Read Te B'aib'ara 1.Rongorongo 18 Bible Online

1.Rongorongo 18 - Te B'aib'ara bible

1.Rongorongo 18

¹Tabeua te tai rimwi, ao Tawita e buakaniia kaain Biritia mani kataenikaiia. E taua aia kaawa are Kate ao kaawa ake a uarereke i rarikina nako.

²E kataenikaiia naba kaain Moaba Tawita, ao a tia ni kariaia b'a aia tia tautaeka ao a na kab'aab'akaa te roo n rab'ata nakoina.

³Ngke e kataia uean Tob'a are Ataretera n taua taekan te aba are i rarikin te Karaanga are Iuberetiti, ao e kawaria Tawita ni buakanna i Amata ao e kataenikaia.

⁴A reke iroun Tawita teuana te ngaa te kaanibuaka, itiua te ngaa taani buaka i aon taiani kaanibuaka, ao uabwi te ngaa tautia. Ao e katoaraaia ni kabane ma e ti katikui tebubua taian aoti.

⁵Ao ngke e roko te taanga ni buaka man te abanuea mai Tiria ake a roko mai Tamateko b'a e na buoka Ataretera, ao Tawita e tiringiia uabwi ma uoua tengaa mai buakoia.

⁶Ao i mwiina, e katikuia tabeua ana taanga ni buaka i Tamateko, ao e riki Tawita b'a te tia tautaeka irouia kaain ikekei, ao a kab'ab'akaa te roo n rab'ata nakoina. N taabo nako ike e nako iai Tawita, ao e a bon buubuokaki naba iroun te UEA n anganna te tokanikai n te buaka.

⁷A uouoti aia otanga aika koora ana aobitia Ataretera, ma e anai Tawita man uoti rikaaki nako Ierutarem.

⁸A m'aiti naba taiani buraati ake e anai man te kaawa are Tib'ata ao Kun, are ana b'ai ngkoa Ataretera. Rimwi riki, e a kamanenai buraati aikai Toromon ni karaoa iai te boora are e rangi ni buubura are e aranaki b'a Taari, ao ni karaoi naba iai taiani boua ma b'ain nako nanon te Tembora iai.

⁹Bon kairiribai ngkoa uea ake Tou mai Amata, ao Ataretera. Ma ngaia are, ngke e ongo Tou ae e a tia Tawita ni kataenikaia ana taanga ni kabane Ataretera,

¹⁰ao e kanakoa natina te m'aane are Atoram ni kimarimariia ana tokanikai Tawita. Ao e uoti naba taiani b'aintangira Atoram aika a karaoaki man te koora, te tirewa, ao te buraonti.

¹¹E angan te UEA b'aintangira aikai Tawita, n aron are e a tia naba ni karaoia nakon b'aai ake e taui n te buaka i Etom, Moaba, Ammon, Biritia, ao Amareka.

¹²Ao e kataenikaia aia taanga ni buaka kaain Etom Abitiai are natin Teruia n te M'arua are Taoro man tiringiia tebwi ma wanua tengaa man aia taanga ni buaka.

¹³Ao i mwiina, e katikuia ana taanga ni buaka i Etom, ao a kariaia kaain te tabo arei b'a e na uea Tawita i aoia. Ao te UEA, e angan Tawita te tootokanikai n te buaka n taabo nako ike e nako iai.

¹⁴Ao e tautaekana Iteraera ni kabutaa Tawita ma te eti ao te riai.

¹⁵Te mataniwi n te taanga ni buaka bon Ioaba are natin Teruia te m'aane; ao Ieotiab'ata are natin Airuta te m'aane bon te tia koroboki.

¹⁶Ao taiani ibonga bon Tatoka are natin Aituba te m'aane ao Abimereka are natin Abiata. Ao te tia koroboki bon Tiawetia.

¹⁷Te mataniwi irouia taan tararua Tawita bon Benaia are natin Ieoiata.[51] Bon kabanea n rietaata n nakoaia natin Tawita ake m'aane.