Read Te B'aib'ara 1.Rongorongo 15 Bible Online

1.Rongorongo 15 - Te B'aib'ara bible

1.Rongorongo 15

¹E a manga karaoi riki kateitei tabeua Tawita i Ierutarem, ao e katea te autinrianna ike e na kaawakinaki iai te Atiniberita.

²Ao e taku, “Bon ti kanoan Rewi aika a kariaiakaki ni uota te ati, i bukina b'a E a bon tia te UEA n rineia b'a taani karaoa te m'akuri anne ao taani m'akuri i rouna n aki toki.”

³I mwiina anne, e kaoiia aomata ni kabane Tawita b'a a na roko i Ierutarem ni mataku ni uotakin te Atiniberita nakon te tabo are e a tia ni karaoia b'a e na katukaki iai.

⁴E kawaekoaia naba kanoan Aaron ao kanoan Rewi. Aikai kanoan Rewi ake a roko:

⁵Uriera, te tia kairiiri man te kaainga are Koata, ao tebubua uangaun ana koraki;

⁶Ataia, te tia kairiiri man te kaainga are Merari, ao uabubua uangaun ana koraki;

⁷Ioera, te tia kairiiri man te kaainga are Kerition, ao tebubua teningaun ana koraki;

⁸Temaia, are te tia kairiiri man te kaainga are Eritaban, ao uabubua ana koraki;

⁹Eriera, te tia kairiiri man te kaainga are Eberon, ao waningaun ana koraki; ao

¹⁰Amminataba, te tia kairiiri man te kaainga are Utiera, ao tebubua tengauni ma uoman ana koraki.

¹¹E kawaekoaia kanoan Rewi aika onoman aikai Tawita ao uoman ibonga, aika Tatoka ao Abiata.

¹²E taku nako ia, “Taani kairiiri ngkami man te kaainga are Rewi. Bon ngkami ma ami koraki aika kam na moana te bootaki, ma ngaia ae, kam na kaitiakingkami b'a kam aonga ni nakoraoi i matan te UEA. Ao i mwiina kam na uota te Atiniberita are ana b'ai te UEA ae Atuan Iteraera nakon te tabo ae I a tia ni katauraoia i bukina.

¹³Te moan tai are ti kataia ni uota iai te ati nako Ierutarem, ti aki titirakina te UEA b'a tera ae e tangiria b'a ti na karaoia. E un iroura, i bukina ngke kam aki mena ikekei ngkami kanoan Rewi i bukin uotakin te ati.”

¹⁴Ao a kaitiakia ibonga ma kanoan Rewi. Ao a tauraoi nakon uotakin te Atiniberita

¹⁵n taian kain amo aika a toka i aon angaia, n aron are E a tia te UEA n tuanga Moote.

¹⁶Ao i mwiina, e tuangiia taani kairiiri Tawita b'a a na rineia kanoan Rewi tabeman b'a a na anene ma ni katangitang n taian aabi aika a uarereke, ao b'aai n katangitang riki tabeua, ao taian timbara.

¹⁷Aikai m'aane ake a rineaki b'a taani katangitang:

¹⁸Eman, are natin Ioera te m'aane, ao ana koraki ake Ataba are natin Berekia te m'aane,

¹⁹ao Etan are natin Kutiaia are kaain te kaainga are Merari.

²⁰Aikai taani buokiia ake tabeman ake a katang taian aabi ake a uarereke:

²¹Tekaria, Atiera, Temiramota, Ieiera, Unni, Eriaba, Maateia, ao Benaia. Aikai ake tekorakina ake a katang aabi ake a buubura: Matitia, Eribereu, Mikeneia, Atatia, ao uoman taan tei n te Tembora, aika Obeta-Etom ao Ieiera.

²²E rineaki Kenania b'a te tia kaira te katangitang, i bukina ngke bon te tia katangitang ngaia.

²³A manga rineaki aman kanoan Rewi b'a taani teiakina te Atiniberita.

²⁴Aikai araia: Berekia, Erekana, Obeta-Etom, ao Ieia. Ao n te kabanea, Tawita e rineaia ibonga ake a na nakonako i matan te Atiniberita b'a taani katang bu. Ao aikai araia: Teb'ania, Iotiab'ata, Netanera, Amatai, Tekaria, Benaia, ao Erietera.

²⁵Ao a rangi ni kukurei Tawita ma ana taani kairiiri mai Iteraera, ao mataniwin te taanga ni buaka ngke a m'ananga nakon ana auti Obeta-Etom n anaa te Atiniberita.

²⁶Ao te Atua e anganiia kanoan Rewi korakoraia ae a tangiria i bukin uotakin te ati, ma ngaia are, a anga itiman taiani kaom'aane ao itiman tiibu m'aane.

²⁷Ao a b'ainiia n te niiniira ae te rinen Tawita, ma kanoan Rewi, Kenania are te tia kaira te katangitang, ao taani katangitang ni kabane, ao e kunnikaia naba Tawita n te kunnikai ae te ebota ae te rinen. [46]

²⁸Ngke e tabe ni uotaki te Atiniberita nako Ierutarem, ao a bane aomata ni bukamaruia n takaarua ao ni katangi b'aini katangitang aika taiani konete, buu, timbara, aabi, ao b'aai ni katangitang riki tabeua ake taiani karai.

²⁹Ao e taratara nako natin Tauro te aine are Nei Mikara [47] man ana winto ni matakuakina uotakin te ati ni karinaki n Ana Kaawa Tawita. Ma ngke e noora Tawita ni kibakiba ni m'am'aie ni karinea te UEA, ao e rangi n nuka iai.