uaa.

³¹Bon te UEA Ngai ae Moan te M'aaka ae N na bon nooria ni kakoauaa b'a a na maiu koraki ake nikira ni maiu i aon Ierutarem.

³²I berita b'a e na aki rin i Ierutarem uean Aturia, ke ni katebea ana kainikatebe nako nanon te kaawa, ke ni katobibia ma ni katauraoia nakon buakanakina.

³³Ngkai bon te UEA, ao e na manga okira kawaina are e nako mai iai ao e na bon aki rin naba i Ierutarem.

³⁴N na bon kaawakinna bon ibuku, ao i bukin au toro are Tawita.

³⁵E kanakoa te anera te UEA n te tairiki naba arei nakon aia kaemb'a kaain Aturia, ao E tiringiia 185,000 mai buakoia. Ma ngaia are, e a wenerua taiani mate n te ingabong are i mwiina.

³⁶I mwiina arei, ao e a okira Aturia Tennakeriba ni maeka n te kaawa are Ninewe.

³⁷N te tai teuana e taromauri n ana tembora antina are Nitiroka, ao e a tiringaki irouia natina m'aane ake Aterammereka ao Tiaretera n aia kabaang. A biri nakon te aba are Ararata, ao e uea i mwiina natina te m'aane are Etaraaton. [32]