Read Te B'aib'ara 1.Rongorongo 20 Bible Online

1.Rongorongo 20 - Te B'aib'ara bible

1.Rongorongo 20

¹Ngke e a manga roko tain te aumeaang are i mwiina, te tai are e nako ni buaka iai taiani uea, ao e m'ananga nako Ioaba ni kaira ana taanga ni kamaunai kaawan Ammon ni kabane. E buakana te kaawa n tautaeka are Rab'a ma ni kiitanna ngke e a urubekebeke. Ma e bon tiku Tawita i Ierutarem.

²Rimwi riki, e a boni m'ananga Tawita nako Rab'a ao e anaa ana baunuea aia bouananti are Mirikom. [53] Ke “aia uea.” E karaoaki te baunuea arei man te koora ae tenibwi ma aua te kirokuraem rawawatana, ao iai naba atiibu aika a tamaroa i aona. Ao e katokaa te atiibu are e tamaroa Tawita i aon ana baunuea, [54]

³Ao e kairoroia kaain Rab'a b'a a na m'akuri n taian tao, beke aika a karaoaki man te biti, ao taian tanai. Ao e karaoa naba ae ai aron anne nako ia kaain kaawan nako Ammon ake tabeua. Ao i mwiina, e a kaokiia ana taanga ni buaka Iteraera Tawita nako Ierutarem.

⁴I mwiin tabeua te tai, ao a buaka Iteraera ma kaain Biritia i Ketera. Inanon tain te buaka, ao Tibekai are kanoan Utia e tiringa Tibai, are ana kariki Rebaim, [55] ao a konaaki kaain Biritia.

⁵Ni buakanakiia kaain Biritia are teuana, ao Ereanan natin Iaira te m'aane, e tiringa Rami are tarin Koria are kaain Kate, are buburan ana kainiwai ai aron buburan bitin te b'ai n raranga kunnikai.[56]

⁶Temanna naba tautian Biritia ae kanoan Rebaim ae e korakora rab'atana kaanga te aintoa ao kakaonoua m'aitin tabonibaina ni baina ake uoua ao taboniwaena naba. Inanon tain te buaka i Kate,

⁷ao e b'ainingareia Iteraera, ma ngaia are, e a tiringaki naba iroun ai natin Tawita te m'aane are Ionatan. [57]

⁸A tiringaki m'aane aika teniman aikai ake kaain Kate, ake ana kariki Rebaim irouia Tawita ma ana tautia.