Read Te B'aib'ara 2.Uea 3 Bible Online

2.Uea 3 - Te B'aib'ara bible

2.Uea 3

¹E uea Ioram are natin Aaba i aon Iteraera n ana ka katebwi ma wanua n ririki ni uea Ieotiab'ata i aon Iuta. E tautaeka Ioram mai Taamaria i nanon tebwi ma uoua te ririki

²ao e aki ongotaeka iroun te UEA ni karaoi m'akuri aika a bure. E uruaka te atiibu are te bouananti are e karaoia tamana ngkoa i bukin karineani B'aara, ma ngaia are, e aki rangi ni bure n aroia ana karo.

³Ma e bon teimatoa naba ni karaoi m'akuri aika a bure[3] are e a tia Ieroboam are natin Neb'ata te m'aane ni kareketaatiia Iteraera iai.

⁴E tauaki taekan te aba are Moaaba irouia Iteraera i nanon ririki aika a bati, ao e kairoroaki b'a e na kab'aka te roo n rab'ata nakoia uean Iteraera. E karikirakea te tiibu uean Moaaba are Metia, ma ngaia are, e angaangan uean Iteraera tebubua te ngaa te tiibu teteei, ao taian burae n tiibu man tebubua te ngaa tiibu m'aane.

⁵Ma e aki maan i mwiini maten Aaba, ao e a kakaitaraa Iteraera te uea are Metia.

⁶Ao e kiitana Taamaria te uea are Ioram n te bong teuana ao e a boota ana taanga ni buaka Iteraera.

⁷Ao e a kanakoa te rongorongo nakon uean Iuta are Ieotiab'ata ae e kaangai, E aki toki ni kakaitaraai Moaaba. Ko kukurei ngkana ko irai ni buakanna? Ao e taku Ieotiab'ata, N na raoniko, ao a mena taekaia au tautia ma au aoti i nanoni baim.

⁸Ma engaa kawaira ae ti na toua? Ao e taku Ioram, Ti na toua kawain te Rereua are Etom.

⁹Ma ngaia are, a kam'anangaia aia taanga ni buaka Ioram ma Ieotiab'ata ao uean Etom. Ma itiua te bong i mwiina, ao a akea te ran are a na mooi iai ma aia man.

¹⁰Ao e takaarua Ioram ni kaangai, “E a roko te kaangaanga. E a tia te UEA ni kaotinakoira nako ikai b'a ti nang kataenikaiaki irouia ana taanga ni buaka Moaaba.”

¹¹Ao e taku Ieotiab'ata, Antai Ana burabeti te UEA ae e iriira? Ti na titirakinna b'a tera ae e tangiria te UEA b'a ti na karaoia. Ao e taku temanna ana mataniwi Ioram, Ae ikai Eritai are natin Tiabata te m'aane. Bon te tia buobuoka Eria.

¹²Ao e taku Ieotiab'ata, E konaa n anganiira Ana taeka te UEA. Ao a nako uea ake teniman akekei ni kawara Eritai,

¹³ao e titirakina Ioram ni kaangai, “E aera ngkai kam nakomai? Naako taromauriia aia burabeti antiia Ianena are a taromauriaki irouia am karo.”[4] Ao e taku Ioram, Ti na aki, ma bon te UEA ae e kaotinakoira nako ikai b'a ti aonga ni kataenikaiaki irouia aia taanga ni buaka kaain Moaaba.

¹⁴Ao e taku Eritai nako ina, Bon ana tia m'akuri te UEA ae m'aaka ae e maiu ngai. I tuea n arana b'a ngke arona b'a I aki karinea uean Iuta are Iotiab'ata ao N na bon aki kan tatarai matam.

¹⁵Ao i mwiina, e taku Eritai, “Kanakomaia ae e rabakau ni katanga te aabi.” Ao e moanaki katangan te aabi iroun te tia katangitang, ao te UEA e angan Eritai te rongorongo i bukin Ioram ae e kaangai:

¹⁶E taetae te UEA b'a e na manga kaonaki nanon kabin te karaanga ae e m'auteretere aei n te ran.

¹⁷Ane kam na aki namakina karen te ang, ke kam na aki noora te karau, ma ane e na rawata te ran i bukimi ma ami man.

¹⁸Ti aki ti anne te b'ai ae e uarereke ae E na karaoia te UEA. E na boni buokingkami naba ni kataenikaia kaain ana taanga ni buaka Moaaba.

¹⁹Ane kam na taua aia kaawa ni kabane ake iai ooia, ao aia kaawa ake a kakannato. Ane kam na koroi ni kab'akai taian aroka aika a tamaroa ni kabane, ao kam na bonoti ni kabane taian koburake n ran, ao kam na urui aia tawaana ake a maiureirei ni kaoni nanoia n taian m'akorokoro ni b'a.

²⁰Ao n te ingabong are i mwiina, ngke e tabe ni karaoaki te angakarea, ao e rina n roko te ran ae e raanga kaanga mai Etom, ao e ieka te aba arei iai.

²¹Ao n te tai naba arei, ao a ongo kaain Moaaba te rongorongo are a nang roko uea ake teniman ni buakaniia. A tia ni botiia aia m'aane ake taani buaka ni moa mai rouia ake a uarereke ni karokoia ake a ikawai, ao e a tei te taanga ni buaka aei i aon tian abaia n tauraoi nakon te buaka.

²²Ao ngke a uti n te ingabong anne, ao e a oti taai i aon te ran n te aro are e a tara ni uraura. Ao ti teuana tarakina irouia tautian Moaaba.

²³Ao a takaarua ni kaangai, “Ani bon noora te raraa. A tia ni manga boni buaka i boni irouia uea ake teniman akekei ao a bon tiringiia i boni irouia. Bane mai, ti a nako n anai b'aai akana a tiku i mwiia n aia kaemb'a.”

²⁴Ma ngke a roko n aia kaemb'a Iteraera, ao a otinako naba tautian Iteraera ni buakaniia, ni karokoa a rairaki rikaaki ni biri nako. Ao a iriia nako Iteraera ni kakioia ni karokoa i Moaaba, ao a boni buakaniia naba.

²⁵A kamaunai kaawani Moaaba tautian Iteraera. A koroi ni kab'akai kaai aika a tamaroa, ao a kaini taian koburake n ran, ao i mwiina, a kaoni nanon taian tawaana aika a maiureirein taian m'akorokoroni b'a. Ao n tokina, ti nikiran te kaawa n tiku n tei bon Kira-Areteta, ma e katobibiaki irouia tautia ake taani bana ao a buakanna.

²⁶Ao e ataia uean Moaaba are Metia b'a e nang boni konaaki ma ngaia are, e kairiia 700 ana tautia ma aia kabaang ao e kataia n urua aia taanga ni buaka kaain Etom ake a mena mai moa. Ma a aki konaa n urua.

²⁷Ai ngaia are e a rawea natina te m'aane are te karimoa are boni ngaia are e na onea mwiina, ao e anga b'a ana karea n tiringnga i aon oon te kaawa. A aki kona moan te waaki arei Iteraera ma ngaia are, a kitana te kaawa arei n okirii mwengaia.