Read Te B'aib'ara 1.Rongorongo 10 Bible Online

1.Rongorongo 10 - Te B'aib'ara bible

1.Rongorongo 10

¹A buakanaki Iteraera irouia kaain Biritia n te Maunga are Kireboa. Ao a birinako tautian Iteraera mairouia kaain Biritia, ao a m'aiti mai buakoia ake a tiringaki.

²Ao a roko tautian Biritia i rarikiia Tauro ma natina m'aane ao a tiringiia teniman mai buakoia: Ionatan, Abinataba, ao Marekitua.

³E rangi ni matoatoa te bonibuaka ni katobibia Tauro, ao e ikoaki kaakaiaki n aia kanoanikatebe aia kairiribai.

⁴Ao e tuangiia ana tautia Tauro b'a antai mai buakoia ae iai ana kabaang ao e taku, “Tiringai n am kabaang b'a I aki tangiria kaain Biritia aikai b'a a na b'ainikiriinai ma ni b'ainingareai aomata aika a aki onimakina Atuara.” Ma e maaku te tautia arei n tiringnga. Ma ngaia are, e a bon ewara birotona Tauro n oin ana kabaang ao e b'aka ni mate i aon wiin te kabaang.

⁵Ao ngke e a ataia te tautia arei b'a e a mate Tauro, ao e a manga bon tiringnga naba i bon i rouna n aron arei.

⁶Ao e mate Tauro ma natina m'aane ake teniman, ao ana koraki ni kabane ake m'aane.

⁷A ataia Iteraera ake a maeka n te M'arua are Ietireera [33] b'a a tia ni birinako aia tautia ao e a tia naba ni mate Tauro ma natina m'aane ake teniman. Ma ngaia are, a manga birinako naba, ao a m'ananga kaain Biritia nakon aia kaawa nako Iteraera ake a tiku imwiia.

⁸N te bong are i mwiina a manga okira te marae ni buaka kaain Biritia b'a a na anai aia b'ai ni buaka tautian Iteraera ake a mate. Ao ngke a noora rab'atan Tauro ma natina m'aane ake teniman i aon te Maunga are Kireboa,

⁹a anaa ana b'ainibuaka Tauro, a kanakoi ana barengaru, ao a korea atuuna ni kanakoa. Ao i mwiina, a kanakoa te rongorongo ni kabuta Biritia nako ia aia aomata ma ni kaitaua antiia are Takon.

¹⁰A katikui ana b'ai ni buaka Tauro i nanon ana Tembora antiia, ao a katinetinea atuuna i nanon ana Tembora antiia are Takon.

¹¹Ao ngke a ongo aomata ake a maeka i Iabeti Kireata te b'ai are a karaoia kaain Biritia nakon Tauro,

¹²ao a nako tabeman m'aane aika a ninikoria n anaa rab'atana ma rab'atan natina m'aane ake teniman. Ao a uotii rikaaki rab'ataia nako Iabeti, ike a tauniia iai i aan te kai ae te oke. Ao i mwiina, a aki am'aam'arake i nanon itibong ni kaota nanokawakiia.

¹³E mate Tauro i bukina ngke e aki kakaonimaki ao n ongotaeka iroun te UEA. E bon naanako ni kawara te aine are m'am'akuri ma tamneia aomata aika a mate ni kakaea buokana i rouna,

¹⁴ao e aki kaakawara te UEA ni kakaaea buokana. Ma ngaia are, E karaoa Tauro te UEA b'a e na tiringaki ao e anga abanueana nakon Tawita, are natin Iete te m'aane.