Read Te B'aib'ara 1.Rongorongo 11 Bible Online

1.Rongorongo 11 - Te B'aib'ara bible

1.Rongorongo 11

¹A kaaitibo taani kairiiri mai Iteraera ma Tawita i Eberon, “Bon am koraki ngaira,

²ao ti ataia b'a ko a tia ni kaira ara taanga ni buaka nakon te buaka, ngke e boni uea naba ngkoa Tauro. E a tia ni berita te UEA b'a ko na tautaekana abara ao ko na kaawakiniira n ai aroia tiibu.

³Ma ngaia are, ti a roko ngkai b'a ti na katokaa am baunuea b'a ko na riki b'a uean Iteraera.” Ao e karaoa ana boraraoi Tawita ma taani kairiiri ao e bubutiia te UEA b'a E na riki b'a aia tia kakoaua. Ao i mwiina, a kab'aroa te b'aa i aon atuun Tawita ni kaotia b'a e a riki ngkai b'a uean Iteraera. E riki aei n aron are e a tia n taekinna ana burabeti te UEA are Tamuera.

⁴E aranaki ngkoa Ierutarem n te tai anne b'a Iebuti, ao e kam'anangaa ana taanga ni buaka Iteraera te uea are Tawita ni buakana te kaawa anne.

⁵A taku kaain Iebuti, “Ko bon aki konaa n rin ikai” Ma e reke iroun Tawita te nono are te Maunga are Tion, are e aranaki ngkai b'a Ana Kaawa Tawita.

⁶E a tia n tuangiia ana taanga ni buaka ni kaangai, “Te moan tautia ane e tiringa kaain Iebuti e na riki b'a au mataniwi n te taanga ni buaka.” Ao i bukina ngke Ioaba are e moan waakina te buaka, ao e a riki b'a te mataniwi n te taanga ni buaka.

⁷Rimwi, e a manga waaki Tawita nakon te nono, ao bon anne bukina are e aranaki iai b'a ana Kaawa Tawita.

⁸E a manga karaoa te kaawa arei, ni moanna man kanoaakin iterana are mai mainiku.[34] Inanon te tai anne, ao e a kaira karaoan te uruaki n te kaawa Ioaba.

⁹E rikirake Tawita n riki b'a te uea ae e kakannato mani korakora ana tautaeka, i bukina ngke e mena te UEA ae moan te korakora n ana itera.

¹⁰E a tia ni berita te UEA b'a e na riki b'a te uea Tawita, ma ngaia are, a bane Iteraera ni boutokaa Tawita. E buokaki naba abanueana ni kaawakinaki irouia taani buaka aika a korakora b'a e aonga ni matoatoa.

¹¹Te moan aomata mai buakoia taani buaka aikai bon Iatiobeam are natin Akemoni te m'aane, are bon te tia kairiiri irouia Taani Buaka aika Teniman. [35] N te bonibuaka teuana ao e tiringiia tenibubua m'aane n ana kainiwai.

¹²Te tia buaka are temanna mai buakoia Taani Buaka ake Teniman bon Ereata are natin Toto are kanoan Aoa.

¹³I nanon tain buakanakiia kaain Biritia i Bati Tammim, a bane ni birinako tautian Iteraera,

¹⁴ao bon ti Ereata nikirana, are e tiku ma Tawita. A kanene n aki keerikaaki n te tabo teuana i rarikin te katawanang ni b'are ao a kataenikaiia kaain Biritia! E anga te tokanikai te UEA ae e koro arona nako ia Iteraera n te bong arei.

¹⁵N te tai teuana ao a m'ananga Taani Buaka aika Teniman [36] akekei ni kawara Tawita i buakon taian b'a ake n te nangananga are arana Aturam. A tia ni katea aia kaemb'a kaain Biritia ni M'aruan Rebaim

¹⁶ao e a tia n reke irouia Betereem. E mena Tawita n te nono,

¹⁷ao e taku, “I a rangi ni baki. Tera ngke I mooi n ranin te m'anib'a are ni mataroan te kaawa are Betereem.”

¹⁸Ao a nako Taani Buaka ake Teniman akekei ni karaba n niniia aia kaemb'a kaain Biritia ao a itiia te ran man te m'anib'a are ni mataroan te kaawa are Betereem. A uotia rikaaki nakon Tawita, ma e aki kan nimma, ao e kab'aroa te ran arei b'a te karea nakon te UEA

¹⁹ao e taku, “Nimakin te ran aei boni kaanga nimakin raraaia m'aane aika a tia n anga maiuia ibuku.” A karaoi m'akuri n ninikoria aikai Taani Buaka aika Teniman aikai.

²⁰Te tia kairiiri irouia Taani Buaka ake Teningaun [37] bon Ioaba are tarin Abitiai, ao n te bonibuaka teuana e tiringiia tenibubua m'aane n ana kainiwai. E bon kakannato naba n aroia Taani Buaka ake Teniman

²¹ao e rangi ni kakannato riki mai buakoia Taani Buaka ake Teningaun. Bon aia mataniwi n te taanga ni buaka ngaia, ma e aki roko n te iririia Taani Buaka ake Teniman.[38]

²²Benaia bon natin Ieoiata te m'aane ae e ninikoria man te kaawa are Kabeteera are e karaoi b'aai aika a kamimii. N te tai teuana, e tiringiia uoman ana taani buaka Moaba aika a bane aroia, ao n te bong ni kam'aitoro teuana, e nako nakon te kinono ao e tiringa te raian iai.

²³N te tai teuana e tiringa kaain Aikubita ae e raka i aon uoua te miita rietana ae e ua kainiwai. Bon ti te ambo rekenibaina, ma ngaia are, e rawea te kainiwai mairoun te I-Aikubita arei ao e tiringnga iai.

²⁴E karaoi m'akuri ae ai aron aikai Benaia, bon ti te bo ninikoriana ma Taani Buaka ake Teniman,

²⁵e ngae ngke e aki raoniia. E bon rangi ni kakannato naba mai buakoia Taani Buaka ake Teningaun. Ma ngaia are, e karikia Tawita b'a te mataniwi irouia ana taan tararuaia.

²⁶Aikai araia taani buaka aika a kakannato: Ataera are tarin Ioaba;

²⁷Ereanan are natin Toto te m'aane are kaain Betereem; Tiammota are kaain Arora; Ereti are kaain Beron;

²⁸Ira are natin Iketi are kaain Tekoa, Abietera are kaain Anatota; Tibekai are kanoan Utia; Irai [39] are kanoan Aoa;

²⁹Maarai are kaain Netob'a; Ereba are natin Baana te m'aane are kaain Netob'a;

³⁰Itai are natin Ribaai te m'aane are kaain Kibea are kanoan Beniamin;

³¹Benaia are kaain Biraton; Urai [40] mai rarikin karaanga nako aika a uarereke i aon te Maunga are Kaati;

³²Abiera are kaain Areb'a; Atimaweta are kaain B'aarum;

³³Eriaba are kaain Tiaarebon; Atem [41]

³⁴are kanoan Kition; Ionatan are natin Tiake te m'aane are kaain Ara;

³⁵Aiam are natin Taka are kanoan Ara; Erib'ara are natin Ura te m'aane;

³⁶Ebera are kaain Mekera; Aiia are kaain Beron; Etiro are kaain Karemera;

³⁷Naarai are natin Etib'ai te m'aane; Ioera are tarin Natan;

³⁸Mibea are natin Akeri te m'aane; Tereka are kaain Ammon;

³⁹Naarai are kaain Beerota are te tia uouota ana b'ai ni buaka Ioaba;

⁴⁰Ira ma Kareb'a are kanoan Ietera;

⁴¹Uria are kanoan Eta;

⁴²Tabata are natin Arai te m'aane;

⁴³Arina are natin Tita te m'aane, are te tia kairiiri man te baronga are Reuben, ao ana taani buaka ake teningaun;

⁴⁴Anan are natin Maaka te m'aane; Iotiab'ata are kaain Mitan;

⁴⁵Utia are kaain Atitera, Tiam'a ao Ieiera natin Otam are kaain Aroera.

⁴⁶Ieriaera ma Ioa are natin Timri are kain Tita, Eriera are kaain Maawa,

⁴⁷Ierib'ai ma Iotiawia ake natin Erenaam, ao Item'a are kain Moaaba, Eriera ma Obeta ma Iaatiera are kaain Metob'a.