Read Te B'aib'ara 2.Uea 8 Bible Online

2.Uea 8 - Te B'aib'ara bible

2.Uea 8

¹Ao Eritai e tuanga neiere e kamaiuaki natina te m'aane ngkoa i rouna ao e taku, “E a tia n anga ana kauring te UEA b'a ae e na akea te am'arake ikai i nanon itiua te ririki. Ko na kairiia am utu nakon te tabo teuana, ao tiiku iai tabeua te tai.”

²Ao e karaoa tuangana neierei iroun Eritai, ao e a nako ni maeka i abaia kaain Biritia. E maeka ikekei neierei ma ana utu i nanon itiua te ririki.

³I mwiina, e a okira Iteraera ao e a butiia te uea n te tai naba arei b'a a na kaoka nako ina ana auti, ao ana b'ai.

⁴Bon i nanon te tai naba arei, ao e a titirakinaki Keati are ana tia m'akuri Eritai iroun te uea i bukin b'aai aika a kamimii ake e a tia ni karaoi Keati.

⁵Ngke e tabe Eritai ni karakina are kamaiuan te teei are natin te aine temanna, ao e roko neirei ma natina te m'aane. Ao e taku Keati, “Te uea ae ko karineaki, ao bon aei te ataei ni maanee arei, ao aei naba tinana.”

⁶Ao e bubutiia neierei te uea b'a e na karakinna nako ina. Ao e a karakini b'aai ni kabane ake a tia n riki neierei. Ao e taku te uea nakon temanna mai buakoia ana mataniwi, “I tangiriko b'a ko na kakoaua raoi b'a a na oki raoi ana b'ai neiei nako ina ake bon ana b'ai, n ikotaki ma m'anen arokana ake a reke man te tai are e kiitana iai Iteraera ni karokoa te bong aei.”

⁷Tabeua te tai i mwiina, ao e a m'ananga Eritai nakon kaawan te tautaeka are Tamateko b'a e na kawara uean Turia are Benatata, are e wene n aoraki. Ao ngke e tuangaki Benatata b'a e a roko ikekei Eritai,

⁸ao e taku nakon Ataera, [15] “Ko na nako ni kaaitibooko ma ana Aomata te Atua are Eritai, ao butiia b'a e na titirakina te UEA b'a N na marurung ke N na aki?” Ao uoti taiani b'aintangira nako ina.

⁹Ao e m'ananga nako Ataera ma 40 taiani kamero aika a on ni b'ain Tamateko aika a rangi n tamaroa b'a b'aintangira nakon Eritai. E reke te burabeti i rouna, ao e taku nako ina, “E tangiria am toro are te uea are Benatata ni kan ataia, tao e na reke i rouna te marurung ke e na aki?”

¹⁰Ao e taku Eritai nakon Ataera, “Tuangnga b'a e na marurung, ma E taku te UEA b'a e na boni mate Benatata.

¹¹E a boni karekea taraan Ataera te burabeti are Eritai ni karokoa e a mamaa Ataera, ao e a tang naba Eritai.

¹²Ao e taku Ataera, “Teuae ko karineaki, E aera ngkai ko a tang?” Ao e kaeka Eritai ni kaangai, “I bukina b'a I atai b'aai aika a kakamaaku aika ko nang karaoi nakoia Iteraera. Ko nang kabuoki aia kaawa aika a nonoaki ma n tiringiia aia rorobuaka n ataei. Ao ko na boni kamanatuai atuuia ataei aika a uarereke ma n raebitiia aine aika a bikoukou.”

¹³Ao e kaeka Ataera ao e taku, “N na kangaa ni karaoi baikanne? Bon ti te tia m'akuri ngai, ao akea m'aakau ni karaoa anne.” Ao e taku Eritai, “Ataera, E tuangai te UEA b'a ngkoe ae ko nang uea i aon Turia.”

¹⁴Ao e okirikaaki Ataera nakon Benatata ao e tuangnga ni kaangai, “E taku Eritai b'a ko na manga marurung.”

¹⁵Ma ni bon te bong are i mwiina, ao e anaa te burangketi ae e matenten Ataera. E kamaraa n te ran, ao e rabuna iai ubun Benatata ni karokoa e mate. Ao e a manga riki b'a te uea Ataera.

¹⁶E riki b'a te uea i aon Iuta teuare Ieoram are natin Ieotiab'ata i nanon ana kanimaua n ririki Ioram ni uea i aon Iteraera, ngke e boni uea naba Ieotiab'ata i aon Iuta. [16]

¹⁷Bon 32 ana ririki ni maiu Ieoram ngke e riki b'a te uea, ao e tautaeka i nanon wanua te ririki i aon Ierutarem.

¹⁸E aki ongotaeka Ieoram nakon te UEA b'a e karaoi m'akuri aika a bure. E mareaki ma natin Aaba te aine, ao e bure n ai aroia ana utu Aaba, ao uean Iteraera ake tabeman.

¹⁹Ma E aki tangiria te UEA ni kamaunaa Iuta, i bukina ngke E a tia ni berita nakon ana toro are Tawita b'a e na tatautaeka n taai nako temanna man ana utu i aon Iuta.

²⁰Ngke e uea Ieoram ao e kakaitaraaki irouia kaain Etom, ao a rinea aia uea i bon irouia.

²¹Ma ngaia are, e a m'ananga Ieoram ma ana taani buaka i aoia aoti nako Teira, ike e a katobibiaki ma mataniwiia ana taanga ni buaka irouia aia taanga ni buaka kaain Etom. E buakaniia kaain Etom n te bong, ma e konaaki, ao a biri nako ana taanga ni buaka n okiri mwengaia.

²²E aki te roko ni manga taua taekan Etom te aba are Iuta. E ngae ngke e kakaitaraaki naba irouia kaain te kaawa are Ribena [17] n taai akekei.

²³A bane ni koreaki taekan b'aai ni kabane ake e karaoi Ieoram i nanon ana tai ni uea i nanon te boki are Rongorongoia Uean Iuta.

²⁴E mate Ieoram ao e taunaki i rarikiia ana bakatibu i Ierutarem. E a manga uea i mwiina natina te m'aane are Aatia.

²⁵E uea teuare Aatia are natin Ieoram i aon Iuta n ana katebwi ma uoua n ririki n tautaeka Ieoram i aon Iteraera.

²⁶Ai 22 ana ririki ni maiu Aatia ngke e riki b'a te uea, ao e tautaeka mai Ierutarem i nanon ti teuana te ririki. Aran tinana bon Nei Ataria are tibun uean Iteraera are Omri.

²⁷E boni katotongiia ana utu Aaba n aki ongotaeka iroun te UEA ngke e karaoi m'akuri aika a bure, i bukina ngke bon ana koraki.[18]

²⁸E m'ananga Aatia ma uean Iteraera are Ioram ni buakana te uea are Ataera, ao aia taanga ni buaka kaain Turia i Ramota Kireata. E ikoaki Ioram n te buaka anne,

²⁹ma ngaia are, e m'ananga nakon te kaawa are Ietireera ni kamarurungnga iai. Ao e m'ananga Aatia ni kawaria ikekei.