Read Te B'aib'ara 2.Uea 9 Bible Online

2.Uea 9 - Te B'aib'ara bible

2.Uea 9

¹N te bong teuana ao e wetea temanna mai buakoia burabeti ake tekorakina Eritai, ao e taku, “Anaa te b'atoro ni b'aa n oriwa aei, ao katauraoiko b'a ko na nako nakon te kaawa are Ramota Kireata.

²Ngkana ko roko ikekei, ao kakaaea te m'aane ae Ieu ae natin Ieotiab'ata, ae tibun Nimti. Kairiia nakon te tabo ae na ti ngkami iai uoman,

³ao kab'aroa b'aan te oriwa i aon atuuna ni kaotia b'a ngaia ngkai te uea ae e boou.” Taetae nako ina ni kaangai, ‘E a tia n rineiko te UEA b'a uean Iteraera. Ao i mwiin anne, kawaekoako n nako-tai manga babaenikai.’ ”

⁴Ao e nako Ramota te burabeti are e ataei arei.

⁵Ao ngke e roko, ao a tabe ni kabowi taian aobitia n te taanga ni buaka. Ao e taku, “Teuae ko karineaki, Iai au rongorongo nakoim.” Ao e taku Ieu, “Antai iai mai buakora?” Ao e taku te burabeti, “Teuae ko karineaki, boni ngkoe!”

⁶Ma ngaia are, e teirake Ieu ao e rin nako. Ao e kab'aroa b'aan te oriwa te burabeti are i aon atuun Ieu ao e taetae nako ina ni kaangai: Aio ana rongorongo te UEA ae Atuan Iteraera nakoim, “Bon te UEA Ngai, ao I a tia n rineiko b'a aia uea au Aomata aika Iteraera.

⁷I tangiriko b'a ko na kamaunaiia ana utu Aaba, b'a e aonga n katuaaeaki Ietebera i bukin tiringakiia burabeti, ao au taani m'akuri ake tabeman.

⁸A riai ni bane ni mate m'anen ma ataei ni maaneen ana utu Aaba, e aoria ngkana te toro ke te inaomata.

⁹A na bane n tiringaki ana utu ni kabane, n ai aroia ana utu Ieroboam are natin Nebata ao Baatia are natin Aiia te m'aane.

¹⁰I bukin rab'atan Ietebera, e na kanaki rab'atana irouia kamea n te kaawa are Ietireera. E na bon akea nikiran rab'atana ae e na taunaki.” Ao i mwiina, e kauka te mataroa te burabeti are te ataei arei ao e a biri n otinako.

¹¹E okirikaaki Ieu nakoia ana mataniwi, ao e titirakinna temanna ao e taku, “Tera ae e tangiria te burabeti are e baba arei? Iai te kaangaanga?” E kaeka Ieu ao e taku, “Kam bon ataia ao kam ataa naba aron taetaena.”

¹²Ao e taku, “Kai tiaki ataia. Tera are e taekinna?” E uota te rongorongo mairoun te UEA. E taku b'a E a tia te UEA n rineai b'a N na uea n onea mwiin uean Iteraera.

¹³A kawaekoaia n anai kunnikaiia ma ni kamaenakoia i aon te tabo are e tei iai Ieu. E katanga te bu temanna, ao a bane n takaarua ni kaangai, “E a uea Ieu.”

¹⁴E a tia ni ikoaki kakaiaki uean Iteraera are Ieoram n te buaka i Ramota ngke e kataia n totokoa te uea are Ataera, ao tautian Turia.

¹⁵E a marurung ngkai Ieoram i Ietireera, ao e a roko ikekei uean Iuta are Aatia ni kawaria.

¹⁶Tabeua te tai, ao e roko Ieu i Ramota b'a e na kakaaea angan tiringakin Ieoram. E taku nakoia ana mataniwi, “Ngkana kam tangiria b'a N na riki b'a te uea, ao kam na aki kaotinakoa temanna man te kaawa aei. B'a ane a na nako Ietireera ni kaongoa Ieoram. Ao i mwiin anne, e tokara ana kaanibuaka Ieu ao e nako Ietireera.

¹⁷Ngke e noora Ieu ma ana m'aane teuare te tia tei n te taua n taratara b'a a tabe n roko, ao e takaarua nakon te uea ni kaangai, “I nooriia te koraki ni m'aane aika a tabe n nakomai.” Ao e taku Ieoram, “Kanakoa temanna b'a e na titirakiniia b'a te roko n ae e raoiroi ke tiaki?”

¹⁸Ao e otinako temanna te tautia, ao e taku nakon Ieu, “E tangiria te uea are Ieoram n ataia b'a tera rokomi aei?” Ao e taku Ieu, “Akea am b'ai iai, ma nakomai iriia au taanga ni buaka.” Ni bon te tai naba arei, ao e taku teuare e te tia tei n te taua n taratara, “Te uea ae ko karineaki, E a tia n roko irouia te koraki arei teuare e kanakoaki ma e tuai mani karairaki.”

¹⁹Ma ngaia are, e a manga kanakoa riki temanna i aon te aoti Ieoram, are e a manga kawara naba Ieu ma n taku, “E tangiria te uea n ataia b'a tera rokom aei?” Ao e taku Ieu, “Akea am b'ai iai, ma nakomai iriia au taanga ni buaka.”

²⁰E a manga taku naba te tia tei are n te taua n taratara, “Te uea ae ko karineaki, e a tia n roko irouia te koraki arei teuare e kanakoaki nakoia ma e tuai mani karairaki naba. Tataninga teutana. Te m'aane ae e rimoa aei e kabuta te kaanibuaka n aki akaaka, boni bae n Ieu.”

²¹Ao e taku Ieoram, “Katauraoa au kaanibuaka.” Ao i mwiina e toka ma Aatia i aon te kaanibuaka, ao a butinako n otinako ni kawara Ieu. A kaai ni kaaitibo n te aba are aban Naabota.[19]

²²Ao e titiraki Ieu ao e taku, “Tera rokom aei?” Ao e taku Ieu, “E na kangaa n reke te raoi? Tinam are Nei Ietebera boni ngaia ae e kairiia aomata nakon taromaurian bouananti ao karaoan m'akuri n tabunea.”

²³Ao e takaarua Ioram ni kaangai, “Aatia, ti a kiitana ikai b'a te m'akuri ni kam'ane te baei.” Ao ngke e kataia ni biri nako Ioram,

²⁴ao e katebe Ieu, ao e teke marenan angan Ioram n ewara buroona, ao e otinako mai b'aab'aana. Ao e b'aka ni mate i aon ana kaanibuaka.

²⁵Ao Ieu e tuanga Biteka are te tia buokia ni kaangai, “Anaa rab'atan Ioram, ao karenakoa i nanon te tawaana are n aban Naabota. Ko uringa ngkoa ngke ti m'ananga n te kaanibuaka,

²⁶are ngai ma ngkoe are ti mena i akuun taman Ioram are Aaba, ao are E a kaangai naba te UEA nakon Aaba, ‘I noora kamatean Naabota ma natina m'aane ngkoananoa. Ao I berita nakoim b'a N na katuaaeko ni bon te tawaana naba aei.” Ma ngaia are, e tewenakoa rab'atan Ioram ikekei n aron are E a tia n tua te UEA.”

²⁷E noori b'aai aika a riki aikai te uea are Aatia, ao e kataia ni birinako nakon te kaawa are Betaakan, ma e reke iroun Ieu ngke e kakioa ao e takaarua ni kaangai, “Tiringnga naba.” Ao a katebea Aatia ana tautia Ieu ngke e biri n te kawai are e nako Kura i rarikin Biream. Ao e waaki nako ni karokoa Mekito ike e a mate iai.

²⁸A anaa rab'atana naake bon ana mataniwi, ao a katokaa i aon te kaanibuaka ma ni kaokia nako Ierutarem ike a taunna iai i rarikiia ana bakatibu.

²⁹E a tia ni uea Aatia i aon Iuta n ana katebwi ma teuana n ririki n uea Aaba are natin Ioram te m'aane.

³⁰Ao e waaki ni kaineta Ietebera teuare Ieu, ao ngke e ongo Nei Ietebera rokon Ieu, ao e kabiri matana, ao e karaoa irana. Ao i mwiina e tei i matan ana winto n tataningaa rokona.

³¹Ao ngke e rin Ieu i nanon mataroan te kaawa, ao e takaarua Nei Ietebera nako ina ni kaangai, “E aera ngkai ko nakomai ngkoe ae te tia tiriaomata? Ko na tiringa te uea? Ko buakaka riki nakon Timri.”[20]

³²Ao e tararake Ieu nakon te winto ao e titiraki ni kaangai, “Iai ae e tei n au itera ae e mena i eta ikekei?” Ao a kaotinakoi atuuia tabeman taani m'akuri n te bareti man te winto,

³³ao e takaarua Ieu nakoia ni kaangai, “Karenakoa te aine anne man te winto.” A karenakoa, ao e tebera te o raraana, ao e teberiia naba aoti ake a toubekaa rab'atana.

³⁴Ao e nako Ieu b'a e na am'arake ma ni mooi, ao e a manga tuangiia tabeman taani m'akuri ni kaangai, “E aoria ngkana te aine ae e buakaka ma ngkai te natinuea te aine ngaia,[21] ao kam bon riai naba n taunna raoi.”

³⁵Ma ngke a otinako b'a a na tauna rab'atana, ao a kunea b'a ai ti tab'anouna n tiku, ao riini baina ake uaai ma waena ake uaai.

³⁶A tuanga Ieu taekani baikai, ao e taku Ieu, “E tuangaki ngkoa Eritai iroun te UEA b'a e na kanaki rab'atan Nei Ietebera irouia kamea i Ietireera ikai.”

³⁷Ao e taku b'a e na maenako rab'atan Ietebera i aontano kaanga butaeia maan, ma ngaia are, akea ae e konaa n ataia b'a antai ngaia.