Read Te B'aib'ara 1.Rongorongo 12 Bible Online

1.Rongorongo 12 - Te B'aib'ara bible

1.Rongorongo 12

¹Tabeua te tai mai m'aaina, ao e a tia Tawita n nako ni maeka n te kaawa are Tikeraka ngke e birinako mairoun Tauro. Inanon ana tai ni mena ikekei, ao iai tautia tabem'aang aika a ninikoria ake a raonna ni buokia n ana buaka. [42]

²Tabeman mai buakoia taani buaka aikai a nako man ana baronga Tauro are te baronga are Beniamin. A bon rangi ni b'aati ni kamanenaan taiani kanoa ni katebe ao kai ni katebe, ao a kauaanga ni katebe ao ni bana n te atiibu.

³Ao aia taani kairiiri bon Aietera ao Ioati, ake natin Tem'a are kaain Kibea.

⁴Aio araia m'aane ake kanoan Beniamin: Iaatiera, ao Berete are natin Atimaweta; Beraka ao Ieu are kaain Anatota;

⁵Itimaia are kaain Kibeon, are te tia kairiiri irouia Taani Buaka ake Teningaun;

⁶Ieremia, Iaatiera, Ioanan, ao Iotabata are kaain Ketera; Erutai, Ierimota, Bearia, Temaria, ao Tebatia are kaain Aruba;

⁷Erekana, Itiia, Atarera, Ioetera, ao Iatiobeam are man te kaainga are Kora; Ioera ao Teb'aria are natin Ieroam m'aane are kaain Ketora.

⁸A ira naba Tawita n ana nono n te rereua kaain te baronga are Kata ao a riki b'a ana taani buaka. Bon taani buaka ngaiia aika a ninikoria, a kakamaaku n ai aroia raian ao a birim'aaka n ai aroia taiani katere (rian aoni maunga.) A rabakau ni buaka ma taian otanga ao taiani kainiwai.

⁹Bootaia bon tengaun ma temanna ao aikai nakoaia man ae e rietaata nakon ae rinano:

¹⁰Etera te tia kairiiri, ao Obaria, Eriaba,

¹¹Mitimanna, Ieremia, Atai,

¹²Eriera, Ioanan, Eretabata,

¹³Ieremia, ao Makebannai.

¹⁴Bon taian aobitia n te bootaki n tautia m'aane aikai; Tabeman mai buakoia bon taian aobitia aika a rietaata i bukin teuana tengaa te taanga ni buaka, ao ake tekorakina bon taian aobitia i bukiia tebubua te taanga ni buaka.

¹⁵A tia n ri nanon te Karaanga are te Ioretan mai m'aaina ngke e nang iabuubuti, ao a kakioia nako aomata ake a maeka n te m'arua ake n iteran te karaanga ake uoua.

¹⁶A m'ananga n te tai teuana koraki ni m'aane man te baronga are Beniamin ao Iuta nakon te nono are e mena iai Tawita.

¹⁷E kawariia Tawita i tinaniku ao e taku nako ia, “Ngkana kam roko ma te nano ni iraorao ma n tauraoi ni buokai ni buaka, ao kam na tiku i rarikira ao raoniira. Ma ngkana kam na kataia ni kab'akaai nako ia au kairiribai, ao E na katuaaingkami te Atua are E tataromauriaki irouia ara bakatibu, i bukina b'a bon akea te kaairua ae I a tia ni karaoia.”

¹⁸Ao Amatai are temanna mai buakoia m'aane akekei are e a manga riki b'a te tia kairiiri irouia Taani Buaka ake Teningaun, e kawara Tawita. E niniaki n Tamnein te Atua, ao e taku, “Ti na raoningkami, Tawita ae natin Iete! Ko na tetekeraoi ngkoe ma raom, b'a E buaka te UEA man ami itera.” Ma ngaia are, e kariaia Tawita b'a a na tiku i rarikiia, ao e anganiia tib'angaia b'a taan tararuaia tautia ake a na niniia aia kaawa irouia aia kairiribai.

¹⁹Taani buaka tabeman man te baronga are Manate a nako n raona Tawita. A tia n ira Tawita ngke e buaka ngkoa man aia itera kaain Biritia ni kaaitaraa te uea are Tauro. Ma ni bon te tai are a ataia iai kaain Biritia b'a e na kona ni manga buakaniia man raona Tauro, ao a kanakoa nakon te kaawa are Tikeraka.

²⁰Aikai m'aane man te baronga are Manate ake a raona Tawita: Atena, Iotabata, Ieriaera, Mikaera, Iotabata, Eriu, ao Tiretai. A bon tia naba n riki b'a taani kairiiri n ana taanga ni buaka Tauro

²¹ao bon tautia ngaiia aika a ninikoria, ma ngaia are, e karikiia Tawita b'a aobitia n te taanga ni buaka. A buaka man ana itera Tawita ngke a buakanaki irouia aia kairiribai.

²²Ngke e waaki nako te bong, ao a manga roko aomata aika a boou n raona Tawita, ao n te tai ae e aki maan, ao e a rangi korakora mani marurung ana taanga ni buaka.

²³E a tia n uotaki nako abanuean Iteraera mairoun Tauro, ao e a b'ainna Tawita.

²⁴E tautaeka mai Eberon, ao ngaa ma ngaa tautian Iteraera aika a tia ni kataneiaaki ake a m'ananga man baronga nako ake a roko ni kauea Tawita b'a e na riki b'a uean Iteraera,

²⁵n aron are e a tia n berita iai te UEA. A bon tatauraoi naba tautia aikai nakon te buaka, ao 6,800 bon mai Iuta, aika a toa ma otangaia ao aia kainiwai;

²⁶7,100 man te baronga are Timeon; 4,600 man te baronga are Rewi; n ikotaki ma Ieoiata, are te tia kairiiri man ana kariki Aaron,

²⁷ao 3,700 ana m'aane, ao ai uana naba ma Tatoka, are bon te tautia ae e ninikoria,

²⁸ao 22 mai buakoia ana koraki ake bon taian aobitia naba; 3,000 man te baronga are Beniamin, i bukina ngke bon aei ana baronga Tauro,

²⁹ao angiia m'anena a bon tiku ni kakaonimaki nakon Tauro; 20,800 man te baronga are Eberaim, aika a aki ti ninikoria ma a bon rangi n ataaki naba n aia kaainga;

³⁰18,000 man Manate Maeao ake a tia n rineaki b'a a na buoka Tawita; 200 taani kairiiri man te baronga are Itakara, n reitaki ma taian taanga ni buaka aika a mena i aan aia kairiiri

³¹taani kairiiri aikai a ataa tain raoi te b'ai ae e tangiraki b'a e na karaoaki; 50,000 man te baronga are Teburun,

³²ake a aki ti kakaonimaki, ma a bon tia naba ni kataneiaaki ni kamanenai b'aai ni buaka nako;

³³1,000 taian aobitia man te baronga are Nabetari

³⁴ao 37,000 tautia aika a toa ma aia otanga ao aia kainikatebe;

³⁵28,600 man te baronga are Taan;

³⁶40,000 man te baronga are Atera,

³⁷Kata ao Manate Mainiku bon 12,000, ake a toa ma aia b'ai ni buaka n aekaia nako.

³⁸A bane n roko n anga nanoia tautia aikai n roko i Eberon i bukina ngke a tangira Tawita b'a e na riki b'a te uea. Ni koauana, ao a bon bane aomata n ti te bo nanoia.

³⁹A tiku tautia i Eberon i nanon tenua te bong, n am'arake ma ni momooi ni kanaia aia koraki ake a tia ni katauraoia i bukiia.

⁴⁰Kaain Iteraera ake tekorakina ake a roko man taabo aika a raroa nako man abaia kaain Itakara, Teburun, ao Nabetari a uoti aia nanai ni kao ao aia tiibu b'a a na tiringaki i bukin te am'arake. A bon uoti naba aia aati, miure, ao taiani kao m'aane aika on aoia n taiani buraawa, taiani biiku aika a m'au, taiani wain, ao b'aan te oriwa. Bon aio kaotan nanoia ae a rangi ni kukurei aomata ni kabane i aon Iteraera.